2 TESALONICENSES 2 - Dios Rimashcata Quillcashcami

Juchayuc millai runa ricurinamanta

¹ Cuyashca criccuna, ñucanchic Apunchic Jesús cutimunamantapish, ñucanchic paihuan tandanacunamantapish huillashpaca,

² ama imatapish cringuichicchu ninchicmi. Ñucanchic quillcashcalayata ricushpapish, pi mana yachashcata rimacta uyashpapish, huillaccuna huillashcata uyashpapish, pacta jahualla mancharishpa, pandaringuichicman ninchicmi.

³ ¡Ima shinapish pi pandachichun ama saquinguichicchu! Chai punzha manarac chayamucpimi, Diosta piñaccunapish achca ricuringa, shinallatac llaquiman ric juchata ruhuac runapish ricuringa.

⁴ Chai runami Diospac shutita apaccunatapish, chashnallatac Diosman tucui imata cushcacunatapish piñanga. Chaipac jahuapica Diosta mañana huasipipish “ñucami Dios cani” nishpami tiyaringa.

⁵ Ñuca cancunahuan cashparac cai shina huillashcataca, ¿manachu cancunaca yuyaringuichic?

⁶ Chai millaita ruhuac runa ricurina punzha manarac chayacpi, pai ricurinata ima jarcacushcataca cancunallatac yachanguichicmi.

⁷ Chai mana alli ruhuanaca ñami callarishca. Millaita ruhuac runa ricurinata jarcacucllapimi, manarac ricurin. Ña chai jarcacucta anchuchicpica,

⁸ chai millaita ruhuac runaca ricuringami. Paitami Apunchic Jesusca paipac shimihuan pucushpa huañuchinga, pai shamucushca sumac achicyachishcahuanmi chingachinga.

⁹ Chai millaita ruhuac runaca Satanás ayudacpi imatapish ruhuaclla cashcahuan shamushpami, milagrocunatapish, pi mana ricushcacunatapish ruhuashpa, llullashpa crichinga.

¹⁰ Jatun llaquiman ricuccunataca tucuilaya mana allita ruhuashpami, umashpa crichinga. Paicuna quishpiringapac cashcata nic huillashcata piñashpa, mana chasquishcamantami chashnaca tucunga.

¹¹ Chaimantami Diosca llullashpa crichichun, shinallatac llullashcata crichunpish poderta cunga.

¹² Cashcata nic huillashcata huillacpi mana crisha nishpa, mana allillata ruhuashcacunahuan cushicushcamanta, paicuna tucuillatac jatun llaquiman richunmi, chashnaca ruhuanga.

Dios ima shina quishpichina cashcamanta

¹³ Apunchic Jesús cuyashca criccuna, ñucanchicca cancunata yuyarishpaca, punzhantami Diostaca pagui nicunchiclla. Diospac Espíritu Diospacllata ruhuashcamanta, shinallatac cashcata nic huillashcata crishcamantami, cancuna quishpirichun callarimanta pacha Diosca acllarca.

¹⁴ Chashnaca ñucanchic Apunchic Jesucristopac sumaimana cushicuita chasquichunmi, ñucanchicman alli huillaita huillachishpa, Diosca cancunataca cayarca.

¹⁵ Shina cashcamanta cuyashca criccuna, ñucanchic quillcashpapish, ñucanchic yachachishpapish, imata nishcataca amatac cungarishpa catichiclla.

¹⁶ Ñucanchicta cuyac Diosllatac, shinallatac pai cuyashcallamanta huiñai huiñaita cushi canatapish, cushicushpa shuyanatapish cuc ñucanchic Apunchic Jesucristollatac

¹⁷ cancunapac shunguta cushichishpa, imata rimangapacpish, punzhanta imata ruhuangapacpish alli yuyaicunata cuchun ninchicmi.