2 TESALONICENSES 1 - Dios Rimashcata Quillcashcami

Tesalónica pueblopi tandanacushca criccunaman quillcashcamanta

¹ Cai quillcataca ñuca Pablomi, Silvanohuan, Timoteohuan, Tesalónica pueblopi tandanacushca criccunaman cachanchic. Cancunaca ñucanchic Dios-huan, Apunchic Jesucristohuan shucllami canguichic.

² Ñucanchic Diospish, Apunchic Jesucristopish cuyashpa, cushi causaita cushca cachun ninchicmi.

Cristo cutimucpi, ima juchatapish Dios taripana cashcamanta

³ Cuyashca criccuna, cancunaca sinchi criccuna tucucushcamanta, caishuc chaishuc-huan cuyanacushpa causacushcamantami pagui nina cashca shinallatac Diostaca pagui nicunchiclla.

⁴ Cancunaca llaquihuan cashpapish, piñacucpipish sinchitami caticunguichic. Chaimantami tucui tandanacushca criccunapica yallita cushicunchic.

⁵ Cancuna chai shina llaquita apashpaca, Dios cashcatatac ruhuashpa taripac cashcatami ricunguichic. Dios maipi mandacucman yaicungapacmi chai shina llaquita apacunguichic.

⁶ Cancunata llaquichiccunataca, cashcata ruhuac Diosmi llaquichinga.

⁷ Cutin cancuna llaquita apacuccunataca ñucanchicta samachic shinallatac samachingapacmi Apunchic Jesusca paipac poderyuc angelcunahuan jahua pachamanta nina culun nicuc chaupita shamunga.

⁸ Shina shamushpami, ñucanchic Apunchic Jesucristopac alli huillaita mana cazuccunatapish, Diosta mana ricsinata munaccunatapish llaquichinga.

⁹ Paicunaca huiñaitami llaquichishpa chingachishca, shinallatac poderyuc Apunchic Jesuspac sumaimana ñaupamantapish, caruman shitashca canga.

¹⁰ Chai punzhapi Apunchic Jesucristo cutimucpica, tucui paipaclla cac criccunaca mancharishpami paita alli ninga. Cancunapish ñucanchic huillashcata crishcamantaca chaipimi canguichic.

¹¹ Chaimantami Dios paipac poderhuan pai munashca shinata ruhuachichun, cancuna crishcamanta alli ruhuaicunatapish, alli yuyaicunatapish cuchun, cayashcacuna cashcatatac ricuchichun nishpami cancunamanta punzhanta mañacunchiclla.

¹² Chashnami cancunaca ñucanchic Apunchic Jesustaca alli ninguichic, shinallatac cancunatapish Paica alli ningami. Chashnami ñucanchic Diospish, Apunchic Jesucristopish mai cuyashcamanta alli ninga.