2 SAMUEL 20 - Dios Rimashcata Quillcashcami

Seba runa mana allita ruhuanata yuyarishcamanta

¹ Benjaminpac aillupuramanta Bicripac churi millaita ruhuac Sebami chaipi carca. Pai cornetapi tocashpa rimarishpaca: «¡Ñucanchicca Isaipac churi Davidmantaca ima ricunata, ima japinata mana charinchicchu! ¡Israelcuna cancunapac huasicunaman richiclla!» nirca.

² Chashnami israelcunaca jatun mandac Davidmanta raquirishpa, Bicripac churi Sebata catishpa rirca. Ashtahuanpish Judá gentecunaca Jordán yacumanta Jerusalén pueblomanca tucui shunguhuanmi jatun mandacta catirca.

³ Jatun mandac David Jerusalenman chayashpaca, pai mandana huasita cuidachun saquishca paipac caishuc chunga huarmicunatami shuc huasiman pasachishpa huichcashpa churarca. Chai huarmicunaman micunata carashpa charicushpapish, paicunapica ña mana chayarircachu. Paicunataca viuda huarmicuna shina causachunmi huichcashpa churarca.

⁴ Chai quipami jatun mandacca Amasataca: —Cunanmanta quimsa punzhapi Judá gentecunata tandachishpa, canpish caiman shamui— nirca.

⁵ Amasa Judá gentecunata tandachingapac rishpaca, chai nishca punzhacaman mana tandachishpami quipayarca.

⁶ Chaimantami jatun mandac Davidca Abisaitaca: —Bicripac churi Sebaca Absalonta atishpami llaquichinga. Chaimanta canca ñuca serviccunata tandachishpa, chai runata cati callari. Pacta maijan muyundita pircashca puebloman rishpa miticugrinman— nirca.

⁷ Shina nicpimi, Joabpac runacunapish, cereteocunapish, peleteocunapish, shinallatac tucui sinchi runacunapish Abisaihuan Bicripac churi Sebata catingapac Jerusalenmanta llucshirca.

⁸ Paicuna Gabaón pueblo ladopi tiyac jatun rumiman cuchuyacucpimi, Amasaca paicunahuan tupangapac llucshirca. Joabca macanacuna churanata churarishca, shinallatac alli chumbillirishca, cinturapi espadata huarcuchishcami carca. Pai ashtahuan cuchuyacucpimi, espadaca pambapi urmarca.

⁹ Chaipimi Joabca Amasataca: —Ñuca huauquilla, ¿ima shinallatac cangui?— nishpa muchangapac Amasapac alli lado barbaspi japirirca.

¹⁰ Amasaca Joab maquipi espadata charicushcataca mana ricurcachu. Chaipimi Joabca espadata puzunpi satishpa, chunzhullita pambapi tallirca. Chashnami manarac shuc-huan saticpi ña huañurca. Quipataca Joabca paipac huauqui Abisaihuanmi Bicripac churi Sebata huañuchingapac catirca.

¹¹ Chai quipami, Joabpac runacunapuramanta Amasa cuerpo cuchupi shayarishpaca: —¡Maijanpish Joabhuan, jatun mandac Davidhuan caccunaca Joabta catichic!— nirca.

¹² Amasaca chaupi ñanpimi paipac yahuarllapitac cahuirishpa singucurca. Tucui chaita pasaccunami ricushpa shayarirca. Chashna tucui gentecuna ricushpa pasacucpimi, soldadocunaca Amasata ñanmanta ladoyachishpa, pañohuan catachirca.

¹³ Chashna ladoyachishpaca, Bicripac churi Sebata japingapacmi tucui gentecuna Joabpac huashata rirca.

¹⁴ Sebaca tucui Israel aillupac llactata rishpami, Abel-bet-maaca puebloman rishpa, Barim pueblotapish pasashpa rirca. Chai pueblopi causaccunapish tucuimi paihuan rirca.

¹⁵ Chaipi cacpimi, Joabpac gentecunaca Abel-bet-maaca pueblota muyunacushpa chai pueblo jarcachishca canzha ladopi chai pueblota llaquichingapac allpata montonarca. Chashnami Joabpac gentecunaca chai pueblo jarcashca pircata urmachi callarirca.

¹⁶ Chashna ruhuai callaricpimi, chai pueblomanta yuyaisapa huarmi llucshishpaca: —¡Uyaichic! ¡Uyaichic! Joabtaca: Ñucahuan parlangapac caiman shamuchun nichic— nirca.

¹⁷ Chashna nicpimi Joab chai huarmipacman cuchuyacpica: —¿Canchu Joab cangui?— nishpa tapurca. Shina tapucpi paica: —Ari, ñucami cani— nirca. Shina nicpimi, chai huarmica: —Canta servic huarmi, ima nishcata uyai— nirca. Shina nicpimi Joabca: —Ari, uyashallami— nirca.

¹⁸ Shina nicpimi, chai huarmica cutinllatac rimashpaca: —Ñaupa punzhacunapica: “Imata yachasha nishpaca, Abel pueblopimi tapungapac rina” nicmi carca. Chashnami imatapish allichic carca.

¹⁹ Ñucaca cushi causaita munac, israelcunata allita cazucmi cani. Ashtahuanpish canca tucui israelcunapac mama shina pueblotami tucuchisha ningui. ¿Ima nishpatac Mandac Dios cushca pueblotaca tucuchisha ningui?— nirca.

²⁰ Chashna nicpimi Joabca: —¡Caita ruhuanamantaca Dios huacaichichun! Cai pueblota tucuchina, shinallatac chingachina yuyaica mana tiyanchu.

²¹ Mana chaita ruhuangapacchu shamurcani, ashtahuanpish Efraín urcumanta Bicripac churi Sebami jatun mandac Davidhuan macanacungapac shayarirca. Paita japishpa, ñucaman cuichic. Paita cucpica, cai pueblomanta rishallami— nirca. Shina nicpimi, chai huarmica Joabtaca: —Riqui, paipac umataca cai pueblo jarcashca jahuamantami canzhaman shitasha— nirca.

²² Chai huarmica yuyaisapa cashpami tucui genteta ari nichishpa, Bicripac churi Sebapac umata pitishpa, Joabpac ñaupapi shitarca. Chaita ricushpa Joab cornetapi tocacpimi, tucui gentecuna quiquin huasicunaman cutirca. Cutin Joabca Jerusalenmanmi jatun mandacpacman cutirca.

David churashca shuctac mandaccunamanta

²³ Joabmi tucui Israel soldadocunata mandacurca. Cutin Joiadapac churi Benaiasca cereteocunata, peleteocunatami mandacurca.

²⁴ Adoramca impuestota cuccunata mandacmi carca. Ahiludpac churi Josafatca ima tucushcata allichishpa quillcacmi carca.

²⁵ Sevaca quillcacmi carca. Cutin Sadoc shinallatac Abiatarca curacunami carca.

²⁶ Shinallatac Jair pueblomanta Irapish jatun mandac Davidpac curami carca.