2 SAMUEL 22 - Dios Rimashcata Quillcashcami

Macanacuita mishashpa David cantashcamanta

¹ Davidca tucui paita piñaccunapac maquimanta, Saulpac maquimanta quishpichishca punzhami Mandac Diosta alli nishpa,

² cantashpaca: «Mandac Diosca ñucapac rumi shinami, ñucaman fuerzata cucpish, quishpichicpish canmi.

³ Ñuca jarcarina rumi shinami. Ñuca jarcarina escudomi. Jatun poderhuan quishpichicmi. Tucuimanta yalli jahuaman cac, ñuca miticunami. Llaquichiccunamantami quishpichircangui.

⁴ Mandac Diostami mañasha. Paitaca alli ninatacmi cani. Ñucata piñaccunapac maquimantaca quishpichishcami casha.

⁵ Huañuica yacu jatarishpa muyuc shinami shamurca. Millaicunapish yacu jundashpa, shamuc shinami manchachirca.

⁶ Seolca huatashca shinami charicurca. Ñuca jahuapica huañuchic tucllatami shitarca.

⁷ Llaquilla cashpami, Mandac Diosta mañarcani. Ñuca Diostami caparircani. Ñuca caparishcataca paipac huasimanta uyarca. Ñuca caparishcaca paipac ringrimantacmi uyarirca.

⁸ Allpaca cuyurishpami chucchurca. Jahua pachata charicuc callari rumicunapish cuyurircami. Dios piñaricpimi, chashna cuyurirca.

⁹ Paipac singamantaca, cushnimi llucshirca. Paipac shimimantaca, tucuchic ninami llucshirca. Paimantaca jagan nicuc carboncunami saltacurca.

¹⁰ Jahua pachaca, cumurishpami urai shamurca. Paipac chaqui ucupica, amsami carca.

¹¹ Shuc querubín nishcapi montashpami, jahua huairata ricurca. Huairapac alascunapimi ricurca.

¹² Paita llanduchunca pura puyutami muyundita churarca. Tamyanalla tisaricuc amsa puyutami churarca.

¹³ Pai achicyachishpa ricuricpimi, jagan nicuc carboncunapish japirirca.

¹⁴ Mandac Diosca, jahua pachamantami pai rimashcataca, tulun nishpa uyachin.

¹⁵ Paipac flechacunata shitashpami shic-huashpa cacharca. Relampa jaguin nishpami tucuita callpachirca.

¹⁶ Mandac Dios sinchita rimaricpi, singamanta sinchita pucucpimi, mama cucha ucu allpapish, cai pachata charicuc callari rumicunapish ricurirca.

¹⁷ Jahua pachamanta, paipac maquita chutashpami, mama cucha ucumanta ñucata llucchirca.

¹⁸ Yalli sinchi piñaccunamanta, mana ricunayachiccunamanta, ñucata yalli sinchi gentecunamantami quishpichirca.

¹⁹ Ñuca llaquihuan cac punzhacunami macac shamurcacuna. Shina cacpipish, Mandac Diosmi ñucata sinchiyachirca.

²⁰ Ñucata cuyashpami, ancho pambaman llucchishpa quishpichirca.

²¹ Mandac Diosca, ñuca cashcata ruhuashca shinallatacmi allita curca. Ñuca maquihuan ima millaita mana ruhuashcamantami, allita cutichirca.

²² Mandac Dios mandashca shinami, cazushpa causarcani. Ñuca Diosmanta caruyashpa mana millaita ruhuangapac rishcanichu.

²³ Tucui pai yachachishcacunaca ñuca ñaupapimi carca. Paipac quillcashpa mandashcamantaca mana anchurircanichu.

²⁴ Paipac ñaupapica allitami ruhuarcani. Millaita mana ruhuangapacmi cuidarircani.

²⁵ Mandac Diosca ñuca cashcata ruhuashca shinallatacmi curca. Paipac ñaupapi allita ruhuashca shinallatacmi allita ruhuarca.

²⁶ Llaquic runataca llaquinguimi, Imatapish mana pandaric runahuanca allimi cangui.

²⁷ Ima mapa illaccunahuanca canpish mapa illactami ricuchingui. Millaita ruhuac-huanca piñami cangui.

²⁸ Yangalla gentecunataca quishpichinguimi. Ashtahuanpish jatun tucushcacunataca cumurichingapacmi cambac ñahuica ricucun.

²⁹ Mandac Dioslla, ñucata achicyachic luzmi cangui. Ñuca Diosmi ñuca pura tutatapish achicyachin.

³⁰ Achca soldadocunatapish, canhuanmi mishasha. Ñuca Dios-huanmi, pueblo jatun pircatapish yallisha.

³¹ Mandac Diospac ñanca jucha illacmi. Mandac Dios rimashcaca, pipish mana juchanchipacmi. Paipi shunguta churaccunapacca jarcarina escudomi.

³² Shinashpaca ¿Mandac Diospac randi shuctac Dios tiyanchu? ¿Ñucanchic Diospac randi rumi shina shuctac Dios tiyanchu?

³³ Diosmi alli chumbillishca shinata ruhuashpa sinchiyachin. Paimi ñuca purina ñanmantapish ima jucha illacta ruhuan.

³⁴ Paimi ñuca chaquicunatapish, venado shina callpacta ruhuan. Paimi ñucataca urcu jahuapi sinchita shayachin.

³⁵ Paillatacmi macanacuipipish ñuca maquita yachachin. Bronce arcotapish shitachunmi ñuca rigracunata yachachin.

³⁶ Quishpirina escudotami ñucaman curcangui. Cambac cuyaihuanmi ñucata jatunyachishcangui.

³⁷ Ñuca changacuna ama chucchuchunmi, ñuca purina ñantapish anchoyachishcangui.

³⁸ Ñucata piñaccunataca atishpami tucuchircani. Paicunata tucuchingacamanmi, mana cutircani.

³⁹ Paicunataca chingachircanimi mana jataricta ruhuashpami tucui tucuchircani. Ñuca chaqui ucupimi urmarcacuna.

⁴⁰ Macanacuiman ricpica, alli chumbillic shinami, sinchita ruhuarcangui. Ñucata piñaccunataca ñuca chaqui ucupimi cumurichircangui.

⁴¹ Canmi ñucata piñaccunataca ñucapac ñaupamanta callpachircangui. Chaipimi ñucata mana ricunayachiccunata tucuchircani.

⁴² Paicuna caparicpipish pi mana quishpichircachu. Mandac Diosta caparicpipish, mana ayudarcachu.

⁴³ Paicunataca ñuto allpata shina ruhuarcani. Ñanpi siricuc turu shinatami sarushpa saquircani.

⁴⁴ Ñuca llacta gentecuna llaquichisha nicpipish, quishpichircanguimi. Llactacunata mandac cachunmi huacaichircangui. Ñuca mana ricsishca gentecunami servirca.

⁴⁵ Shuctac llactamanta shamushca gentecunami alli ningapac shamun. Ñuca imata mandashcataca uyashcahuanmi cazuncuna.

⁴⁶ Shuctac llactamanta shamushca gentecunami irquiyashpa paicuna miticushcamanta chucchushpa llucshin.

⁴⁷ ¡Mandac Diosca causacuchunlla! ¡Sinchi rumi shina ñuca Diosca alli nishca cachun! Ñucata quishpichic Diosca jatunyachishca cachun.

⁴⁸ Ñucata llaquichishca shinallatac llaquichicmi. Gentecunataca ñucata cazuchunmi, ñuca chaqui ucupi churan.

⁴⁹ Canmi ñucata piñaccunamanta anchuchircangui. Canmi ñucata piñaccunapac chaupipi jatunyachircangui. Millai runapac maquimantami quishpichircangui.

⁵⁰ Chaimantami Mandac Dioslla, tucui llactacunapi canmanta huillasha. Cambac shutitaca salmocunahuanmi cantasha.

⁵¹ Paimi, pai acllashca jatun mandacta macanacuita mishachishpa cushichin. Aceitehuan cahuishpa paipaclla ruhuashca runata llaquinmi. Chashnami ñucatapish, ñuca huahuacunatapish huiñaita llaquin» nirca.