APOCALIPSIS 15 - Dios Rimashcata Quillcashcami

Tucurina canchis llaquicunata angelcuna charicushcamanta

¹ Cutinllatacmi jahua cielopica shuctac jatun mancharinata ricurcani. Chaipica tucurina canchis llaquicunatami canchis angelcuna charicurca. Chai llaquicunahuanmi Diospac piñaica ña tucurigricurca.

² Shinallatac cristalman riccha jatun cucha yacu, ninahuan chapushcatami ricurcani. Chai yacu cucha patapica manchana animaltapish, paiman ricchatapish mishashpa, paipac shuti yupaitapish mana chariccuna Dios cushca tocana arpacunata apashpa shayacuctami ricurcani.

³ Chaipica Diospacta ruhuac Moisespac cantota, shinallatac Pactalla Ovejapac cantotapish cashna nishpami cantacurcacuna: «¡Tucui imatapish ruhuac Mandac Dioslla! Can tucui ima ruhuashcacunaca sumaimana jatunmi. ¡Tucui llactacunata Mandac Dioslla! Canca imatapish allita, shinallatac imapish cashcallatami ruhuangui.

⁴ ¡Mandac Dioslla! ¿Pitac cantaca mana manchangayari? ¿Pitac cantaca mana alli ningayari? Canllami jucha illac cangui. Chaimantami tucui llactacunapi causaccuna shamushpa, cantaca alli ningacuna. Can ruhuashcacunaca tucuimi alli ricurishca» nicurcacuna.

⁵ Chai quipaca jahua pachapi cac, ari nishcata ricuchic Diosta mañana carpa huasi pascarictami ricurcani.

⁶ Chai Diosta mañana huasimantaca, canchis angelcunami canchis llaquicunata apashca llucshirca. Paicunaca linomanta ruhuashca jagan nicuc churanata churashca, shinallatac pechopica curimanta ruhuashca chumbita churashcami carca.

⁷ Chai chuscu causaita chariccuna puramanta shucca, huiñaicaman causacuc Dios piñarishpa llaquichinatami curimanta ruhuashca canchis copapi jundachishpa, canchis angelman curca.

⁸ Diosca imatapish ruhuangapac poderta charishcamanta shinallatac sumaimana achiclla cashcamantaca, cushnimi Diosta mañana huasipica jundarca. Shina cacpimi canchis angelcuna canchis llaquicunahuan llaquichinata tucuchingacaman, chaimanca pipish mana yaicui pudirca.