2 TIMOTEO 2 - Dios Rimashcata Quillcashcami

Jesucristopac alli soldado shina canamanta

¹ Ñuca huahua shina Timoteo, canca Jesucristohuan shuclla cashcamanta, Dios cuyashpa allicunata cushcahuan sinchi tucuiyari.

² Tauca gentecunapac ñaupapi ñuca ima yachachishcata uyashcataca, yachachinata pudic criccunaman, paicunapish shuccunaman yachachichun mingai.

³ Canca Jesucristopac alli soldado shina, llaquicunataca apanguilla.

⁴ Maijanpish soldado cashpaca, paipac ima ruhuanata saquishpami, paita mandac imata nishcallata ruhuan.

⁵ Chashnallatac maijan pucllacpish, pucllana cashca shina mana pucllashpaca, chai japina cashcataca mana japinchu.

⁶ Tarpuc runapish, granota japingapacca allpataracmi yallita allichishpa trabajanata charin.

⁷ Cai ñuca nishcacunata alli yuyaricpica, Apunchic Jesucristollatacmi tucui imapish alli yuyaicunata cunga.

⁸ Alli huillaita ñuca huillashca shinallatac Jesucristotaca Mandac Davidpac aillupuramanta cashcata, huañushcacunapuramanta causarishcata yuyarina cangui.

⁹ Chaita huillacushcallamantami huañuchicta shina cadenahuan huatashca llaquita apacuni. Shina cacpipish Diosmanta huillanaca mana huatashcachu.

¹⁰ Chaimantami Dios tucui acllashcacuna Jesucristohuan shuclla tucushpa, sumaimana huiñai causaita paicunapish japichun nishpa cai llaquicunataca apacuni.

¹¹ Cai nishcaca chashnatacmi can: “Jesucristohuan huañushca cashpaca, paillahuantacmi causashun.

¹² Llaquicunata apashpaca, paihuanmi mandashun. Pingashpa ‘mana paipacchu cani’ nicpica, paipish ‘mana ñucapacchu cangui’ ningami.

¹³ Ñucanchic pai ima nishcacunata mana pactachicpipish, paica pactachishpami catin. Pai ima shina cashcataca mana yanga ninchu” nishcami.

Diospacta ruhuaccuna ima shina alli canamanta

¹⁴ Tandanacushca criccunapurapi “caica chashnami, chaica chashnami” ninacushpa ama piñanacui tiyachunca, Diospac ñaupapi cunashpa caicunata yachachingui. Chashna rimanacuicunaca imapacpish mana allichu, ashtahuanpish uyaccunata pandachinmi.

¹⁵ Diospac ñaupapi alli ricuringapacca, shuc allitac trabajac runa shina imatapish allita ruhuana yuyailla caiyari. Chashna ruhuashpami imamanta mana pingaichishca cangui, alli huillaitapish allita yachachingui.

¹⁶ Imapish yanga, mana alli rimanacuicunamantaca anchuringui. Chai rimaicunaca ashtahuan ashtahuan piñanacuipi churashpami, Diosmanta caruyachinga.

¹⁷ Chai rimanacuicunaca sisu ungüi shinami mirarishpa catin. Chai shina rimaccunaca Himeneo, Filetomi carcacuna.

¹⁸ Paicunaca chashna tucushpami cashcata nic yachachishcata saquishpa, “huañushcacunaca ñami causarishca” nishpa tauca criccunata pandachishpa puricuncuna.

¹⁹ Shina cacpipish Diosca huasita ruhuangapac callaripi churashca rumi shinatami, paipac rimashcataca churashca. Chai rimashcaca: «Pai acllashcacunataca Diosca ricsinmi. Diosta adoraccunaca tucui millaimantami anchurina can» nishcami.

²⁰ Shuc jatun huasi ucupica mana curimanta, cullquimanta ruhuashcacunallachu tiyan, ashtahuanpish caspimanta, turumanta ruhuashca imacunapish tiyanmi. Chaicunamanta maijancunaca allipi servingapac, cutin maijancunaca yangallapi servingapacmi can.

²¹ Chashnallatacmi maijanpish Diospaclla tucushpa Apunchic Jesuspacta allita ruhuangapacca, tucui mana allicunamanta anchurina can. Shina cashpami imapish allita ruhuangapacca alli canga.

²² Huambracunapac yuyaita saquishpa, imapish cashcallata ruhuashpa, alli crishpa, tucui shungumanta Diosta mañaccunahuan tandarishpa, cuyaihuan apanacushpa sumacllata causangui.

²³ Imapish mana alli parlocunataca ama uyanguichu. Chaicuna piñanacuipi churac cashcataca canllatac yachanguimi.

²⁴ Maijanpish Apunchic Jesusta servicca mana pihuanpish piñanacushpachu purina, ashtahuanpish tucuihuan apanacuc, mana piñaric, alli yachachicmi canami can.

²⁵ Piñaccunatapish cuyai shunguhuanmi yachachina can. Chashna yachachicpi Dios paiman cutirina yuyaita cucpi, cashcata nic huillashcata cringacunapishchari.

²⁶ Chashna crishpami diablo huatashpa, tucllapi shina pai munashcata ruhuachishpa causacushcamantaca, yuyarishpa llucshinga.