CANTARES 5 - Dios Rimashcata Quillcashcami

Cusa cantashca

¹ Ñuca panilla, ñuca huarmilla, ñuca huertamanmi shamurcani. Ñuca mirratapish, mishquilla ashnacuctapish ñami japini. Bunga mishquitapish ñami micuni. Vinotapish, lechetapish ñami ubiani. Ñuca ricsishcacunalla, ñuca cuyashcacunalla, cushicushpa achcata micuichiclla, ubiaichiclla.

Raquirinaca mai llaqui cashcamanta Huarmicuna cantashca Huarmi cantashca

² Ñuca sueñucucpipish ñuca shunguca riccharacunmi. Ñuca cuyashca pungupi huactashpaca: «Ñuca panilla, ñuca cuyashcalla, ñuca urpilla, punguta pascaiyari. Ñuca umataca garuami jucuchicun. Ñuca acchamantaca yacumi shutucun» nishpami cayacushca carca.

³ Chashna cayacpica ñucaca: «Ñami churanata llucchircani. ¿Maitatac cutinca churarishayari? Ñami chaquicunatapish jahuarcani. ¿Maitatac cutinca mapayachishayari?» nircani.

⁴ Chaimantami ñuca cuyashcaca pungu jutcuta maquita satishpa, punguta pascasha nirca. Chaipimi ñuca shunguca saltarca.

⁵ Ñuca cuyashcata yaicuchingapacmi jatarishpa punguta pascagrircani. Ñuca maquicunamantaca mirrami shuturca. Aldabata pascacucpipish ñuca dedocunataca mirrami yacu shina callparca.

⁶ Ñuca cuyashcata yaicuchingapac punguta pascacpica, paica ñami rishca carca. Pai rimashcata uyashpaca, ñuca almaca catishpami llucshirca. Mashcashpapish mana tarircanichu, cayacpipish mana cutichircachu.

⁷ Pueblota cuidaccunami ñucahuan tuparca. Paicunami ñucata macashpa chugrichirca. Pircata cuidaccunami jahua churanatapish quichurca.

⁸ Jerusalenpi causac solteracunalla, ñuca cuyashcahuan tupashpaca: «Canta ricunayaihuanmi ungushca huañucun» ningapac ari nichicyari.

Cusata cuyac huarmimanta Huarmicuna cantashca

⁹ ¿Cambac cuyashcaca shuctac caricunamanta yallica imapitac ashtahuan alli ricurin? Tucui huarmicunamanta yalli sumac huarmilla, ñucanchic canhuan tupacpi can chashna huillachunca, ¿cambac cuyashcaca shuctac caricunamanta yallica imapitac ashtahuan alli ricurin?

Huarmi cantashca

¹⁰ Ñuca cuyashcaca yuranllami. Ñahuipish pucallami. Chunga huaranga runacunapac chaupipi cashpapish ricsillami.

¹¹ Paipac umaca ashtahuan alli curi shinami. Paipac acchaca cuervo animal shina yananlla crespo acchami.

¹² Paipac ñahuicunaca palomacuna lechepi armarishpa, yacu patapi tiyacuc shinami sumacyachishca can.

¹³ Paipac ñahuicunapish huertapi tiyac yuracuna shinami mishquillata ashnacun. Paipac shimica lirio sisamanta mishquilla ashnacuc mirra llucshicuc shinami mishquilla ashnacun.

¹⁴ Paipac maquicunaca curi sortejascunapi achic nicuc alaja rumita churashca shinami. Paipac huicsaca yuranlla marfilta zafiro rumicunahuan llutashca shinami.

¹⁵ Paipac changacunaca curi basapi mármol pilarcunata shayachishca shinami. Paica Líbano urcu shina jatunmi. Chai urcupi tiyac tucuita yalli cedro yuracuna shina sumacmi.

¹⁶ Paipac shimica mai mishquimi. Jerusalenpi causac solteracunalla, ñuca cuyashca, ñuca ricsishcapac shimica bunga mishqui shinami.