APOCALIPSIS 8 - Dios Rimashcata Quillcashcami

Canchisniqui sellota pascashcamanta

¹ Pactalla Oveja canchisniqui sellota pascacpica, chaupi hora shinatami jahua pachapica chunlla carca.

² Chai quipaca canchis angelcuna Diospac ñaupapi shayacuctami ricurcani. Paicunamanca canchis cornetatami curcacuna.

³ Chai quipaca shuc angelmi curimanta ruhuashca inciensota churanahuan shamushpa, altar chaquipi shayarirca. Chai angelca Diospaclla caccuna mañashcacunahuan mirarichunmi achca inciensota, mandashpa tiyarinapac ñaupapi cac curi altarpi Diosman curca.

⁴ Incienso rupashcapish, Diospaclla caccuna Diosta mañashcapish, Diospac ñaupamanmi angelpac maquimantaca rirca.

⁵ Chai quipa incienso churanata ángel japishpaca, altarpi tiyac nina brazasta jundachishpami cai pachaman shitarca. Chashna shitacpica, urcucuna tulun nishca, rimashcacuna, relampacuna achic nishca, shinallatac allpa chucchuimi tiyarca.

Angelcuna cornetacunapi tocashcamanta

⁶ Chai canchis angelcunaca paicuna charicushca canchis cornetapi tocangapacmi allichirirca.

⁷ Puntaniqui ángel tocacpica, yahuarhuan chapushca nina, rundumi urmarca. Chashna urmashpami cai allpataca quimsapi chaupishcamanta shuc parteta yuracunandi, quihuacunandi rupachirca.

⁸ Ishcainiqui ángel tocacpica, mama cucha yacumanmi shuc jatun urcu rupacuc shina urmarca. Shina urmacpica, mama cucha yacuca quimsapi chaupishcamanta shuc partemi yahuar tucurca.

⁹ Chashna tucucpica, mama cuchapi cac barcocunapish, chaipi causac animalcunapish quimsapi chaupishcamanta shuc partemi tucurirca.

¹⁰ Quimsaniqui ángel tocacpica, shuc rupacuc jatun luceromi jagan nishpa jahua pachamanta quimsapi chaupishcamanta shuc parte callpacuc yacucunapi, tucyacuc yacucunapi urmarca.

¹¹ Chai luceroca Jayac shutimi carca. Chaimantami yacucunataca quimsapi chaupishcamanta shuc parteta jayacyachirca. Chai yacuta ubiashpaca, achca gentecunami huañurca.

¹² Chuscuniqui ángel tocacpica, quillapish, intipish, lucerocunapish quimsapi chaupishcamanta shuc partemi amsayarca. Chaimantami quimsapi chaupishcamanta shuc parte punzhapish, tutapish mana achicyarca.

¹³ Chai quipaca shuc cóndor jahuata volashpa puricuctami ricurcani. Shina puricushpa sinchita rimashpaca: «¡Cai pachapi causaccunalla! ¡Caishuc quimsa angelcuna tocacpica, aij, imachari tucunga!» nircami.