AMÓS 7 - Dios Rimashcata Quillcashcami

Quimsa cutin llaquichinata muscuipi shina ricushcamanta

¹ Caitami Mandac Diosca muscuipi shina ricuchirca. Jatun mandacpac quihuata pitishca quipa, cutin quihua retoñacucpimi, achca langosta Mandac Dios achca langostacunata cachacucta ricurcani

² Chai langostacuna tucui llactapi quihuata micushpa tucuchicpimi ñucaca: «¡Mandac Dioslla, cunanca paicuna mana allita ruhuashcata perdonaiyari! Jacobopac huahua huahuacunataca, ¿pitac ayudangayari? Paicunaca uchillami» nircani.

³ Shina nicpimi, Mandac Diosca llaquirishpaca: «Mana chashna cangachu» nircami.

⁴ Mandac Diosca caitapish ricuchircami. Mandac Dios ninahuan llaquichishpa, taripangapac tandachicuctami ricurcani. Chai ninami mama cuchatapish, llacta achca allpatapish rupachircani.

⁵ Chaimantami ñucaca: «¡Mandac Dioslla, cai ninataca cunanllata huañuchiyari! Jacobopac huahua huahuacunataca, ¿pitac ayudangayari? Paicunaca uchillami» nircani.

⁶ Chaimantami Mandac Diosca llaquirishpaca: «Mana chashna cangachu» nirca.

⁷ Mandac Diosca caitapish ricuchircami. Mandac Dios plomadahuan ruhuashca pirca jahuapi shayacuctami ricurcani. Paica albañilpac plomadatami charicurca.

⁸ Mandac Dios chaita ricuchishpaca: —Amós, ¿imatatac ricucungui?— nirca. Shina tapucpimi ñucaca: —Albañilpac plomadatami ricucuni— nircani. Shina nicpimi, Mandac Diosca: —Cai albañilpac plomadahuanmi ñuca acllashca israelcunataca ricugrini. ¡Paicunataca mana ashtahuan llaquishachu!

⁹ Isaacpac, israelcunapac dioscunata yuyarina altarcunaca tucuringami. Paicunapac dioscunapac huasicunaca shitashca pambami saquiringa. Jerobopac aillutaca espadahuanmi huañuchisha— nirca.

Amosmantapish, Amasiasmantapish

¹⁰ Chaimantami Bet-elpi causac Amasías curaca israelcunata jatun mandac Jeroboamman huillachun cachashpaca: «Amosmi israelcunapac chaupipi canta piñashpa jatarishca. ¡Pai huillashcataca cai llactapi causaccunaca ña mana ashtahuan uyasha ninchu!

¹¹ Chai Amosca: “Jeroboamtaca espadahuanmi huañuchinga. Israelcunatapish paicunapac llactamanta prezumi apanga” ninmi ningui» nirca.

¹² Chaimantami Amasiasca Amostaca: —Dios ricuchishcata huillac caimanta llucshishpa, Judá llactallaman ri. Chaipi Dios huillashpa micunatapish charigri.

¹³ Ama ashtahuan Bet-elpi huillaichu. Caipimi jatun mandacca Diosta mañan. Cai llactaca llactata mandana jatun llactami— nirca.

¹⁴ Shina rimacpimi, Amosca Amasiastaca: —Ñucaca, mana Dios ima nishcata huillacchu cani, mana huillacpac churichu cani. Ashtahuanpish huagrata michishpa, sacha higota pallacmi cani.

¹⁵ Shina cacpipish, Mandac Diosmi ñuca huagrata michicucpi cayashpaca: “Ñuca ima nishcata ñuca acllashca israelcunaman huillagri” nirca.

¹⁶ Cunanca Mandac Dios ima nishcata uyai. Canca ñucataca: “Ama israelcunata llaquichishpa huillaichu. Ama Isaacpac huahua huahuacuna llaquichishpa parlaichu” ninguimi.

¹⁷ Chaimantami Mandac Diosca: “Cambac huarmica caipimi cullquimanta huainayanga. Cambac churicunatapish, ushicunatapish espadahuanmi huañuchinga. Cambac allpatapish chaupingami. Canca juchahuan mapayashca llactapimi huañungui. Israelcunataca paicunapac llactamantami caru llactaman prezu apanga” ninmi— nirca.