CANTARES 3 - Dios Rimashcata Quillcashcami

Huarmi cusata mashcagrishcamanta

¹ Ñuca shungu cuyashcataca tutacunami camapi mashcarcani. Mashcashpapish mana tarircanichu.

² Chashna mana tarishpaca: «Cunanca jatarishpa, puebloman rishpa ñuca shungu cuyashcataca ñancunapi, plazacunapi mashcagrisha» nishpami yuyarcani. Mashcashpapish mana tarircanichu.

³ Pueblota cuidaccunahuanmi tuparcani. Paicunataca: «¿Manachu ñuca shungu cuyashcata ricurcanguichic?» nircani.

⁴ Paicunamanta ashata caruyashpaca, ñuca shungu cuyashcahuan tuparcanimi. Paihuan tupashpaca japishpa mana cacharishpami, ñucata sajuaric mamapac huasiman pusharishpami yaicuchircani.

Cusa cantashca

⁵ ¡Jerusalenpi causac solteracunalla, gacela animalcunamanta, tarugamanta ari nichicyari! ¡Ñuca shungu cuyashcataca amatac ricchachinguichicchu! Ima horascamanpish samarichun saquinguichiclla.

Bodapi canamanta Huarmicuna cantashca

⁶ ¿Pi huarmitac chai pambata tucuilaya ashnacuc polvohuanpish, inciensohuanpish, mirrahuanpish cahuirishpa mishquilla ashnacuc puyu shina shamucunyari?

⁷ ¡Riquichic, chaica Salomonpac carretami! Chai carretataca yallita sinchi sucta chunga Israel soldadocunami cuidashpa shamucun.

⁸ Tucui paicunaca espadahuan cancuna. Macanacunatapish alli yachaccunami. Paicunaca tuta ima manchachinamantami cinturapi espadata apashca cancuna.

⁹ Jatun mandac Salomonmi Libanomanta apamushca caspihuan paipac carretata ruhuachirca.

¹⁰ Chai carretaca cullqui pilarcunamantami carca. Huasha ayudarinaca curimantami carca. Tiyarinataca pucalla lienzohuanmi ruhuachirca. Chaitaca Jerusalenpi causac solteracunami cuyaihuan sumacta bordarca.

¹¹ ¡Sionpi causac solteracunalla, jatun mandac Salomonta ricungapac llucshichicyari! Paipac shungu cushicui punzhapi, pai cazarai punzhapi, paipac mama churachishca coronata churashcami shamucun.