AMÓS 1 - Dios Rimashcata Quillcashcami

Cuchulla llactacunata llaquichinamanta

¹ Judá llactata jatun mandac Uzías mandacucpi, Israel llactataca Joaspac churi Jeroboam mandacucpi, allpa chucchungapac ishcai huata tiyacpiracmi Mandac Diosca israelcuna ima tucunata Tecoamanta ovejacunata michic Amosman huillachirca.

² Amosca: «¡Sión urcumanta, Jerusalenmantami Mandac Diosca león huacac shina caparishpa uyaringa! Michinapish mana tiyangachu. Carmelo urcupish chaquingami» nirca.

³ Mandac Diosca: «Damascopi causaccunataca paicuna catipi quimsa cutin, chuscu cutin juchallishcamanta llaquichinataca manatac saquishachu. Paicunaca Galaad llactapi causaccunataca trillana fierrohuanmi llaquichirca.

⁴ Hazaelpac huasipica ninatami churasha. Chai ninami jatun mandac Ben-hadad mandashpa tiyana huasitapish tucui rupachinga.

⁵ Damasco pungu aldabacunatapish paquishami. Avén pambapi causaccunatapish, Bet-edén llactata mandaccunatapish tucuchishami. Siria llactapi causaccunataca Kir llactamanmi prezu apanga» ninmi.

⁶ Mandac Diosca: «Gazapi causaccunataca paicuna catipi quimsa cutin, chuscu cutin juchallishcamanta llaquichinataca manatac saquishachu. Paicunaca Edom llactapi causaccunaman cungapacmi shuc llactapi tucui causaccunata prezu aparca.

⁷ Chaimantami Gaza muyundi pircapica ninata churasha. Chai ninami mandashpa tiyana huasicunatapish tucui rupachinga.

⁸ Asdodpi causaccunatapish, Ascalón llactata mandaccunatapish tucuchishami. Ecrón llactapi causaccunataca piñarishpa llaquichicpica, maijan saquirishca filisteocunapish huañungami. Chaitaca Mandac Dios ñucami nini» ninmi.

⁹ Mandac Diosca: «Tiropi causaccunataca paicuna catipi quimsa cutin, chuscu cutin juchallishcamanta llaquichinataca manatac saquishachu. Paicunaca huauquicunahuan ari nishcata mana yuyarishpami, shuc llactapi causaccunata prezushpa, Edom llactapi causaccunaman curca.

¹⁰ Chaimantami Tiro llacta muyundi pircapica ninapica churasha. Chai ninami mandashpa tiyana huasicunatapish tucui rupachinga» ninmi.

¹¹ Mandac Diosca: «Edom llactapi causaccunataca, paicuna catipi quimsa cutin, chuscu cutin juchallishcamanta llaquichinataca manatac saquishachu. Paicunaca quiquin huauquicunatami mana llaquishpa, espadahuan huañuchirca. Paicunaca yallita piñarishpami, paicuna munashcata ruhuashpa llaquichishpa causarca.

¹² Chaimantami Temán llactapica ninata churasha. Chai ninami Bosra llactata mandashpa tiyana huasicunatapish tucui rupachinga» ninmi.

¹³ Mandac Diosca: «Amón llactapi causaccunataca, paicuna catipi quimsa cutin, chuscu cutin juchallishcamanta llaquichinataca manatac saquishachu. Paicunaca allpata mirachingapacmi Galaad llactapi causac huicsayuc huarmicunataca huicsata tucyachirca.

¹⁴ Chaimantami Rabá llacta muyundi pircapica ninata churasha. Chai ninami jatun macanacui punzhapi, acapana huaira punzhapi mandashpa tiyana huasicunatapish tucui rupachinga.

¹⁵ Jatun mandactaca pai churashca mandaccunandimi prezu apanga. Chaitaca Mandac Dios ñucami nini» ninmi.