AMÓS 3 - Dios Rimashcata Quillcashcami

Mandac Dios llaquichinamanta

¹ Israelcunalla, Egiptomanta llucchimuc, cancunata Mandac Dios rimarishcata uyaichic. Paica:

² «Cai pachapi causacpuramantaca cancunallatami ñucaca acllarcani. Chaimantami cancuna mana allita ruhuashcamantaca llaquichisha» ninmi.

³ Shuc runa manarac shuc yuyailla tucushpaca, ¿shuc runaca, shuc runahuan ishcai tucushpa puringachu?

⁴ Leonca, ¿sachapi manarac animalta japishpaca huacangachu? Huahua leonca, ¿jutcupi mana aicha tiyacpica huacangachu?

⁵ Volac animalca, ¿manapish tucllata tiyacpica, japi tucungachu? Tucllaca, ¿manapish imata japishpa huichaiman cuyuringachu?

⁶ Llactapi cornetapi manarac tocacpi, ¿gentecunaca mancharishpa caparingachu? Mandac Dios manarac llaquichicpi, ¿llactapi llaqui tiyangachu?

⁷ Mandac Diosca, pai ima nishcata huillac, paita serviccunaman manarac huillashpaca mana llaquichingachu.

⁸ León huacacpica, ¿pitac mana mancharinga? Mandac Dios rimacpica, ¿pitac mana huillanga?

Samaria llactata tucuchinamanta

⁹ Asdod llactapi, Egipto llactapi mandashpa tiyana huasicunapipish huillashpaca: «¡Samaria urcupi tandanacushpa, chai llacta llaqui tucushcata, chaipi causaccuna llaquilla causacushcata ricuichicyari!» nichic ninmi.

¹⁰ Mandac Diosca: «Paicunaca imatapish mana allita ruhuanata yachanchu. Macashpa quichushcallatami, paicunapac mandashpa tiyana huasicunapi jundachin.

¹¹ Chaimantami chai llactataca piñaccuna muyushpa shayaringa. Sinchi torretapish urmachingami. Mandashpa tiyana huasicunamantapish tucui shuhuashpa apangami. Chaitaca Mandac Dios ñucami nini» ninmi.

¹² Mandac Diosca: «Samariapi causac israelcunaca ñutunlla tiyarinacunapi, cama esquinapimi tiyarin. Paicunaca shuc michic leonpac shimimanta ishcai oveja chaquita mana cashpaca, ringrita quichushca shinami, ashalla saquiringa» ninmi.

¹³ Tucuita Mandac Diosca: «Uyaichic, Jacobopac huahuacunata llaquichinata huillaichic.

¹⁴ Israel ñucata mana cazushcamantami llaqui punzhapica Bet-elpi tiyac altarcunatapish tucuchisha. Chai altar esquinacunapi cac gachucunatapish paquishpami pambaman urmachisha.

¹⁵ Shinallatac tamya punzhacunapi, usyai punzhacunapi causana huasicunatapish urmachishami. Marfilhuan ruhuashca huasicunapish tucuringami. Achca huasicunami llaquinayaita tucuringa. Chaitaca Mandac Dios ñucami nini» ninmi.