APOCALIPSIS 18 - Dios Rimashcata Quillcashcami

Jatun Babilonia pueblo tucurishcamanta

¹ Chai quipaca mai poderta charic, shuc ángel jahua pachamanta urai shamucuctami ricurcani. Chai ángel paipac sumaimana cashcahuan achicyachicpimi, cai pachaca punzha shina achicyarca.

² Chai ángel sinchita caparishpaca: «¡Babilonia jatun puebloca tucui urmashcami! Cunanca supaicuna, millai espiritucuna, shinallatac piñana millanayai volashpa puric animalcuna causana pueblomi tucushca.

³ Tucui llactacunapi causaccunami vinota ubiashpa machac shina, chai pueblota catishpa huacllirishcacuna. Cai pachapi tiyac jatun mandaccunapish paihuanmi huainayarcacuna. Shinallatac chai pueblo yallita chayucyanata munashcamantami, tucui llactacunamanta catushpa randishpa causaccunaca yallita chayucyashcacuna» nirca.

⁴ Cutinllatac jahua pachamanta shuc rimashca uyarishpaca: «¡Ñuca acllashca huahuacunalla! Paicunahuan pacta mana llaquichishca cangapac, paicuna shina mana juchata ruhuangapacca, chai pueblota shitashpa llucshichic.

⁵ Paicunapac juchacunaca ashtahuan ashtahuan mirarishpami, jahua pachacaman chayashca. Shinallatac tucui paicunapac juchata ricushpami, Diosca llaquichinata yuyarishca.

⁶ ¡Chai pueblotaca pai llaquichishca shinallatac llaquichichic! ¡Pai shuc cutinhuan llaquichishca cacpica, ishcai cutinhuan llaquichichic! ¡Shinallatac pai imata ruhuashcamantaca, chaupihuan yallita ruhuaichic! ¡Ubianatapish pai ubiachishcamanta, ishcai cutinhuan yallita chapushpa ubiachichic!

⁷ Pai jatun tucushpa munashcata ruhuashpa, cushicushpa causashcamantaca, ¡chai shinallatac llaquichichic! Paica paipac shungupica: ‘Jatun mandac huarmi shinami tiyacuni. Cusa illacpish mana canichu, shinallatac llaquillapish mana canichu’ nishpami niricun.

⁸ Chaimantami shuc punzhallapi paita llaquichic llaquicunaca japinga. Chai llaquicunaca huañuipish, huacaipish, shinallatac yarcaimi canga. Mandac Dios imatapish ruhuaclla cashcamantami, paitaca juchanchishpa ninahuan rupachinga» nirca.

⁹ Paihuan huainayashpa, munashcata ruhuashpa cushicuc cai pachapi tiyac jatun mandaccunaca, chai pueblo rupashpa cushni llucshicucta ricushpami chai pueblomanta llaquirishpa yallita huacangacuna.

¹⁰ Paita llaquichicushcata ricushpa, manchaihuan carupi saquirishpaca: «¡Tucuimanta yalli jatun pueblolla! ¡Aij, aij, cungaillami canta llaquichina pachaca chayamun!» ningacunami.

¹¹ Tucui llactacunamanta catushpa randishpa causaccunapish, pipish paicunapac catunacunata mana randiccuna tiyashcamantaca, chai pueblomanta llaquirishpami yallita huacangacuna.

¹² Chai catunacunaca curi, cullqui, sumac rumicuna, perlascunami carca. Shinallatac valishca lienzo, seda, morado, puca pañocunami carca. Shinallatac tucuilaya mishquilla ashnacuc caspicuna, marfilmanta ruhuashcacuna, sumac caspimanta ruhuashcacuna, broncemanta ruhuashcacuna, fierromanta ruhuashcacuna, marmolmanta ruhuashcacunami carca.

¹³ Shinallatac canela, mishquilla ashnacuccuna, incienso, mirra, mishquiman ashnacuc jambicuna, vino, aceite, cutashca harina, trigo, aparic animalcuna, ovejacuna, caballocuna, carretacuna, amopacta ruhuac gentecunami carca.

¹⁴ Shinallatac chai pueblotaca: «Can mai munashca micunacunataca ña mana charinguichu. Can tucui chai sumaimana charishcacunaca huiñaipacmi chingarishca» ningacuna.

¹⁵ Chai pueblopi catushpa randishpa chayucyaccunaca chai llaquichicushcata ricushpami manchaihuan yallita huacashpa carupi saquiringacuna.

¹⁶ Chashna saquirishpaca: «¡Aij, aij, jatun pueblolla! Canca sumaimana lino nishca morado, shinallatac puca churanata churarishca sumac huarmi shinami carcangui. Shinallatac curihuanpish, sumaimana rumicunahuanpish, perlascunahuanpish allichishcami carcangui.

¹⁷ Cai tucui charishcacunaca shuc ñahui quimllaillapimi tucui tucurishca» ningacunami. Barcopi riccunapish, barcota purichiccunapish, barcota purichicta mandaccunapish, yacupi imata ruhuashpa causaccunapish chaimanta carupimi shayarircacuna.

¹⁸ Chai jatun pueblo rupacushcamanta cushni llucshicucta ricushpaca: «¿Cai jatun pueblo shinaca maijan pueblotac tiyangayari?» nishpami caparircacuna.

¹⁹ Shina nishpaca, mai llaquirishpa yallita huacashpami, ñuto allpata umapi churashpa: «¡Aij, aij, jatun pueblolla! Can charishcacunamantami mama cucha yacupi barcota chariccunaca chayuc tucushcacuna. Shina cashpapish shuc ñahui quimllaillapimi tucui tucurishca» nishpami caparircacuna.

²⁰ ¡Chai pueblota tucuchishcamantaca Diospaclla caccunapish, Jesusmanta huillachun acllashcacunapish, Diosmanta ñaupa huillaccunapish, shinallatac jahua pachapi tucui causaccunapish cushicuichic! Cancunata llaquichic cashcamantami Diosca chai pueblotaca chashna llaquichishca.

²¹ Chai quipaca mai poderta charic shuc ángel shamushpami shuc rumita japirca. Chai rumica cutana jatun rumi shinami carca. Chaita japishpa mama cucha yacuman shitashpaca: «Chai shinallatacmi Babilonia jatun pueblolla, chingarishpa jaicapi mana ricuringui.

²² Flautapi tocashcapish, arpapi tocashcapish, cornetapi tocashcapish, shinallatac maijan cantashcapish cambac callecunapica jaicapi mana uyaringachu. Tucui imata ruhuashpa causaccunapish jaicapi mana tiyangachu. Cutana rumi huacashcapish mana uyaringachu.

²³ Achicyachic luzpish jaicapi mana tiyangachu. Cazarashpa cushicuipish mana tiyangachu. Catushpa randishpa causaccunapish maimi chayucyashcacuna. Canca brujiashpami tucui llactacunapi causaccunatapish llullashpa umashcangui.

²⁴ Canpimi Diosmanta ñaupa huillaccunapac, Diospaclla caccunapac, shinallatac tucui cai pachapi causaccunapac, huañuchishca yahuarca taririrca» nirca.