APOCALIPSIS 9 - Dios Rimashcata Quillcashcami

¹ Pichcaniqui ángel tocacpica jahua pachamanta cai pachaman shuc lucero urmactami ricurcani. Chai luceromanca jatun jutcuta pascana llavetami curca.

² Chai jatun jutcuta pascacpica, jatun hornomanta shinami achca cushni llucshishpa intitapish, punzhatapish amsayachirca.

³ Chai cushnimantaca langostacuna llucshishpami, tucui allpa jahuata purirca. Chai animalcunamanca alacrancuna shina millai cana podertami curca.

⁴ Chashna cushpaca, allpapi tiyac quihuatapish, yuracunatapish, tucui imapish verdicllacunataca ama imata ruhuachunmi mandarca. Ashtahuanpish Diospac sellota frentepi mana charic gentecunatami llaquichichun cacharca.

⁵ Shina cashpapish huañuchichunca mana cacharcachu, ashtahuanpish alacrán canishpa nanachic shina, pichca quillacaman llaquichichunmi cacharca.

⁶ Chai punzhacunapica ima shinapish huañunatami gentecunaca yuyanga. Shina yuyacushpapish mana huañungacunachu. Paicuna huañuita munacucpipish, huañuica mana chayangachu.

⁷ Chai langostacunaca macanacuiman ringapac allichirishca caballocuna shinami carca. Umacunapica curi coronacunata churashcami carca. Cutin ñahuicunaca gentecunapac ñahui shinami carca.

⁸ Acchaca huarmicunapac accha shina, cutin quirucunaca leonpac quirucuna shinami carca.

⁹ Churanaca fierro churana shina, alascunaca macanacuipi achca carretacunata caballocuna aisacpi huacac shinami huac nicurca.

¹⁰ Chai langostacunaca alacrán shina chupacunapi tucsina agujacuna apashcami carca. Chai agujacunaca pichca quillacaman nanachicmi carca.

¹¹ Chaicunataca jatun jutcuta jatun mandac angelmi mandacurca. Chai angelca hebreo rimaipica Abadón, cutin griego rimaipica Apolión shutimi carca.

¹² Punta llaquica ña tucurinmi. Shina cashpapish ishcaica tiyanracmi.

¹³ Suctaniqui ángel tocacpica, Diospac ñaupapi cac chuscu gachuyuc curi altarmanta shuc rimashca uyarishpami,

¹⁴ cornetata charicuc suctaniqui angeltaca: «¡Eufrates yacu patapi huatashca chuscu angelcunata cachari!» nirca.

¹⁵ Shina nicpimi chuscu angelcunata cacharishpaca, cai pachapi causac gentecunata quimsapi chaupishcamanta shuc parteta huañuchichun cacharca. Chai angelcunaca chai pacha, chai punzha, chai quilla, chai huata huañuchichun nishcatacmi carca.

¹⁶ Chaimantaca: “Caballopi cac soldadocunaca ishcai pasac junumi can” nictami uyarcani.

¹⁷ Ñucaca caballocunatapish, chaipi tiyacuccunatapish muscuipi shinami ricurcani. Chaicunaca zafiro shina azul, azufre shina quillu nina shina jagan nicuc fierrohuan pechota jarcarishcami carcacuna. Caballocunapac umaca leonpac uma shinami carca. Shimimantaca ninapish, cushnipish, azufrepish llucshicurcami.

¹⁸ Chai ninahuan, cushnihuan, azufrehuan, quimsa jatun llaquicunahuanmi, cai pachapi causac quimsapi chaupishcamanta shuc parte gentecunata huañuchirca.

¹⁹ Chai caballocunaca shimihuanpish, chupacunahuanpish llaquichircami. Chai chupacunaca culebrapac uma shinami carca. Chaicunahuanmi gentecunataca yallita llaquichirca.

²⁰ Cai llaquicunahuan llaquichicucpi mana huañuc gentecunaca, mana allita ruhuanataca mana saquircachu. Ashtahuanpish supaicunatapish, curimanta, cullquimanta, rumimanta, broncemanta, caspimanta ruhuashca mana uyac, mana ricuc, mana puric dioscunatami adorashpa catircacuna.

²¹ Shinallatac huañuchinatapish, brujianatapish, huacllirinatapish, shuhuanatapish mana saquircacunachu.