2 SAMUEL 6 - Dios Rimashcata Quillcashcami

David Jerusalenman Arcata apasha nishcamanta

¹ Jatun mandac Davidca cutinllatacmi israelpuramanta quimsa chunga huaranga runacunata acllashpa tandachirca.

² Chai quipami, Davidca tucui paihuan cac gentecunandi, Judá llacta Baala pueblomanta Diospac Arcata apamungapac rirca. Chai Arcapimi tucuita Mandac Diosta mañac carca. Chaica querubincunapac chaupipimi carca.

³ Diospac Arcata shuc mushuc carretapi churashpami, Abinadabpac huasimanta aparca. Chai huasica loma jahuapimi carca. Chai mushuc carretataca Abinadabpac churicuna Uza, Ahiomi apacurca.

⁴ Chai loma jahuapi cac Abinadabpac huasimanta Arcata apacucpica, Ahiomi ñaupata ricurca.

⁵ Davidpish, tucui israelcunapish cushicushpami caspimanta ruhuashca arpapi, panderopi, salteriopi, flautapi, cimbalopi tocashpa Mandac Diospac ñaupapi danzarca.

⁶ Paicuna Naconpac trillana pambaman chayacpimi, chai carretata aisacuc huagracunaca lluchcarirca. Chaipimi Uza runaca Arca urmagricpi charirca.

⁷ Chaimantami Mandac Dios nina japiric shina piñarishpa, Uzata chugrichishpa, Arca ladollapitac huañuchirca.

⁸ Mandac Dios Uzata chashna huañuchishcamantami Davidca yallita llaquirishpa, chai pambataca Pérez-uzata shutichirca. Cunancamanmi chai shutillatac can.

⁹ Chai punzhacunapi David Mandac Diosta manchashpaca: «¿Ima shinatac ñuca huasimanca Mandac Diospac Arcata apashayari?» nirca.

¹⁰ Mandac Diospac Arcataca paipac pueblomanca ña mana apasha nircachu. Chaipac randica geteocunapuramanta Obed-edompac huasimanmi apachun mandarca.

¹¹ Mandac Diospac Arcaca Obed-edompac huasipimi quimsa quillata carca. Chaipi cacpimi, Mandac Diosca Obed-edomtapish, paipac familiatapish bendiciarca.

David Jerusalenman Arcata apashcamanta

¹² Jatun mandac Davidmanca: «Obed-edompac huasipi Diospac Arca cashcamantami paipac familiatapish, paipac ima charishcacunatapish Mandac Diosca bendiciashca» nishpa huillashcata yachac chayashpami, Davidca cushicushpa, Obed-edompac huasimanta paipac puebloman Arcataca aparca.

¹³ Davidca Diospac Arcata huanduccuna sucta saruita ricpimi shuc huagrata, huira ovejata huañuchirca.

¹⁴ Shinallatac linomanta ruhuashca efot churanata churarishpami, Davidca Mandac Diospac ñaupapi danzarca.

¹⁵ Chashnami Mandac Diospac Arcataca Davidpish, tucui israelcunapish cushilla caparinacushpa, cornetapi tocashpa aparca.

¹⁶ Mandac Diospac Arcahuan David paipac puebloman saltarishpa, danzashpa shamucucta Saulpac ushi Mical ventanamanta ricushpami, paipac shungupi Davidca mana allichu nirca.

¹⁷ Chashna apamushpami, Mandac Diospac Arcataca David ruhuashca shuc carpa huasipi churana pushtupi churarca. Chai quipaca, Davidca Mandac Diosman animalcunata cushpami tucui rupachirca. Shinallatac Dios-huan alli tucungapacpish animalcunatami curca.

¹⁸ Davidca Diosman cushpa tucuita rupachishca quipa, Dios-huan alli tucungapac animalta cushca quipaca, Mandac Diospac shutipimi tucui israelcunata bendiciarca.

¹⁹ Shina ruhuashpami, tucui chaipi cac Israel huarmicunamanpish, caricunamanpish cada shucman shuc tandata, asha aichata, shuc pasas tortatapish cararca. Chai quipami, tucui israelcunaca paicunapac huasicunaman cutirca.

²⁰ Chai quipami, Davidca paipac familiacunata bendiciangapac cutirca. Ña David huasiman chayacpimi, Saulpac ushi Micalca Davidta tupangapac llucshishpaca: —¡Cunanca, israelcunata jatun mandacca paita serviccunapac ñaupapi maijanpish cullquimanta servic shina lluchulla danzashpaca allitamari ricuchishca!— nirca.

²¹ Shina nicpimi Davidca: —Mandac Diospac ñaupapimi danzarcani. Chaica Mandac Diosmi cambac taitapac randi, paipac familiapac randi Mandac Dios acllashca israelcunata mandachun ñucata acllarca. Chaimantami Mandac Diospac ñaupapi danzashpa catisha— nirca.

²² Cunan danzashcamanta ashtahuan danzashpami yangalla tucusha. Shina cacpipish, chashna can nicushca servic huarmicunami ñucataca alli ninga.

²³ Saulpac ushi Micalca pai huañuna punzhacamanmi mana huahuata chari pudirca.