CANTARES 4 - Dios Rimashcata Quillcashcami

Huarmita cuyac cusamanta Cusa cantashca

¹ ¡Ñuca cuyashcalla, canca sumacmi cangui! ¡Canca sumacmi cangui! Cambac ñahuica quillparishca paño ucupica palomapac ñahui shinami. Cambac acchaca Galaad llacta urcu quingraita shamuc chivocuna shinami.

² Cambac quirucunaca, rutushca manada oveja armarishpa, yacumanta llucshicuc shinami. Shucllapish mana saquirishpa, tucui ovejacuna ishcai ishcaita huachashca shinami.

³ Cambac shimica puca puchca shinami. Cambac rimaipish ricsillami. Cambac ñahuica telahuan tapashca ucupica chaupishca granada shinami.

⁴ Cambac cungaca Davidpac macanacunata huacaichina torre shinami. Chaipica yallita sinchi soldadocunapac huaranga escudocunami huacaichishca tiyacun.

⁵ Cambac chuchucunaca ishcai huacharishca tarugacuna, lirio sisa chaupipi micucuc shinami.

⁶ Manarac achicyacpi manarac llandu pasaricpimi mirra urcuman, incienso lomaman risha.

⁷ Ñuca cuyashca huarmilla, canca sumacmi cangui. Canpica ima mana allica mana tiyanchu.

⁸ ¡Líbano urcumanta ñucahuan urai jaculla! ¡Ñuca novialla, Líbano urcumanta ñucahuan jaculla! Amana urcumanta, Cenir urcumanta, Hermón urcumanta uricuiyari. Leoncuna causana jutcumanta, leopardocuna causanamanta shamuiyari.

⁹ Ñuca panilla, ñuca cuyashca huarmilla, ñuca shunguta shuhuashcanguimi. Cambac ricuillahuanmi ñuca shungutaca shuhuarcangui. Cambac huallcahuanmi huatac shina aparcangui.

¹⁰ ¡Ñuca panilla, ñuca cuyashca huarmilla! Cambac cuyaica mai sumacmi. Cambac cuyaica vinotapish yalli mishquimi. ¡Can cahuirishca mishquilla ashnacucca tucui mishquilla ashnacucmanta yalli sumacmi!

¹¹ Ñuca cuyashca huarmilla, cambac shimimantaca bunga mishquimi llucshicun. Cambac callupica bunga mishquipish, lechepish tiyanmi. Cambac churanaca Libanomanta mishqui shinami ashnacun.

¹² Ñuca panilla, ñuca cuyashca huarmilla, muyundita jarcashca huerta shinami cangui. Tapashca yacu jundu shina, unanchishca yacu jundu shinami cangui.

¹³ Cambac retoñoca granada huerta shina. Chai yurapi pucuc grano shina mishquimi. Canca sisashca alheña, sisashca nardo huerta shinami cangui.

¹⁴ Shinallatac nardo shina, asafrán shina, ashnac huiru shina, canela shina, incienso, mirra yuracuna shina, áloes shina, tucuilaya mishquilla ashnacuc shinami cangui.

¹⁵ ¡Huertapi tucyacuc yacu shina, Libanomanta shamushpa, jundumanta llucshicuc yacu shinami cangui!

Huarmi cantashca

¹⁶ ¡Aquilón huaira jatariyari! ¡Austro huaira shamuiyari! ¡Ñuca huertata pucuiyari! ¡Mishquilla ashnacucta shic-huaiyari! ¡Ñuca cuyashcaca paipac huertamanmi shamucun! ¡Mishquilla frutacunata micuchun!