AMÓS 2 - Dios Rimashcata Quillcashcami

¹ Mandac Diosca: «Moab llactapi causaccunataca, catipi quimsa cutin, chuscu cutin juchallishcamanta llaquichinataca manatac saquishachu. Paicunaca Edom llactata jatun mandacpac tullucunataca uchupa tucungacamanmi rupachirca.

² Chaimantami Moab llactapica ninata japichisha. Chai ninami Queriot llactata mandashpa tiyana huasicunatapish tucui rupachinga. Chashnami Moab llactapi causaccunaca cornetata tocacpica, caparinacushpa tucui huañunga.

³ Paicunapac jueztaca paicunapac chaupimanta anchuchishpami, caishuc mandaccunandi huañuchisha. Chaitaca Mandac Dios ñucami nini» ninmi.

⁴ Mandac Diosca: «Judá llactapi causaccunataca, paicuna catipi quimsa cutin, chuscu cutin juchallishcamanta llaquichinata manatac saquishachu. Paicunaca Mandac Dios ñuca mandashcata yangami churashpami, pai yachachishcacunatapish mana cazurca. Paicunapac ñaupa taitacunapac dioscunata catishpami pandarirca.

⁵ Chaimantami Judá llactapica ninata japichisha. Chai ninami Jerusalenpi mandashpa tiyana huasicunatapish tucui rupachinga» ninmi.

Israelcunata juchanchishpa llaquichinamanta

⁶ Mandac Diosca: «Israelcunataca catipi quimsa cutin, chuscu cutin juchallishcamanta llaquichinataca manatac saquishachu. Paicunaca cashcata ruhuac runataca cullquipimi catun. Huaccha runataca ishcai ushutahuanmi cambian.

⁷ Huacchacunataca ñuto allpata shinami sarun. Humilde gentecunatapish pandachincunami. Taitapish, churipish, chai solterallahuantac chayarishpami, jucha illac ñuca shutitaca mapayachin.

⁸ Prendashca churanacunapimi maijan altar ladopipish sueñun. Prendamanta cushca vinotami paicunapac dioscunapac huasipi ubiancuna.

⁹ Ñucami amorreocunataca paicunapac ñaupapi tucuchircani. Paicunaca cedro yura shina jatun, encina yura shina sinchimi carca. Shuc yurata pucushcandi, sapindi tucuchic shinami, paicunataca tucuchircani.

¹⁰ Ñucami cancunataca Egiptomanta llucchishpa, amorreocuna causana llactata cungapac, shitashca pambata chuscu chunga huatacunata pushamurcani.

¹¹ Ñucami cancunapac churicunapuramanta ñuca ima nishcata huillacta, cutin cancunapac quipa huiñaimantaca nazareo runacuna cachun acllarcani. Israelcunalla, ¿manachu caica chashna?

¹² Ashtahuanpish cancunaca nazareo runacunamanmi vinota ubiachircanguichic. Cutin ñuca ima nishcata huillaccunataca: “¡Ama huillaichicchu!” nishpami jarcarcanguichic.

¹³ Ñucaca cancunataca achca gavillata jundachishca carreta saruc shinami sarusha.

¹⁴ Shina ruhuacpica, yalli callpac runapish mana callpai pudingachu. Yalli sinchi runapish fuerza illacmi saquiringa. Yalli piña runapish mana quishpiringachu.

¹⁵ Flechata cacharicpish, mana cachari pudingachu. Yalli callpac runapish mana miticui pudingachu. Caballopi ric soldadopish mana quishpiri pudingachu.

¹⁶ Chai llaqui punzhapica tucuita yalli sinchi soldadopish lluchullami callpanga. Chaitaca Mandac Dios ñucami nini» ninmi.