CANTARES 8 - Dios Rimashcata Quillcashcami

¹ ¡Ñuca turillatac cacpi, ñuca mamapac chuchucunallatatac chuchushca cacpica, ñanpi tupashpami muchaiman! Chashna muchacta ricushpaca, pipish mana piñanmanchu.

² Cantaca pushashpami ñuca mamapac huasiman yaicuchiman. Canmi ñucata yachachinguiman. Shinallatac vinotapish, granadata capishpa, llullu vinotapish ubiachimanmi.

³ Paipac lluqui rigraca ñuca umatami samachin. Cutin alli lado rigrahuanca ucllanmi.

Cusa cantashca

⁴ Jerusalenpi causac solteracunalla, ñuca cuyashcataca amatac ricchachingapac ari nichicyari. Ima horascamanpish samarichun saquinguichiclla.

Cuyaica poderta charishcamanta Huarmicuna cantashca

⁵ ¿Pitac shitashca pambamanta cuyashcapac rigra jahuapi huichai shamucun? Manzana yura ucupimi ricchachircani. Chaipimi cambac mamataca sajuarina nanai japirca. Chaipimi cambac mamaca canta sajuarirca.

Cusa cantashca Huarmi cantashca

⁶ Cambac shungupica sellota churaiyari. Cambac rigrapipish sellota churaiyari. Cuyaica huañui shina mana jarcaipacmi. Cuyana yuyaica Seol shina mana cacharicmi. Cuyaica carbón rupacuc shina rupacmi.

⁷ Chaitaca achca yacucunapish maita mana huañuchi pudinchu. Shinallatac jatun yacucunapish maita mana tucuchi pudinchu. Cuyaitaca tucui imalla charishcacunahuan randisha nishpapish mana pudinchu.

Huarmicuna cantashca

⁸ Chuchucunapish manarac huiñashca uchilla ñañatami charinchic. ¿Maijanpish paita cazarasha nicpica, imashi tucushun?

⁹ Pirca shina cacpica, paipac jahuapichari cullqui torreta ruhuanchicman. Pungu shina cacpica, cedro caspicunahuanchari tapashpa churanchicman.

Huarmi cantashca

¹⁰ Ñucaca pirca shinami cani. Ñuca chuchucunaca torrecuna shinami. Chaimantami ñuca cuyashcapac ñahuipica cushicuna cani.

¹¹ Salomonca Baal-hamón llactapimi uvas chagrata charirca. Chai chagratami cuidaccunaman cuidachun curca. Tucui paicunami huaranga cullquita apamuccuna carca.

¹² Ñuca uvas chagrataca ñucallatacmi cuidacuni. Salomonlla, huaranga cullquica cambac cachun. Ishcai patsac cullquica uvas pucushcata cuidaccunapac cachun.

Cusa cantashca

¹³ ¡Huerta chaupipi causac huarmilla, cambac rimashcata uyachiyari! ¡Ñuca ricsishcacunamanpish, ñucamanpish can rimashcata uyachiyari!

Huarmi cantashca

¹⁴ ¡Ñuca cuyashcalla, utca shamuiyari. Canca gacela animal shina, malta taruga shina, mishquiman ashnacuc urcucunata callpashpa utca shamuiyari!