APOCALIPSIS 3 - Dios Rimashcata Quillcashcami

Sardis pueblopi cac tandanacushca criccunaman huillashcamanta

¹ Sardis pueblopi cac tandanacushca criccunata ricuc angelman quillcai: “Diospac canchis Espirituta shinallatac canchis lucerota charicucca: Ñucaca can imata ruhuacushcata, shinallatac causacunimi nicushpapish huañushca shina cashcataca yachanimi.

² Can ima ruhuashcacunapish ñuca Diospac ñaupapica mana alli cashcatami ricuni. Chaimanta cambac allita ruhuana munai manarac tucuricpi, riccharic shina cutin jatarishpa, maipi mana alli ruhuacushcata allichi.

³ Callaripi ima shina yachacushcata, uyashcata cazushpa, Diosman cutirishpa catirai. Can mana chashna ruhuacpica can mana yuyashca horasmi shuhua shina cambacman shamusha.

⁴ Shina cashpapish Sardis pueblopi causac cancunapurapica, ashallacunami churanacunata mana mapayachishcacunaca tiyan. Paicunaca japina cashcamantami, ñucahuan yuranlla churana churashca puringacuna.

⁵ Maijanpish millaita mishacca, yuranlla churana churashcami canga. Paipac shutitapish causaiman rina libropi quillcashcataca mana anchuchishachu, ashtahuanpish ñuca Taitapac, shinallatac paipac angelcunapac ñaupapimi paitaca ñucapacmi nisha.

⁶ Maijanpish ringrita charicca, Diospac Espíritu tandanacushca criccunaman ima nicushcata uyachun” ninmi.

Filadelfia pueblopi cac tandanacushca criccunaman huillashcamanta

⁷ Filadelfia pueblopi cac tandanacushca criccunata ricuc angelman quillcai: “Mandac Davidpac llaveta charicuc, pi mana pascaipacta huichcac, pi mana huichcaipacta pascac, cashcata ruhuac jucha illacca:

⁸ Ñucaca can imata ruhuacushcataca tucuimi yachani. Chaimantami cambac ñaupapica pi mana huichcaipac punguta shina ñucamanta huillachunca pascashpa churashcani. Mana tucuita ruhuaipac cashpapish, ñuca nishcata pactachishcanguimi, shinallatac ñucata mana ricsinichu ninatapish mana nishcanguihu.

⁹ Ñucaca Satanaspac tandanacuimantami maijan manapish israelcuna cashpa, ‘israelcunami canchic’ nishpa llullaccunataca cambac ñaupapi cungurichisha. Chashna ruhuacpimi ñuca canta cuyashcataca yachangacuna.

¹⁰ Mana piñaric alli shungu cai nishpa ñuca mandashcata pactachinata mana saquishcamantami shamuc punzhapi cai pachapi causaccunata ima shina cashcata ricungapac llaquicuna shamucpica, cantapish huacaichisha.

¹¹ Canman ñuca cusha nishcata ama pi quichuchun, ñucata catirangui. Ñucaca ñallami shamusha.

¹² Maijanpish millaita mishacmanca, ñuca Diosta mañana huasi ucupi cac pilar shina canatami cusha. Chaimantaca jaicapi mana llucshingachu, shinallatac paipica ñuca Diospac shutitapish, ñuca Diospac pueblopac shutitapish quillcashami. Chaica jahua pacha Diospacmanta shamuc mushuc Jerusalenmi canga. Shinallatac paipica ñucapac mushuc shutitapish quillcashami.

¹³ Maijanpish ringrita charicca, Diospac Espíritu tandanacushca criccunaman ima nicushcata uyachun” ninmi.

Laodicea pueblopi cac tandanacushca criccunaman huillashcamanta

¹⁴ Laodicea pueblopi cac tandanacushca criccunata ricuc angelman quillcai: “Dios-huan cai pachapi tucui ima tiyashcatapish ruhuac, imatapish cashcata nic, imatapish pactachic, shinallatac chashna cachunca nicca:

¹⁵ Ñucaca can imata ruhuacushcataca tucuimi yachani. Canca chiripish, rupacpish mana canguichu. Cantaca chiri cachun, mana cashpaca rupac cachunmi munani.

¹⁶ Shina cacpipish rupacpish, chiripish mana cashcamanta ashtahuanpish cunuclla cacpimi shungu tigrasha.

¹⁷ Canca, ñucaca chayucmi cani, imapish mana illanchu, tucuipimi alli ricuni nicunguimi. Ashtahuanpish imatapish mana charic, lluchulla, ñahui mana ricuc, misa, pipish mana cuyashca cashcataca mana yachanguichu.

¹⁸ Chaimantami ñucaca, ninapi rupachishca curita ñucamanta randishpa chayucyai, lluchulla pingaipi cashcata ama pi ricuchun, yuranlla churanata randishpa churari, ñahui alli ricuchunpish, jambita randishpa churari nini.

¹⁹ Ñucaca tucui cuyashcacunatami rimani, shinallatac llaquichini. Chaimanta can juchayuc cashcamanta llaquirishpa Diosman cutirishpa, Diospaclla cai.

²⁰ Ñucaca huasiyuc nishpami pungupi huactashpa shayacuni. Maijanpish ñuca rimashcata uyashpa punguta pascacpica, paipacman yaicushpa paihuan micushami, paipish ñucahuan micungami.

²¹ Ima shinami millaita ñuca mishashpa ñuca Taita mandashpa tiyarinapi paihuan mandangapac tiyarircani, chai shinallatacmi maijanpish millaita mishacmanca ñucahuan mandachun ñuca mandashpa tiyarinapi ñucahuan tiyarichun cusha.

²² Maijanpish ringrita charicca, Diospac Espíritu tandanacushca criccunaman ima nicushcata uyachun” ninmi.