AMÓS 9 - Dios Rimashcata Quillcashcami

Dios llaquichicpica, pipish mana quishpirinamanta

¹ Mandac Dios altar jahuapi shayacuctami muscuipi shina ricurcani. Paica: «¡Umbralcuna urmachun, pilarpi tiyac capitelcunapi huactai! Chai pungucunapish tucuipac jahuapi urmashpa ñuturichun cuyuchi. Maijanpish mana uyactaca espadahuanmi huañuchisha. ¡Chaimanta miticushpa rishpapish, shucllapish mana quishpiringachu!

² Seolcaman jutcushpa miticucpipish, chaimantami ñuca maquihuan llucchisha. Jahua pachaman huichai ricpipish, chaimantami uricuchisha.

³ Carmelo urcupi miticucpipish, mashcashpami tarisha. Ñuca ñahuimanta miticushpa, mama cuchaman yaicucpica, culebratami canichun cachasha.

⁴ Paicunata piñaccuna prezushpa charicucpipish, espadahuan huañuchichunmi cachasha. Ñucaca paicunaman allita ruhuangapac ricunapac randica, llaquichingapacmi ricusha» nirca.

⁵ Tucuita Mandac Dios cai pachapi tuparicpica, cai pachaca yacuyangami. Cai pachapi causaccunaca llaquirishpami huacanga. Cai pachaca jatun yacu shina miraricpica, Egipto jatun yacu shinami ashalla tucunga.

⁶ Mandac Diosmi jahua pachapi huasichicun. Cai pacha callari rumitaca caipimi churashca. Paimi mama cuchata tandachishpa, allpa jahuapi shitacun. ¡Paica Mandac Diosmi!

⁷ Mandac Diosca: «Israelcunalla, cancunaca ñuca ñaupapica, ¿manachu Etiopía llactapi causaccuna shina canguichic? ¿Manachu cancunataca Egiptomanta llucchimurcani? ¿Manachu filisteocunataca Caftor llactamanta, cutin arameocunataca Quir llactamanta llucchimurcani?» ninmi.

⁸ Mandac Diosca: «Juchayuc llactataca piñacunimi. Chaimantami cai llactapi causaccunataca llaquinayaita llaquichishpa tucuchisha. Shina llaquichishpapish, Jacobopac huahua huahuacunataca mana tucui tucuchishachu.

⁹ Israelcunataca tucui llactacunapi, harneropi shushuc shina ruhuachunmi mandasha. Chashna ruhuacpica, shuc granollapish mana allpaman urmangachu.

¹⁰ Ñuca acllashcapuramanta: “Llaquicunaca mana ñucanchicpacman shamungachu, shinallatac chai llaquicunaca mana japingachu” nic, juchayuc runacunataca espadahuanmi huañuchinga» ninmi.

Israelcunata cutin allichinamanta

¹¹ Mandac Diosca: «Chai punzhapica Davidpac carpa huasi urmashcataca cutinmi allichishpa shayachisha. Pirca chictarishcatapish, urmashcatapish allichishpami shayachisha. Chashna tucuita allichishpami, ñaupa punzhacunapi cashca shinallatac paicunata allichisha.

¹² Chashna ruhuacpimi, ñuca shutipi mañancuna. Edom llacta asha saquirishcatapish, tucui llactacunatapish, paicuna japinga. Chaitaca pactachishami. Chaitaca Mandac Dios ñucami nini.

¹³ Chai punzhaca ñami pactamun. Manarac tucui cosechacpimi, yapuna punzhacuna chayamun. Shinallatac uvasta manarac tucui pallacpimi, trigota tarpuna punzhaca chayamun. Llullu vinoca yacu shinami urcucunapipish, lomacunapipish talliringa. Chaitaca Mandac Dios ñucami nini.

¹⁴ Ñuca acllashca israelcuna prezumanta cutichimushami. Paicuna cutichimucpimi, urmashca llactacunata allichishpa causanga. Paicunaca uvasta tarpushpaca vinota ubiangacunami. Huerta ruhuashpaca, chaipi pucushca micungami.

¹⁵ Paicunapac allpallapitacmi tarpuc shina causachun churasha. Ñuca paicunaman cushca allpamantaca mana pitic shina anchuchishachu. Chaitaca cancunata Mandac Dios ñucami nini» ninmi.