CANTARES 2 - Dios Rimashcata Quillcashcami

Huarmi cantashca

¹ Ñucaca Sarón pambapi tiyac rosas sisami cani. Pambapi tiyac lirio sisami cani.

Cusa cantashca

² Ñuca cuyashcaca solteracunapac casha chaupipi lirio sisa shinami.

Huarmi cantashca

³ Ñuca cuyashcaca mosocunapac chaupipica, sacha chaupipi manzana yura shinami. Cambac llandupi tiyarinataca yallitami munani. Chai yura pucushcaca ñuca shimipica mishquimari.

⁴ Paica jatun micui ucumanmi aparca. Paipac cuyaica ñucataca bandera shinami taparca.

⁵ Paita cuyashcamanta ungushcami cani. Chaimanta pasasta caraichicyari, manzanata carashpa cushichichicyari,

⁶ Paipac lluqui rigraca ñuca umatami samachin. Cutin alli rigrahuanca ucllanmi.

Cusa cantashca

⁷ ¡Jerusalenpi causac solteracunalla, gacela animalcunamanta, tarugacunamanta ari nichicyari! ¡Ñuca cuyashcataca amatac ricchachinguichicchu! ¡Ima horascamanpish samarichun saquinguichiclla!

Huarmi cantashca

⁸ ¡Ñuca cuyashca rimashcami uyarin! Paica urcu urcuta, loma lomata saltashpami shamucun.

⁹ Ñuca cuyashcaca taruga shina, mana cashpaca maltón gacela shinami. Riquichic, paica ñucanchic pirca huashapimi ventanamanta chapacun. Ventanapi churashca caspi huashamantami chapacun.

¹⁰ Ñuca cuyashca rimashpaca: «Ñuca cuyashca sumac huarmilla jatarishpa shamuiyari.

¹¹ Ñami tamya punzhacunaca llucshishca. Tamya punzhacunaca tucurishcami.

¹² Pambapica sisacunami huiñashca. Cantana punzhacunami chayamushca. Ñucanchic llactapica cutinllatacmi urpicuna huacashca uyarin.

¹³ Higo yuracunapish ñami pucushca. Uvas chagra sisacunapish, sumactami ashnacun. ¡Ñuca cuyashca sumac huarmilla, jatarishpa shamuiyari!

¹⁴ Rumi quingrai jutcupimi, jahua urcu pacallapi miticuc ñuca palomitalla, cambac ñahuita ricuchiyari. Can rimashcata uyachiyari. Can rimashca shimica mishquillami uyarin. Cambac ñahuipish sumaimanami ricurin» nirca.

Huarmipish, cusapish cantashca

¹⁵ Ñucanchic uvas chagrata tucuchic malta añascunata japimui, chagrata tucuchicunmi, uvas chagraca cunan sisacunllami.

Huarmi cantashca

¹⁶ Ñuca cuyashcaca ñucapacmi, ñucaca paipacmi cani. Paica lirio sisa chaupipimi michicun.

¹⁷ Ñuca cuyashcalla, manarac pacaricpi, manarac punzhayacpi utca cutimuiyari. Beter lomacunata huahua cerba shina, maltón taruga shina callpamuiyari.