AMÓS 4 - Dios Rimashcata Quillcashcami

¹ Mandac Diosca: «Basán llacta huirayashca vacacuna shina Samariapi causac huarmicunalla, caita alli uyaichic. Cancunaca huacchacunata, imata mana chariccunata sarushpami llaquichinguichic. Cutin cancunapac cusacunataca: “¡Vinota apamushpa machashunchic!” ninguichicmi» ninmi.

² Mandac Dios, paipac jucha illac shutipi ari nishpaca: «Cancunata llaquichina punzhacunami chayamun. Chai punzhacunapica cancunataca ganchohuanmi aisashpa ringa. Cancunapac huahua huahuacunataca challuata japina anzuelohuanmi japinga.

³ Chai punzhapica, pirca jutcutami catinacushpa llucshinguichic. Mandashpa tiyana huasicunamanmi shitashca canguichic. Chaitaca Mandac Dios ñucami nini» ninmi.

Llaquichicpipish israelcuna mana yuyaita japinamanta

⁴ Mandac Diosca: «¡Bet-elman rishpa juchallichiclla! ¡Gilgalpi Dios ñucata mana cazugrichiclla! ¡Tutamanta animalta cushpa huañuchichiclla! ¡Cada quimsa punzhapi, chungamanta shucta cunguichiclla!

⁵ ¡Ñucata pagui nishpa, levadurahuan ruhuashca tandata cuichiclla! ¡Quiquin munaimanta ofrendata cushcata tucuiman huillaichiclla! ¡Israelcunalla, cancunaca chaita ruhuanatami ashtahuan munanguichic!

⁶ Ñucami tucui cancunapac llactacunamanta micunata anchuchircani. Chaimantami ima micunapish mana tiyarca. Shina cacpipish, mana ñucapacman cutirircanguichicchu.

⁷ Cosechangapac quimsa quilla faltacpimi, tamyata jarcarcani. Shuc llactapi tamyachishpapish, caishuc llactapica mana tamyachircanichu. Shuctac chagrapi tamyacucpish, shuctac chagraca usyaihuami tucui chaquirca.

⁸ Chaimantami ishcai, quimsa llactacuna shuc llactaman yacuta mañangapac shamun. Shina mañashpapish mana yacunayaitaca pasachircachu. Chashna llaqui tiyacpipish, cancunaca mana ñucapacman cutirircanguichicchu.

⁹ Cancuna tarpushcataca sinchi huairahuan, langostacunahuan llaquichicucpipish, cancunapac achca huertacunata, uvas chagrata, higo yuracunata, olivos yuracunataca tucuchicucpipish, mana ñucapacman cutirircanguichicchu. Chaitaca Mandac Dios ñucami nini.

¹⁰ Egipto llactata llaquichishca shina llaquichicpipish, cancunapac churicunata jatun macanacuita cachashpa huañuchicpipish, cancunapac caballocunata cancunata piñaccuna prezushpa aparicpipish, achca soldadocuna huañushpa ismushca ashnacucpipish cancunaca mana ñucapacman cutirircanguichicchu.

¹¹ Sodomata, Gomorrata llaquichishca shina, yallita llaquichicpi, cancuna mana tucui rupashca caspi shina cashpapish, mana ñucapacman cutirircanguichicchu. Chaitaca Mandac Dios ñucami nini.

¹² Israelcunalla, chaimantami cancunataca chashna llaquichisha. Chaimanta cancunata Mandac Dios ñucahuan tupangapac allichirichic» ninmi.

¹³ Paica urcucunatapish, huairatapish ruhuac, runacunamanpish, pai imata yuyaricushcata huillacmi. Paimi, tutatapish punzhayachin. Paica cai pachapi tucui urcucunatami purin. ¡Paica, tucuita Mandac Dios shutimi!