2 TIMOTEO 1 - Dios Rimashcata Quillcashcami

Pablo, Timoteoman quipata quillcashcamanta

¹ Ñucaca Dios munashcamanta, Apunchic Jesucristo acllashca huillac Pablomi cani. Apunchic Jesucristohuan shuclla tucushcamanta, pai cushami nishca causaita huillacmi cani.

² Ñuca cuyashca huahua shina Timoteo, ñucanchic Diospish, Apunchic Jesucristopish canta cuyashpa, llaquishpa sumac causaita canman cushca cachun nishpami quillcani.

Jesucristomanta huillana cashcamanta

³ Tutapish, punzhapish canta yuyarishpa paiman mañacushpaca, ñaupa taitacuna ruhuashca shinallatacmi, ñucapish chuya yuyaihuan Diospacta ruhuashpa pagui nicunilla.

⁴ Can huacashcacunata yuyarishpaca ñahui ñahui ricushpa cushichinatami munani.

⁵ Can mana nic tucushpa, alli cric cashcataca yachanimi. Cambac aila Loidapish, cambac mama Eunicepish chashnallatacmi cric carca. Canpish chashnallatac cric cashcataca yachanimi.

⁶ Shina cashcamanta cambac uma jahuapi ñuca maquita churacpi, Dios ima ruhuana cashcata cushcataca, nina huañugricucta causachic shina cutin causachichunmi nini.

⁷ Diosca manchana yuyaita cuc espiritutaca mana cushcachu, ashtahuanpish poderta cuc, cuyaita cuc, shinallatac quiquinllatac jarcarina yuyaita cuc Espiritutami cushca.

⁸ Chashna cashcamanta ñucanchic Apunchic Jesucristomanta huillanatapish, huillacushcamanta ñuca prezu tiyacushcamantapish ama pinganguichu, ashtahuanpish alli huillaita huillacushcamanta llaquita apana cacpica, Diospac poderhuan ñuca shina llaquita apanguilla.

⁹ Diosmi paipaclla causachun nishpa, ñucanchictaca quishpichishpa cayarca. Mana ñucanchic ima allita ruhuashcamanta, ashtahuanpish Dios cuyashcallamantami, Jesucristomanta quishpichirca. Cai shinaca cai pacha manarac callaricpimi, ñucanchicta Diosca cuyashca.

¹⁰ Cunanca Quishpichic Jesucristota cai pachaman cachashpami, Diosca cuyac cashcata ricuchirca. Paimi huañuita chingachishpa, quishpirinamanta huillashpa, mana chingarina causaita ricuchirca.

¹¹ Cai alli huillaita huillachunmi ñucataca huillac cachunpish, yachachic cachunpish acllashpa cacharca.

¹² Chashna huillac cashcamantami tucui cai llaquicunataca apacuni. Ashtahuanpish ñuca pita crishcatapish, ñucaman mingashcatapish, shamuc punzhacaman huacaichina cashcatapish allimi yachani. Chaimantaca manatac pinganichu.

¹³ Canca ñuca ima shina alli yachachishca shinallatac, Jesus-huan shuclla cashcamantaca paita crishpa, paita cuyashpa causachunmi nini.

¹⁴ Ñucanchicpi causacuc Diospac Espíritu ayudacushcamantaca, Dios mingashca sumac yachanacunataca alli huacaichingui ninimi.

¹⁵ Asia llactamanta caccuna tucui mashna ñucataca shitashpa rishcataca, canllatac yachanguimi. Paicunapurapica Figelopish, Hermogenespish carcami.

¹⁶ Apunchic Jesusca Onesiforotapish, tucui paipac huasi ucupi causaccunatapish mai llaquichun ninimi. Paimi ñuca prezu cacpica, tauca cutin mana pingashpa ñucata ricuc shamushpa cushichic carca.

¹⁷ Roma llactaman chayashpapish, mana samarishpami taringacaman ñucataca mashcarca.

¹⁸ Chashna cashcamanta Apunchic Jesusllatac tucuita taripana punzhapica, mai llaquishca cachunmi nini. Efeso pueblopi ima shina allicunata ruhuashpa cushichishcataca, canllatacmi alli yachangui.