APOCALIPSIS 21 - Dios Rimashcata Quillcashcami

Jahua pachapish, cai pachapish mushuc tucushcamanta

¹ Chai quipaca ñaupaman cac jahua pachapish, cai pachapish shinallatac mama cucha yacupish chingaricpica, jahua pachatapish, cai pachatapish mushuc cashcatami ricurcani.

² Shinallatac jahua pacha Diospac ñaupamanta Diospaclla cac mushuc Jerusalén pueblo, novia cusahuan tupangapac allichirishca shina urai shamucuctami ricurcani.

³ Mandashpa tiyarinamanta sinchita shuc rimashca uyarishpaca: «Cunanca Diospac carpa huasica gentecunapac chaupipimi causacun. Paicunahuanmi tucui causaipi causanga. Paicunaca Diospac huahuami canga. Diosllatacmi paicunahuanca causanga.

⁴ Paica tucui huiquitami ñahuicunamantaca pichanga. Huañuipish, llaquilla canapish, huacaicunapish, nanaicunapish ña mana tiyangachu. Ñaupaman ima tiyashcapish cunanca ña mana tiyangachu» nirca.

⁵ Chai quipaca mandashpa tiyarinapi tiyacucca: «Ñucaca tucuitami mushucta ruhuani» nirca. Shinallatac paica: «Quillcai, cai ñuca rimashcacunaca chashna pactanatac, shinallatac mana llullachu» nirca.

⁶ Chai quipaca ñucataca: «¡Ñami tucui pactachishca! Ñucaca callari A shina, tucuri Z shinami tucuita callarichicpish, tucuchicpish cani. Maijanpish yacunayaita charicmanca, huiñai causaita cuc tucyacuc yacutami yanga ubiachisha.

⁷ Maijanpish millaita mishacca pai japina cashcatami japinga. Ñucaca paipac Diosmi casha, shinallatac paipish ñucapac huahuami canga.

⁸ Ashtahuanpish manchaccunaca, mana criccunaca, millaicunaca, huañuchiccunaca, huainayaccunaca, brujiaccunaca, ruhuashcalla dioscunata adoraccunaca, shinallatac tucui llullaccunaca azufrehuan rupacuc nina cuchapimi shitashca canga. Chaica quipa huañuimi can» nirca.

Mushuc Jerusalenmanta

⁹ Chai quipaca canchis tucurina llaquicunata copapi charicuc, chai canchis angelcunapuramanta shuc ángel shamushpami ñucataca: «Shamui, Pactalla Ovejapac huarmi cana novia allichishcata ricuchisha» nirca.

¹⁰ Diospac Espíritu ñucata japicpimi chai angelca shuc jatun urcu jahuaman pushashpa, jahua pacha Diospac ñaupamanta Diospaclla cac Jerusalén pueblo urai shamucucta ricuchirca.

¹¹ Chai puebloca Diospac sumaimana achiclla cashcahuanmi jagan nicurca. Valishca jaspe rumi shina, vidrio shina jagan nicucmi carca.

¹² Chai pueblo muyundictaca jahuacaman jarcashca, chunga ishcai pungutami charirca. Tucui chai pungucunapimi shuc ángel carca. Shinallatac pungucunapica Israelpac chunga ishcai aillucunamanta shuc aillupac shutita quillcashcami carca.

¹³ Quimsa punguca inti llucshic ladoman, quimsa punguca inti yaicuc ladoman, quimsa punguca ura ladoman, cutin quimsa punguca jahua ladomanmi carca.

¹⁴ Chai pueblota jarcac callari pircaca, chunga ishcai rumicuna jahuapimi carca. Chai rumicunapica, Pactalla Ovejapac chunga ishcai acllashca huillaccunapac shuticunami quillcashca carca.

¹⁵ Ñucahuan parlanacuc angelca pueblotapish, pungucunatapish, muyundi jarcashcatapish medina curi varatami charicurca.

¹⁶ Chai puebloca sunimanpish, anchomanpish chai shinallatacmi carca. Ángel varahuan medishpaca, ishcai huaranga ishcai pasac kilometrotami llucchirca. Sunimanpish, anchomanpish, jahuamanpish chai shinallatacmi carca.

¹⁷ Shinallatac muyundi jarcashcata medishpaca, gentecuna medishca shinallatacmi sucta chunga pichca metrota llucchirca.

¹⁸ Chai muyundi pircashcaca jaspe rumihuanmi pircashca carca. Cutin chai puebloca llambuclla vidrio shina curimanta ruhuashcami carca.

¹⁹ Chai pueblota jarcac callari pircacunaca tucuilaya valishca rumicunahuanmi allichishca carca. Shucniquipica jaspe, ishcainiquipica zafiro, quimsaniquipica ágata, chuscuniquipica esmeralda,

²⁰ pichcaniquipica ónice, suctaniquipica cornalina, canchisniquipica crisólito, pusacniquipica berilo, iscunniquipica topacio, chunganiquipica crisopraso, chunga shucniquipica jacinto, shinallatac chunga ishcainiquipica amatista rumimi carca.

²¹ Chai chunga ishcai pungucunaca chunga ishcai perlacunami carca. Cada pungumi shuclla perlasmanta ruhuashca carca. Chai pueblopi cac jatun ñanca llambuclla vidrio shina curimanta ruhuashcami carca.

²² Chai pueblopica tucui poderta charic Mandac Diospish, shinallatac Pactalla Ovejapish Diosta mañana huasi shina cashcamantami, chaipica Diosta mañana huasitaca mana ricurcani.

²³ Chai pueblotaca Dios pai sumaimana cashcahuan, shinallatac Pactalla Oveja lámpara shina achicyachicucpimi, intipish, quillapish achicyachingapacca mana tiyana carca.

²⁴ Chai pueblo achicyachicpimi, tucui llactacunapi causaccunaca achicpi puringacuna. Shinallatac cai pachapi causac jatun mandaccunapish tucui ima charishcacunatami chaimanca apangacuna.

²⁵ Chai pueblopi tuta mana tiyacpi punzhalla cacpimi, pungucunapish jaicapi mana huichcaringa.

²⁶ Chaimanca tucui llactacunamantami ima sumaccunatapish, ima charishcacunatapish apangacuna.

²⁷ Chai pueblomanca juchayuccunapish, millaita ruhuaccunapish, llullaccunapish mana yaicungachu. Ashtahuanpish Pactalla Oveja charicuc, huiñaita causangapac rina libropi shutita quillcachishcacunallami yaicunga.