DANIEL 1 - Dios Rimashcata Quillcashcami

Daniel Babilonia llactapi cashcamanta

¹ Judá llactata jatun mandac Joacim quimsa huatata mandacucpimi, Babilonia llactata jatun mandac Nabucodonosorca Jerusalenman paipac soldadocunahuan shamushpa muyundita shayarirca.

² Mandac Diosmi Judá llactata mandac Joacimtapish, paipac huasipi tiyac imacunatapish Nabucodonosorpac maquipi churarca. Shina churacpimi, Babiloniaman apashpa, paipac dioscunapac imacuna huacaichinapi churarca.

³ Jatun mandac Nabucodonosormi paipac huasipi serviccunata mandac Aspenazta israelcunapuramanta alli nishca jatun mandacpac churicunata pushamuchun cacharca.

⁴ Shinallatac mana ima tucushca, sumac ñahui, imatapish allita yachac, alli yuyaiyuc mosocunatami mandana huasipi paita servishpa causaccunata quillcanatapish, caldeocunapac rimaitapish yachachichun cayac cacharca.

⁵ Jatun mandacca punzhantami paipac micunata, pai ubiana vinota paicunaman carachun cacharca. Shinallatac quimsa huatata yachacushpa paita servichunmi mandarca.

⁶ Chai mosocunapurapica Judá aillupuramanta Daniel, Ananías, Azariasmi carca.

⁷ Chai mandana huasipi serviccunata mandacca Danieltaca Beltesasartami shutichirca. Ananiastaca Sadractami shutichirca. Cutin Misaeltaca Mesacta, Azariastaca Abed-negotami shutichirca.

⁸ Danielca jatun mandacpac micunatapish, pai ubiana vinotapish micushpa, ubiashpa mapayanatami paipac shungupi mancharca. Chaimantami mandana huasipi serviccunata mandactaca: “Caita micushpaca mapayashunmi, cai micunata micuchun ama mandaichu” nirca.

⁹ Dios yuyaita cucpimi, chai mandacca Danielta sumacta chasquirca.

¹⁰ Chaimantami chai mandacca Danieltaca: —Ñucaca jatun mandacta manchanimi. Paimi cai micunatapish, ubianatapish cuchun mandarca. Cancunapac huiñaipuramanta, cancuna irquiyashca ñahuicuna ricuricpica, jatun mandacca ñucata huañuchingami. Shina ruhuacpica, cancunamantami huañusha— nirca.

¹¹ Mandana huasipi serviccunata mandacca shuc mayordomotami Danielta, Ananiasta, Misaelta shinallatac Azariasta mandachun churarca. Danielca chai mayordomotaca:

¹² —Canta serviccunataca chunga punzhacaman yacullata, verdura micunallata carangui.

¹³ Chai quipaca ñucanchic ñahuitapish, shinallatac jatun mandacpac micunata micuc mosocunapac ñahuitapish ricungui. Shina ricushpaca, canta servic ñucanchic ima shina cashcata ricushpa ruhuanguilla— nirca.

¹⁴ Chashna nishcata uyashpami, chunga punzhata chashna carashpa ricurca.

¹⁵ Ña chunga punzha tucucpica, paicunapac ñahuica jatun mandacpac micunata micuc mosocunapac ñahuita atishpa, ashtahuan sumac huira ñahuimi ricurirca.

¹⁶ Chaita ricushpami, mayordomoca jatun mandac micunata mana cushpa, verdura micunallata cararca.

¹⁷ Diosmi chai chuscu mosocunataca alli yachaita, tucuilaya quillcanata yachachirca. Danielca muscuipi shina ricurishcatapish, muscushcatapish alli yachacmi carca.

¹⁸ Chai mosocunata jatun mandacpac ñaupaman pushamuchun nishca punzhami pactarca. Chaimantami mandana huasipi serviccunata mandacca Nabucodonosorpac ñaupaman chai mosocunata pushamurca.

¹⁹ Jatun mandac chai tucui mosocunahuan parlashpaca, Daniel, Ananías, Misael, Azarías shina cacta mana tarircachu. Chashnami paicunaca jatun mandacpac ñaupapi servicurca.

²⁰ Tucui alli yachacushcata, alli yuyaiyuc cashcata jatun mandac yachashpaca, pai mandacuc llactapi tiyac tucui yachaccunatapish, lucerota ricushpa yachacuccunatapish chunga cutinhuan yalli yachac cashcatami ricurca.

²¹ Danielca jatun mandac Ciro callari huatata mandangacamanmi servishpa causarca.