APOCALIPSIS 6 - Dios Rimashcata Quillcashcami

Canchis sellocunata pascashcamanta

¹ Chai quipaca chai Pactalla Oveja canchispi sellashcamanta shucniqui sellota pascactami ricurcani. Shinallatac chai chuscu causaita chariccunamanta shucmi urcu tulun nic shina sinchita rimashpaca: «¡Shamui!» nicta uyarcani.

² Shina nicpi ñuca ricushpaca, yuranlla caballotami ricurcani. Chai caballopac jahuapi tiyacucca shuc arcotami apashca carca. Paiman coronata cucpimi, atishpa mishangapac llucshirca.

³ Ishcainiqui sellota Pactalla Oveja pascacpica, chai causaita chariccunamanta ishcainiqui rimashpaca: «¡Shamui!» nictami uyarcani.

⁴ Chaimantaca shuc puca caballomi llucshirca. Chai caballopi tiyacucmanca cai pachapi sumac causaita anchuchishpa, caishuc chaishucta macanacuchishpa huañuipi churana poderta cushpami shuc jatun espadatapish curca.

⁵ Quimsaniqui sellota Pactalla Oveja pascacpica, chai causaita chariccunamanta quimsaniqui rimashpaca: «¡Shamui!» nictami uyarcani. Chaimantaca shuc yana caballotami ricurcani. Chai caballopi tiyacucca paipac maquipi shuc balanzatami charicurca.

⁶ Chai chuscu causaita chariccunapac chaupimanta shuc rimashpaca: «Ishcai libra trigollami shuc punzha trabajoca valinga. Shinallatac sucta libra cebadapish shuc punzha trabajollatacmi valinga. Shina cacpipish aceiteta, vinota ama imata ruhuanguichicchu» nishcatami uyarcani.

⁷ Chuscuniqui sellota Pactalla Oveja pascacpica, chai causaita chariccunamanta chuscuniqui rimashpaca: «¡Shamui!» nictami uyarcani.

⁸ Chaimantaca shuc quillu caballotami ricurcani. Chai caballo jahuapi tiyacucpac shutica Huañui nishcami carca. Cutin paita catishpa llucshicca Ucu Pacha nishcami carca. Paicunaca cai pachata chuscupi chaupishca shuc parte gentecunata macanacuihuan, ungüicunahuan, yarcaihuan, shinallatac cai pachapi cac animalcuna canishcahuan huañuchic cana podertami chasquirca.

⁹ Pichcaniqui sellota Pactalla Oveja pascacpica, Diosmanta allita huillashcamanta huañuchishcacunapac almacuna altar ucupi cactami ricurcani.

¹⁰ Chaimanta sinchita caparishpaca: «Tucuita Mandac, jucha illac Dioslla, allpa pachapi causaccunataca, ¿ima punzhacamantac ñucanchicta huañuchishcamantaca taripashpa llaquichigringuiyari?» nircacuna.

¹¹ Chashna nicpimi paicunaman yuranlla churanata cushpaca: «Cancuna shinallatac Jesucristopacta ruhuaccuna cashcamanta mashnacuna huañuna cashca pactangacaman, ashata samaricuichiclla» nictami uyarcani.

¹² Suctaniqui sellota Pactalla Oveja pascacpica, allpami ima mundota chucchurca. Chaipica intipish yana churana shinami yana tucurca, quillapish pucayashpami yahuar shina tucurca.

¹³ Shinallatac huaira sinchita cuyuchicpi yuramanta higocuna urmac shinami, jahua pachamanta cai pachaman lucerocunapish urmarca.

¹⁴ Jahua pachaca shuc papelta tandac shinami tucui chingarirca. Urcucunapish, yacu chaupipi cac allpacunapish maipi cashcamanta tucuimi cuyurirca.

¹⁵ Shinallatac cai pachata jatun mandaccunapish, soldadocunata jatun mandaccunapish, chayuccunapish, jatun pushaccunapish, serviccunapish, mana serviccunapish, tucuimi urcupi tiyac rumi jutcucunapi, shinallatac machaicunapi miticugrircacuna.

¹⁶ Chaipimi paicunaca urcucunatapish, rumicunatapish rimashpaca: «Mandashpa tiyarinapi tiyacucpac ñaupamanta, shinallatac Pactalla Oveja piñarishpa jatun llaquita cachanamantapish, ¡ñucanchic jahuapi urmashpa pacaichicyari!

¹⁷ Paicuna yallita piñarishpa llaquichina punzhami shamushca. ¿Chai llaquita apanataca pitac pudingayari?» nircacuna.