CANTARES 6 - Dios Rimashcata Quillcashcami

Cusandi huarmindi cuyanacushcamanta Huarmicuna cantashca

¹ Tucui huarmicunamanta sumac huarmilla, ¿cambac cuyashcaca maimantac rircayari? ¿Maitatac rircayari? Ñucanchicca canhuan mashcagrishunllami.

Huarmi cantashca

² Ñuca cuyashcaca paipac huertamanmi rirca. Mishquilla ashnacuc huertaman, paipac huertapi michingapac, Lirio sisacunata tandangapacmi rirca.

³ ¡Ñucaca, ñuca cuyashcapacmi cani! ¡Ñuca cuyashcaca ñucapacmi! Paica lirio sisacuna chaupipimi michin.

Cusa cantashca

⁴ Ñuca cuyashcalla, canca mai sumacmi cangui. Tirsa pueblo shinami cangui. Shinallatac Jerusalén pueblo shina munaipacmi cangui. Mana mishaipac catinacushpa shamuc soldadocuna shinami cangui.

⁵ Cambac ñahuihuan ñucata chapanata saquiyari. Ñami cambac ñahuihuanca ñuca shunguta shuhuashcangui. Cambac acchaca Galaad urcu quingraita urai shamucuc manada chivocuna shinami.

⁶ Cambac quirucunaca manada oveja armarishpa yacumanta llucshicuc shinami. Shucllapish mana saquirishpa tucui ovejacuna ishcai ishcaita huachashca shinami.

⁷ Cambac ñahuica telahuan tapashca chaupishca granada shinami.

⁸ Sucta chunga jatun mandac huarmicunami tiyan. Pusac chunga caishuc huarmicunami tiyan. Solteracunacarin mana yupaipacmi.

⁹ ¡Ashtahuanpish ñuca cuyashcaca sumaimana palomaca paillami! Paipac mamapacca paillami. Paita sajuaric mamapacca ashtahuan cuyashcami. Shuctac solteracuna paita ricushpaca: «Cushicui huarmi» nincunami. Jatun mandac huarmicunapish, caishuc huarmicunapish paicunapura parlashpaca:

Huarmicuna cantashca

¹⁰ «¿Pitac achicyachic shina ricuric, sumac quilla shina, inti achicyachic shina, macanacuita mishac soldadocuna shina llucshic huarmica?» nircacuna.

Huarmi cantashca

¹¹ Pugru pambapi huiñashca yuracunata, uvas huiñashcata, granada sisashcata ricungapacmi, nogal yuracunata tarpushca huertaman urai rircani.

¹² Chaimantaca mana yuyashcapimi, ñapish Aminadabpac carreta jahuapi cashcarcani.

Tucui mashna cantashca

¹³ ¡Cutimuilla, cutimuilla Sulamita! ¡Cutimuilla, cutimuilla ricushun ninchicmi! ¿Sulamitapica imatatac ricunguichic? ¡Carpacunapi shina danzachun!