APOCALIPSIS 7 - Dios Rimashcata Quillcashcami

Patsac chuscu chunga chuscu huaranga israelcunata chicanyachishcamanta

¹ Chai quipaca cai pacha chuscu ladopi chuscu angelcuna shayacuctami ricurcani. Chaicunaca cai pacha allpatapish, mama cuchatapish, ima yuracunatapish ama huaira huactachunmi, chuscu ladopi jarcashpa shayacurca.

² Shinallatac inti llucshic ladomanta shuc ángel shamuctami ricurcani. Paica causac Diospac sellotami charicurca. Chai angelmi mama cucha yacutapish, cai pachatapish huacllichingapac poderta charic chuscu angelcunata sinchita caparirca. Paica:

³ «Ñucanchic Diospacta ruhuaccunapac frentepi sellota churangacaman cai pacha allpatapish, mama cucha yacutapish, ima yuratapish ama imata ruhuanguichicchu» nirca.

⁴ Chai quipaca: “Israelpac chunga ishcai huahuacuna mirarishcapuramanta, pasac chuscu chunga chuscu huaranga sellota churashcacunami tiyan” nictami uyarcani.

⁵ Chaicunaca Judapac aillupuramanta chunga ishcai huaranga, Rubenpac aillupuramanta chunga ishcai huaranga, Gadpac aillupuramanta chunga ishcai huaranga,

⁶ Aserpac aillupuramanta chunga ishcai huaranga, Neftalipac aillupuramanta chunga ishcai huaranga, Manasespac aillupuramanta chunga ishcai huaranga,

⁷ Simeonpac aillupuramanta chunga ishcai huaranga, Levipac aillupuramanta chunga ishcai huaranga, Isacarpac aillupuramanta chunga ishcai huaranga,

⁸ Zabulonpac aillupuramanta chunga ishcai huaranga, Josepac aillupuramanta chunga ishcai huaranga, shinallatac Benjaminpac aillupuramanta chunga ishcai huaranga sellota churashcacunami carca.

Yuranlla churanata churashca achcacunata ricushcamanta

⁹ Chai quipaca mana yupaipac tucuilaya gentecuna tucui llactacunamanta, tucui aillucunamanta, tucuilaya rimaita rimac gentecunatami ricurcani. Paicunaca mandashpa tiyarinapac ñaupapi, Pactalla Ovejapac ñaupapi yuranlla churanata churarishca, maquipica ramoscunahuan shayacuctami ricurcani.

¹⁰ Chaicunaca: «¡Mandashpa tiyarinapi tiyacuc ñucanchic Diospish, Pactalla Ovejapish ñucanchicta quishpichircami!» nishpami, sinchita caparicurcacuna.

¹¹ Tucui angelcunaca mandashpa tiyarinapac, yuyaccunapac, shinallatac chuscu causaita chariccunapac muyundictami shayacurcacuna. Paicunaca mandashpa tiyarinapac ñaupapi Diosta alli ningapac pambacaman cumurishpaca:

¹² «¡Chashna cachun! Ñucanchic Diosca sumac cashcamanta, yachac cashcamanta, alli nishca cashcamanta, imatapish ruhuaclla cashcamanta, jatun cashcamantami, huiñaicaman alli nishpa pagui ninchic. ¡Chashna cachun!» nicurcacuna.

¹³ Shina cacpimi chai yuyaccunapuramanta shucca: «Chai yuranlla churanata churashcacunaca, ¿picunatac, maimantatac shamushca?» nishpa, ñucaman tapurca.

¹⁴ Shina tapucpimi ñucaca: «Amito, canllatacmi yachangui» nircani. Shina nicpi paica: «Chaicunaca jatun llaquimanta mishaccunami, shinallatac Pactalla Ovejapac yahuarhuan paicunapac churanata tacshashpa yuranlla tucushcacunami.

¹⁵ Chaimantami Diosta mañana huasipi, Dios mandashpa tiyarinapac ñaupapi tutapish, punzhapish paipacta ruhuancuna. Mandashpa tiyarinapi tiyacucmi paipac carpa huasipi paicunataca huacaichinga.

¹⁶ Yarcaihuanpish yacunayaihuanpish ña mana llaquita apangacunachu. Intipish, shuctac ima rupachiccunapish mana rupachingachu.

¹⁷ Ashtahuanpish mandashpa tiyarina chaupipi cac Pactalla Ovejami michinga. Paillatacmi huiñai causaita cuc yacumanpish pushanga. Shinallatac paicunapac ñahuicunamantaca Diosmi tucui huiquita pichanga» nirca.