AMÓS 6 - Dios Rimashcata Quillcashcami

Mana cazuc israelcunata tucuchinamanta

¹ ¡Sionpi cushilla causaccunalla, Samaria urcupi imatapish mana manchashpa causaccunalla! Tucui llactamanta ashtahuan alli nishca mandaccunami canguichic. Chaimantami israelcunaca cancunapacman shamun.

² Cancunaca Calne llactaman rishpa ricuichic. Chaimantaca Hamat llactaman richic. Chai quipaca filisteocuna causana Gat llactaman richic. Cancunaca, ¿chai llactacunata yallichu canguichic? ¿Chai llactacunata atishpa, ashtahuan jatun llactapichu causanguichic?

³ Cancunaca “Llaqui punzhaca mana shamungachu” yuyarircanguichicmi. Shina cashpapish, llaqui punzhamanmi cuchuyacunguichic.

⁴ Marfil camacunapimi sueñunguichic. Maltón cari ovejacunata, maltón huira animalcunatami micunguichic.

⁵ Arpapi tocashpami cantanguichic. David shinami, ima tocanacunata ruhuanguichic.

⁶ Vinotapish jatun vasocunapimi ubianguichic. Valishca mishquilla ashnacuc-huanmi cahuiringuichic. Josepac huahua huahuacuna llaquita tucushcataca mana llaquinguichicchu.

⁷ Cunanca, prezu riccunapac ñaupatami ringuichic. Chashna ricpimi, cancunapac munashcata ruhuashpa cushicunaca tucuringa.

⁸ Tucuita ruhuac, tucuita Mandac Dios paipac shutipi ari nishpaca: «Jacobopac jatun tucushca huahua huahuacunataca mana ricunayachinichu. Mandashpa tiyana huasicunatapish millanayanmi. Chaimantami chai llactataca chaipi tucui tiyaccunandi, paicunata piñaccunapac maquipi churasha» ninmi.

⁹ Chai punzhapica chunga runacuna shuc huasipi saquirishpaca huañungami.

¹⁰ Chai huañushcataca shuc aillullami tucuita tandachinga. Shinami huasimanta tullucunata llucchishpa rupachinga. Chai huasi ucupi cac runataca: «¿Manachu maijanpish canhuan saquirirca?» ningami. Shina nicpimi, chai runaca: «¡Mana pipish saquirircachu!» ningami. Shina nicpica: «Upalla cai, Mandac Diospac shutitaca mana rimanachu» ningami.

¹¹ Mandac Diosmi jatun huasicunata urmachichun, chai huasi pircacunatapish urmachichun mandanga.

¹² ¿Caballocunaca rumi quingraita callpanchu? ¿Mama cuchata yuntahuan yapunchu? ¡Cancunaca allita ruhuashpa causanataca venenota shinami ruhuashcanguichic! ¡Cashcata ruhuashpa causanataca jayac ajenjota shinami ruhuashcanguichic!

¹³ Cancunaca yangami cushicushpa: «Lodebar llactataca ñucanchic alli yachac cashcamantami mandacunchic» ninguichic.

¹⁴ Chaimantami tucuita Mandac Diosca: «Israelcuna uyaichic. Cancunata llaquichichunca shuctac llactatami jatarichisha. Chai llactaca Lebo-hamat llactaman yaicunamanta Arabá llacta jatun yacu ladocamanmi llaquichinga» ninmi.