2 SAMUEL 7 - Dios Rimashcata Quillcashcami

Mandac Dios Davidman ari nishcamanta

¹ Jatun mandac David paipac mandanapi causacucpica, Mandac Diosmi tucui muyundi piñaccunamanta huacaichishpa samachirca.

² Chaimantami Davidca Diosmanta huillac Natantaca: —Riqui, ñucaca cedromanta ruhuashca sumac huasipimi causacuni. Ashtahuanpish Diospac Arcaca carpa huasillapimi tiyacun— nirca.

³ Shina nicpimi Natanca: —Mandac Diosca canhuanmi. Can imata yuyacushcataca ruhuailla— nirca.

⁴ Mandac Dios chai tuta Natanta cayashpaca:

⁵ «Ñucata servic Davidpacman rishpa: “Mandac Diosca: ¿Ñuca causana huasitaca ruhuanguichu?

⁶ Ñuca Egiptomanta israelcunata llucchimushca punzhamanta cunancamanmi jaicapi ñuca huasipica mana causashcani. Ashtahuanpish yangalla carpa huasillapi, jatun carpa huasillapimi causarcani.

⁷ Ñucaca israelcunahuan maita purishpapish israelcunata pushaccunataca: ‘¿Ñuca causangapac cedromanta huasita ruhuachun nishcanichu?’ nishpa tapurcani.

⁸ Shina cashcamanta ñucata servic Davidtaca: ‘Tucuita Mandac Diosca: Ñucami cantaca ovejacunata michishpa puricucpi, ñuca israelcunata mandac cachun acllarcani.

⁹ Ñucaca can maita ricpipish, canhuanmi carcani. Canta piñaccunatapish tucuitami cambac ñaupamanta chingachircani. Shina ruhuashpami, cai pacha mandaccunapuramanta tucuita yalli jatun cachun ruhuarcani.

¹⁰ Shinallatac ñuca acllashca israelcuna causachunmi shuc llactata acllashpa, tarpushca shina causachun cusha. Chaipimi paicunaca callari punzhapi llaquichishca shina mana pipish llaquichishca causanga.

¹¹ Ñuca acllashca israelcunata mandachun juezcunata churashca punzhamanta pachami paicunataca llaquichirca. Tucui canta piñaccunamantami samachisha. Shinallatac Mandac Dios ñucami can causana huasita ruhuasha.

¹² Can ña unaita causashpa cambac taitacunahuan enterrashca cacpica, cambac huahuacunamantami shucta acllashpa cambac mandanapi churashpa, can mandanataca allichisha.

¹³ Paimi ñuca huasitaca shayachinga. Paimanca huiñaita mandanatami cusha.

¹⁴ Ñucaca paipac taitami casha. Paica ñuca churimi canga. Pai mana allita ruhuacpica, shuc taita churita varahuan llaquichic shinami llaquichisha. Huañuna aichayuc runacuna shinami llaquichisha.

¹⁵ Shina ruhuashpapish, llaquicushallami. Saulta llaquichishca shinaca mana saquishachu. Saultaca cambac ñaupallapitacmi chingachircani.

¹⁶ Cambac huasi ucupurapish, can mandanapish jaicapi mana tucuringachu. Shinallatac can mandashpa tiyanaca huiñaitami caticungalla’ ninmi” ningui» nirca.

¹⁷ Natanca tucui uyashcacunataca muscuipi ricurishca shinallatacmi Davidman huillarca.

¹⁸ Chashna huillacpi, David Mandac Diospac ñaupaman yaicushpaca: «Mandac Dioslla, ñucapish, ñuca huasi ucupurapish, ¿ima cacpitac caiman cayachircangui?

¹⁹ Jatun Mandac Dioslla, chaita ruhuashami nishca jahuapish quipaman canta servic ñucapish, ñuca huasi ucupuracunapish ima shina canamantapish huillashcanguimi. Mandac Dioslla, can shinaca, ¿pi gentecuna ruhuangachu?

²⁰ Mandac Dioslla, canta servic ñucataca canllatac ricsinguimi. Chaimanta, ¿imatatac ashtahuan nishayari?

²¹ Cai tucui sumaccunataca can munashca shina, can yuyashca shina ruhuashpami, canllatac ñucamanca huillashcangui.

²² Chaimanta Mandac Dioslla, canca mai alli nishcami cangui. Ñucanchic ringrihuantac uyashca shina, ¿pi shuctac Diostac tiyanyari?

²³ Shinallatac can acllashca Israel llacta shinaca, ¿maijan llactatac cai pachapica tiyanyari? Cai llactataca paicunaman allita ruhuashpa, tucuiman ricsichingapacmi huatashca shina causacucmanta cacharichircangui. Canca llactapi causaccunatapish, chaipi tiyac dioscunatapish llucchishpa cachashpaca, jatun mancharinacunata ruhuashpami Egiptomanta cambaclla cachun llucchimurcangui.

²⁴ Can acllashca israelcunataca huiñaita cambaclla causachunmi churashcangui. Mandac Dios chashna ruhuashpami, paicunapac Dios tucurcangui.

²⁵ Cunanca Mandac Dioslla, canta servic ñucamanpish, ñuca huasi ucupuramanpish imata ruhuasha nishcataca can munashca shina huiñaipac ruhuailla.

²⁶ Cambac shutica huiñaita alli nishca cachun. Shinallatac: “Israelcunapac Diosca tucuita Mandac Diosmi” nichuncuna. Canta servic ñuca huasi ucupuracunapish sinchi cachun.

²⁷ Israelcunapac tucuita Mandac Dios canllatacmi canta servic ñucataca: “Cambac huahuacunatami mandac cachun churasha” nircangui. Chaimantami canta servic ñucaca cambac ñaupapi cashna mañangapac sinchicushcani.

²⁸ Cunanca, Mandac Dioslla, canca Diostacmi cangui. Canca ima pactana cashcatami ningui. Chaitami canta servic ñucamanca huillashcangui.

²⁹ Cunanca, canta servic ñuca huasi ucupuracunaca cambac ñaupapi huiñaita causachun bendiciaiyari. Can Mandac Diosllatacmi shina nishcangui. Shina cashcamanta can bendiciacpica, ñuca huasi ucupurapish huiñaitami bendiciashca canga» nirca.