CANTARES 1 - Dios Rimashcata Quillcashcami

Cazarashca huarmipish, Jerusalenpi causac solteracunapish cantashcamanta

¹ Cai cantoca tucui cantocunamanta yalli sumacta Salomón ruhuashca cantomi.

Huarmi cantashca

² ¡Cambac shimihuan ñucata muchaiyari! Cambac cuyaica mishqui vinotapish yalli sumacmi.

³ Cambac shutica mishquilla ashnacucta tallishca shinami. Chaimantami carihuan manarac chayarishca solteracunaca cuyan.

⁴ Ñucata pushaiyari. Cantaca catishpa callpashunllami. Jatun mandacmi paipac huasiman aparca. ¡Canhuanca yallita sumacta cushicushun! Can cuyashcataca, vinotapish yallimi yuyaricushun. Chaimantami cantaca cuyancuna.

Huarmicuna cantashca Huarmi cantashca

⁵ Jerusalenpi causaccunalla, ñucaca yana cashpapish sumacmi cani. Cedar llacta carpa huasicuna shina, Salomonpac lienzo paño shina sumacmi cani.

⁶ Yana cashcamanta ama ricuracuichicchu. Ñucataca intimi yanayachirca. Ñuca mamapac huahuacunami ñucata piñashpa, uvas chagrata cuidachun churarca. Chaimantami ñucapac uvas chagrataca mana cuidarcani.

⁷ Ñuca tucui shunguhuan cuyashcalla, ¿maipitac ovejacunata michinguiyari? Chaupi punzhaca, ¿maipitac ovejacunata samachinguiyari? Cambac ricsishcapac ovejacunahuan mana chingarishpa purisha ninichu. Chaimanta huillaiyari.

Cusa cantashca

⁸ Tucui huarmicunamanta yalli sumac huarmilla, can mana yachashpaca, oveja sarushcata ricushpa michina chuclla cuchuman cati rishpa, chaipi cambac malta chivocunata michiyari.

Cusa cantashca

⁹ Ñuca cuyashcalla, canca Faraonpac carretacunata aisac huarmi caballocuna shinami cangui.

¹⁰ Cambac ñahuica zarcillocuna chaupipica mai sumacmi ricurin. Cambac cungapish huallca chaupipica sumacmi ricurin.

¹¹ Cullqui botón churashca curi zarcillotami, canman ruhuachishun.

Huarmi cantashca

¹² Jatun mandac mizapi tiyaricpica, ñuca nardoca mishquillatami ashnacurca.

¹³ Ñuca cuyashcaca ashalla mirrata ñuca pechopi churashca shinami.

¹⁴ Ñuca cuyashcaca En-guedi pueblopi tiyac, uvas chagra chaupipi huiñashca alheña sisa shinami.

Cusa cantashca

¹⁵ ¡Ñuca cuyashcalla, canca yallita sumacmi cangui! Canca yallita sumaimanami cangui. Cambac ñahuicunaca ishcai palomacuna shinami.

Huarmi cantashca

¹⁶ ¡Ñuca cuyashcalla, canca yallita munana sumacmi cangui!

Cusa cantashca

¹⁷ Ñucanchic camaca sisacuna mandashcami, huasi vigacunaca cedro, ciprés caspicunami.