2 SAMUEL 24 - Dios Rimashcata Quillcashcami

David tucui runacunata yupashcamanta

¹ Mandac Diosca israelcunahuan cutinllatac nina japiric shina piñarishpami Davidtaca: «Israelcunatapish, Judá gentecunatapish yupachi» nirca.

² Shina nicpimi, jatun mandacca macanacuc runacunata pushac Joabtaca: —Ñuca mashna gentecuna tiyashcata yachangapac Dan pueblomanta callarishpa Beerseba pueblocaman tucui israelcunata yupai— nirca.

³ Ashtahuanpish Joabca jatun mandactaca: —¡Canta Mandac Dios cai gentecunamantaca patsac cutin ashtahuan mirachichun! ¡Chaita ñuca amo jatun mandac ricuchun! Shina cashpapish ñuca amo jatun mandaclla, ¿imamantatac caita ruhuasha ningui?— nirca.

⁴ Shina nicpipish, jatun mandacca Joabtapish, macanacuc runacunata pushaccunatapish pai nishcata cazuchircami. Chaimantami Joabca soldadocunata pushaccunahuan jatun mandacpac ñaupamanta israelcunata yupangapac rirca.

⁵ Paicuna Jordán yacuta pasashpaca, chai pueblomanta urai rishpa Aroer pueblo cuchulla Gad pambacunapi carpacunata shayachishpami tiyarirca. Chaimantaca Jazer pueblomanmi rirca.

⁶ Quipataca Galaad llactaman, Hodsi llactamanmi rirca. Chaimantaca Danjaán puebloman, Sidón muyundi llactacunamanmi rirca.

⁷ Quipataca muyundita pircashca Tiro puebloman, tucui heveocunapac, cananeocunapac pueblocunamanmi rirca. Tucurinataca Judá llacta Neguev pambapi tiyac Beerseba pueblomanmi chayarca.

⁸ Tucui Israel llactacunata purishpaca iscun quilla ishcai chunga punzhapimi Jerusalenmanca cutirca.

⁹ Chashna cutishpami Joabca mashna yupashcata jatun mandacman curca. Chaipica espadahuan cac israelcunapac soldadocunaca pusac patsac huaranga, Judá gentecunapacca pichca patsac huaranga runacunami carca.

¹⁰ Chai gentecunata David yupachishpaca, mana allita ruhuashcatami paipac shungupimi sintirca. Chaimantami Davidca Mandac Diostaca: —Caita ruhuashpaca yallitami juchallishcani. Caitaca yuyai illac shinami ruhuashcani. Cunanca, Mandac Diosllatac canta servic ñucamanta cai juchata anchuchiyari— nirca.

¹¹ David tutamanta utca jataricpimi, Dios ima nishcata huillac Gad Davidpacman shamushpaca:

¹² «Mandac Diosca: Davidpacman rishpa: “Quimsa llaquicunatami canman acllachun cuni. Chaicunamanta maijan shucta acllai” ninmi ningui» nirca.

¹³ Shina nicpimi, Gadca David yachachun huillangapac rishpaca: —¿Canchis huatata yalli yarcai tiyachunchu? ¿Mana cashpaca canta piñaccunamanta quimsa quillata miticushpa ricpi, paicuna catichunchu? ¿Mana cashpaca cambac llactapi quimsa huatata yalli ungüi tiyachunchu munangui? Cunanca ñuca imata nigringapac allita yuyarishpa ni— nirca.

¹⁴ Shina nicpimi, Davidca Gadtaca: —Yallitami shungupi llaquiricuni. Gentecunapac maquipi llaquita apanapac randica Mandac Diospac maquipi urmanatami munai— nirca.

¹⁵ Chashnami Mandac Diosca yallita llaquichic ungüita israelcunaman cacharca. Chai tutamantamanta callarishpa, maicaman llaquichina punzhacamanca canchis chunga gentecunami Dan pueblomanta callarishpa Beerseba pueblocaman huañurca.

¹⁶ Jerusalenpi causaccunata tucuchingapac ángel chai pueblo ladota rigrata chutacpica, Mandac Dios chai pueblota llaquichigricushcamantami llaquirirca. Chaimantami chai pueblota tucuchic angeltaca: «¡Chaillapi saqui! ¡Ama llaquichichu!» nirca. Mandac Diospac angelca jebuseopuramanta Araunapac trillana era ladopimi carca.

¹⁷ Ángel gentecunata llaquichishpa tucuchicucta David ricushpami Mandac Diostaca: —Riqui, ñucaca juchallishcanimi, ñucami mana allita ruhuacca cani. Cai yangalla gentecunaca ¿Imatatac ruhuashcayari? Llaquichina cacpica Ñucata shinallatac ñuca huasi ucupurata llaquichiyari— nirca.

¹⁸ Chai punzhacunami Gadca Davidtaca: «Jebuseopuramanta Araunapac trillana eraman huichai rishpa, Mandac Diosman shuc altarta ruhuai» nirca.

¹⁹ Mandac Dios Gadman imata nishca shinallatacmi Davidca huichai rirca.

²⁰ Arauna huichai rishpaca, jatun mandac paipac serviccunandi shamucuctami ricurca. Chashna ricushpami, Araunaca jatun mandacta tupangapac llucshishpa allpacaman cumurirca.

²¹ Chashna cumurishpaca: —Ñuca amo jatun mandaclla, ¿imapactac ñucapacman shamungui?— nirca. Shina nicpimi Davidca: —Gentecunapi millai ungüi pararichun, cai trillana erata randishpa, caipi Mandac Diosman altarta ruhuangapacmi shamuni— nirca.

²² Shina nicpimi, Araunaca Davidtaca: —Ñuca amo jatun mandaclla, chaipimi can munashcata ruhuailla. Diosman cushpa tucui rupachingapacpish caipimi huagracunapish, rupachingapac yantaca trillana caspicunapish, yugopish caipimi.

²³ Jatun mandaclla, ñucaca tucui caicunatami can jatun mandacman cuni— nirca. Shinallatacmi Araunaca jatun mandactaca: —¡Canta Mandac Dios caicunata chasquichun!— nirca.

²⁴ Shina nicpipish, jatun mandac Davidca jatun mandac Araunataca: —Mana, ñuca Mandac Diosman tucuita rupachinataca mana yanga chasquisha ninichu. Chaimanta mashna valishcatami pagasha nini— nirca. Chaimantami Davidca trillana eratapish, huagracunatapish pichca chunga siclos cullquipi randirca.

²⁵ Chaipimi Davidca Mandac Diosman altarta ruhuashpa, paiman animalta cushpa, tucuita rupachishpa, Dios-huan alli tucungapacpish animalta curca. Chaipimi Mandac Diosca David mañashcata uyashpa, millai ungüitaca tucui Israel llactapi parachirca.