ABDÍAS 1 - Dios Rimashcata Quillcashcami

Edom llactapi causaccuna pingai tucunamanta

¹ Mandac Diosmi Abdiasman muscuipi shina ricurishpa, Edom llactapi causaccuna ima tucunamanta huillashpaca: «Mandac Dios ñuca shuc huillac tucui llactacunaman cachashpaca: “¡Edom llactapi causaccunahuan macanacungapac jatarichic, tucui jatarishunchic!” ningui nircani.

² Tucui cai pacha llactamanta ashtahuan uchilla, tucuipac piñana llactatami ruhuasha.

³ Cambac shungupi jatun tucuna yuyaillami cantaca pandachirca. Canca jatun urcu chaupipimi cangui. Chaipi causashpami cambac shungupica: “¿Pitac caimantaca pambaman urmachingayari?” yuyangui.

⁴ Anga shina jahuaman vola rishpa, lucerocuna chaupipi cuzhata ruhuacpipish, chaimantami urmachisha. Chaitaca Mandac Dios ñucami nini.

⁵ Shuhuaccuna tuta cambacman shamushpaca, ¿manachu apana pactallata shuhuanga? Uvasta pallaccuna pallashpapish, ¿manachu chalanata saquinga? ¡Canca llaquinayaitami tucuchishca cangui!

⁶ ¡Esaupac imalla charishcataca tucui chalashpami aparca! ¡Tucui imapish valishcacunatami shuhuashpa rirca!

⁷ Canhuan alli apanacuccunallatacmi cantaca shuctac llacta linderocunaman apashpa shitarca. Canhuan sumacta causacllatacmi cantaca piñachirca. Canhuan micuccunallatacmi tucllata churashpa urmachirca. ¡Edom llactapica alli yuyaita charicca mana tiyanchu!

⁸ Chai punzhapica, ¿manachu Edom llactapi causac jatun yachac runacunata chingachisha? ¿Manachu Esaupac urcupi causac alli yuyaiyuc runata huañuchisha?

⁹ Temán llactalla, cambac sinchi soldadocunapish chucchungami. Esaupac urcupi causaccunapish yallita llaqui tucushpami huañunga.

¹⁰ Cambac huauqui Jacobota ñacachishcamantami pingaichishpa, huiñaita chingachishca cangui.

¹¹ Cambac huauquipac soldadocunata shuctac llactaman prezu apacucpi, Jerusalén punguta shuhuangapac yaicucpica canca ricucurcanguimi. Chai shuhuashcata suerteta ruhuashpa chaupicucpica, canpish chai llaquichic shinami tucurcangui.

¹² Cambac huauqui llaquihuan cai punzhapica, mana cushicunachu carcangui. Judá llactapi causaccuna chingaricui punzhapica, mana asinachu carcangui. Paicuna jatun llaquita apacui punzhapica, mana jatun tucunachu carcangui.

¹³ Pai llaquita apacui punzhapica, mana ñuca llacta punguta yaicunachu carcangui. Pai llaquita apacui punzhapica, mana ricucunallachu carcangui. Paita yallita llaquichicui punzhapica, pai imata charishcatapish, mana japinachu carcangui.

¹⁴ Huañuimanta miticushpa riccunataca mana quichqui ñanpi chapashpa, huañuchinachu carcangui. Chai jatun llaqui punzhapica, miticushpa saquirishcacunata mana llaquichiccunaman cunachu carcangui. punzhacuna ima tucunamanta

Israelcuna quipa

¹⁵ Tucui llactacunata yallita llaquichina punzhaca ñami chayamucun. Ima shinami shuccunata yallita llaquichircangui, chashnallatacmi cantapish llaquichinga. Chashna llaquichishcamantaca canpish llaquichishcami cana cangui.

¹⁶ Ima shinami, canca ñucapaclla urcupi jayacta ubiarcangui, chashnallatacmi shuctac llactapi causaccunapish, mana samarishpa jayacta ubiana can. Shina ubiashpaca mana tiyashca shinallatacmi tucunga.

¹⁷ Ashtahuanpish Sión urcupica, maijan quishpirishcacuna tiyangaracmi. Chai urcuca Diospaclla chicanyachishcami canga. Jacobopac huahua huahuacunapish paicunapac allpataca cutinmi japinga.

¹⁸ Jacobopac huahua huahuacunaca nina shinami canga. Josepac huahua huahuacunaca rupacuc nina shinami canga. Esaupac huahua huahuacunaca ucsha shinami canga. Shina rupachicpica, shucllapish mana saquiringachu. Chaitaca Mandac Dios ñucami nini» ninmi.

¹⁹ Neguev llactapi causaccunaca Esaupac huahua huahuacunapac urcucunatami japinga. Sefela pambapi causaccunaca filisteocunapac llactatami japinga. Efraín llactatapish, Samaria llactatapish japingami. Benjaminpac huahuacunaca Galaad llactatami japinga.

²⁰ Prezumanta cutimuc Israel soldadocunaca cananeocunapac llactamantaca Sarepta llactacamanmi japinga. Jerusalenmanta prezu rishpa, Sefarad llactapi causaccunaca Neguev pambapi tiyac llactacunatami japinga.

²¹ Esaupac urcupi quishpirishca runacunaca mandangapacmi Sión urcuman huichai ringa. ¡Chashnami mandanaca Mandac Diospaclla canga!