AMÓS 5 - Dios Rimashcata Quillcashcami

Diospacman llaquirishpa cutirinamanta

¹ Israelcunalla, ñuca rimashcata uyaichicyari. Cancunamanta huacashcata uyaichicyari.

² ¡Carihuan manarac chayarishca soltera shina israelcunaca, jaicapi mana cutin jataringapacmi urmashca! Pipish mana jatarichishcami pambapi siricun.

³ Mandac Diosca israelcunataca: «Macanacungapac huaranga runacunahuan llucshishpaca, patsacllahuanmi cutinga. Cutin patsac runacunahuan llucshishpaca, chungallahuanmi cutimunga» ninmi.

⁴ Chashna cacpipish, Mandac Diosca israelcunataca: «Ñucapacman shamuichic, causanguichicmi.

⁵ Bet-elmanpish, Gilgalmanpish ama yaicunguichicchu. Beersebamanpish ama pasaichicchu. Gilgalpi causaccunataca prezu apangami. Bet-el llactaca tuñishcami canga» ninmi.

⁶ Mandac Diospacman cuchuyaichic, causanguichicmi. Pacta Josepac huahua huahuacuna shina, ninapi rupanguichicman. Pacta pipish ninata mana huañuchicpi, Bet-el llacta tucui rupanman.

⁷ ¡Cancunaca cashcata ruhuanataca jayac ajenjota shina ruhuashpami, imapacpish mana valichinguichic!

⁸ Pléyades, Orión lucerocunatapish ruhuac Mandac Diospacman cuchuyaichic. Paimi tutataca punzhata, punzhataca amsata ruhuan. Paimi mama cucha yacuta cayashpa, allpapi tallin. ¡Paipac shutica Mandac Diosmi!

⁹ Paica, sinchi runacunata tucuchishpa, muyundita jatun pircahuan pircashca plazatapish urmachinmi.

¹⁰ Cancunaca llacta pungupi cunac runatapish, cashcata rimactapish mana ricusha nishpa millarcanguichicmi. ¡Aij imachari tucunguichic!

¹¹ Huacchacunata llaquichishpami, impuestotaca carga trigota japircanguichic. Chaimanta labrashca rumicunahuan ruhuashca huasipipish, mana causanguichicchu. Sumac uvas chagrata charishpapish, mana vinota ubianguichicchu.

¹² Ñucaca cancuna yallita mana cazushcatapish, yalli millaita ruhuashcacunatapish, cashcata ruhuac runata llaquichishcatapish, imata pacalla japishcatapish, juezcunapac ñaupapi huacchacuna japinata quichushcatapish yachanimi.

¹³ Chai punzhacuna mana alli cashcamanta alli yuyaiyuc runaca upallami.

¹⁴ ¡Mana alli ruhuanapac randica, alli ruhuanata munaichic! Chashna ruhuashpaca causanguichicmi. Cancuna nishca shinallatacmi tucuita Mandac Diosca cancunahuan canga.

¹⁵ Mana alli ruhuanata millanayachishpa, allita ruhuanata munaichic. Taripashpaca, cashcata ruhuaichic. Chashna ruhuacpi, tucuita Mandac Diosca maijan saquirishca Josepac huahua huahuacunata llaquingapishchari.

¹⁶ Tucuita Mandac Diosca: «Tucui plazacunapimi huacai tiyanga. Tucui ñancunapimi: “¡Aij, aij!” nishpa huacanga. Trabajac runacunatapish, allita huacanata yachaccunatapish huacachunmi cayanga.

¹⁷ Ñuca cancunapac chaupita pasacucpica, tucui uvas chagracunapimi huacai tiyanga.

¹⁸ ¡Aij, Mandac Dios shamuna punzhata shuyaccunalla! Pai shamuna punzhaca achic canapac randica tutami canga. ¿Imapactac Mandac Dios shamuna punzhata shuyanguichic?

¹⁹ Chai punzhapica leonta manchashpa callpacushpaca, osohuanmi tupanga. Huasiman yaicushpa, pircapi tuparishpaca, culebrapimi taunallinga.

²⁰ ¿Manachu Mandac Dios shamuna punzhaca achic canapac randica, pura tuta canga? Puyu tutayashcami canga. Achicca mana tiyangachu.

²¹ Cancunapac jatun fiestacunataca millanayachishpami, mana ricunayachircani. Cancunapac jatun tandanacuicunahuanca mana cushicushachu.

²² Ñucaman animalta cushpa tucui rupachicpipish, ofrendata cucpipish, mana chasquishachu. Ñucahuan alli tucungapac huira animalta ñucaman cucpica, ricunallatapish mana ricushachu.

²³ Tocaccunatapish ñuca ladomanta anchuchichic. Chai tocashcacunaca mana uyasha ninichu.

²⁴ Ashtahuanpish allita mandanaca yacu shina callpacuchun. Cashcata ruhuanaca mana tucuric callpacuc yacu shina cachun.

²⁵ Israelcunalla, cancuna shitashca pambapi chuscu chunga huatata puricushpaca, ¿ñucaman animalta cushpa huañuchircanguichicchu? ¿Ofrendatapish curcanguichicchu?

²⁶ Ashtahuanpish Moloc, Quiún dioscunatami ñucata yuyarina huasimanca huandushpa aparcanguichic. Cancuna ruhuashca lucerocunatami aparcanguichic.

²⁷ Chaimantami cancunataca Damascomanta ashtahuan chimbaman apachun saquisha. Chaitaca Mandac Dios ñucami nini» ninmi. Paipac shutica tucuita Mandac Diosmi.