CANTARES 7 - Dios Rimashcata Quillcashcami

Cusa cantashca

¹ ¡Mandacpac ushilla, cambac chaquica ushuta churarishca shina sumaimanami! Cambac changacunaca artesano ruhuashca shina mai sumacmi.

² Cambac pupuca mishquilla ashnacuc vino junda vaso shinami. Cambac huicsaca trigota montonashpa lirio sisacunata muyundita churashca shinami.

³ Cambac chuchucunaca ishcai huacharishca taruga shinami.

⁴ Cambac cungaca marfil torre shinami. Cambac ñahuicunaca Hesbón pueblopi Batra-bin pungupi tiyac yacu tanquecuna shinami. Cambac singaca Damasco puebloman ricuric Libanopi tiyac torre shinami.

⁵ Cambac umaca Carmelo urcu shinami. Cambac acchaca yana puca churana shinami. Chashna accha cashpami, jatun mandacpac shunguta shuhuashca.

⁶ Ñucata cushichic ñuca cuyashcalla, canca yallita cuyaipacmi cangui.

⁷ Cambac cuerpoca palmera yura shinami. Cambac chuchucunaca chai yurapac racimocuna shinami.

⁸ Ñucaca: «Palmeraman huichicushpa, chaipi pucushca granocunapi japirisha» nishpami yuyarcani. ¡Cambac chuchucunaca uvas racimo shina, cutin cambac shimica manzana shina mishquilla ashnacuc cachun!

⁹ Cambac shimica cambac cuyashcapac shimipi alli vino yaicucuc shina cachun. Shimitapish, quirutapish vino yaicuc shina cachun.

Huarmi cantashca

¹⁰ ¡Ñucaca, ñuca cuyashcapacmi cani! Paica tucui shunguhuanmi cuyan.

¹¹ Ñuca cuyashcalla, jacu pambacunapi purishun. Huasicuna tiyac llactapi jacu pacarishun.

¹² Tutamanta utca jatarishpa uvas chagraman rishun. Uvaspish ña sisashcata, ña sisa butushcata, granadacuna pucushcata jacu ricumushun. ¡Chaipimi ñuca cuyaitaca canman cusha!

¹³ Mandrangorapish ñami mishquilla ashnacun. Ñucanchic huasi pungupipish tucuilaya frutacunami tiyan. Ñuca cuyashcalla, sarunman japishca frutacunatapish, cunanlla pitishca frutacunatapish canman huacaichircanimi.