COLOSENSES 4 - Dios Rimashcata Quillcashcami

¹ Amocuna, cancunapish shuc Amota jahua pachapi charishcamanta, cancunapac serviccunamanca cashcata, allita ruhuanguichic.

² Diosta mañashpa, paita pagui nicuichiclla.

³ Cristomanta pi mana yachashca alli huillaita maipipish huillangapac, ñucanchicmanta Diosta mañaichic. Chaita huillashcamantami, ñucaca caipi prezu tiyacuni.

⁴ Ñuca ima shina huillana cashca shina allita huillachun, Diosta mañaichic.

⁵ Cristohuan manarac caccunahuan tandarishpaca, yachaccuna shina caichic. Shinallatac tiempo tiyashcapica allitac ruhuaichic.

⁶ Cancuna shuccunahuan parlanacushpapish, uyanalla sumac rimaicunahuan parlaichic. Paicuna imata tapucpipish, allita cutichinata yuyaichic.

Ña tucuchingapac allilla cashca cachun nishcamanta

⁷ Jesusmanta ñucanchic cuyashca huauqui Tiquicoca Jesucristopacta ruhuac cashpami, ñucataca tucui imapipish ayudacun. Paimi ñucamantaca tucui ima huillana cashcataca huillagringa.

⁸ Ñucanchic ima shina cashcata cancunaman huillashpa, ashtahuan alli catina yuyaita cuchunmi, paitaca cancunapacman cachani.

⁹ Ñucanchic cuyashca, allita pactachic huauqui Onesimopish paihuanmi rin. Paica cancunapurallatacmi can. Paicunami caipi tucui ñucanchic ima shina cashcatapish parlanga.

¹⁰ Ñucahuan pacta carcelpi tiyacuc Aristarcopish, Bernabepac primo Marcospish “allilla cashca cachun” nishpami cachancuna. Marcos cancunapacman chayacpica, alli chasquina cashcataca ñami huillarcani. Chaimanta pai chayacpica, alli chasquinguichic.

¹¹ Shinallatac Justo nishca Jesuspish “allilla cashca cachun” nishpami cachan. Israelcunapuramanta criccunaca paicunallami, Dios mandacucmanta ñucahuan pacta imatapish ruhuashpa, cushichiccuna can.

¹² Jesucristopacta ruhuac, cancunapuramanta Epafraspish “allilla cashca cachun” nishpami cachan. Cancuna alli catishpa, tucui shunguhuan Diospac munaita alli yachashpa, Diospacta ruhuachunmi, punzhanta Diosta mañacunlla.

¹³ Cancunamantapish, Laodicea pueblopi causaccunamantapish, Hierápolis pueblopi causaccunamantapish Epafras yuyaricushcataca ñucallatacmi yachani.

¹⁴ Shinallatac cuyashca jambic Lucaspish, Demaspish “allilla cashca cachun” nishpami cachancuna.

¹⁵ Shinallatac Laodicea pueblopi causac criccunatapish, Ninfatapish paipac huasipi tandanacushca criccunandi “allilla cashca cachun” ninchicmi.

¹⁶ Cancuna cai quillcata rezashca quipaca, Laodicea pueblopi causac tandanacushca criccunamanpish rezachun cachanguichic. Shinallatac Laodicea puebloman ñuca cachashca quillcata paicuna cancunaman cachacpipish rezanguichic.

¹⁷ Shinallatac Arquipotapish, Apunchic Jesuspacta imata ruhuachun nishpa mingashcataca allita pactachichun nichic.

¹⁸ Pablomi quiquin maquihuan quillcashpa, “allilla cashca cachun” nishpa cachani. Ñuca carcelpi tiyacushcataca, ama cungaringuichicchu. Diosca paipac sumaimana cuyaita tucui cancunaman cushca cachun ninimi. Chashna cachun.