2 SAMUEL 2 - Dios Rimashcata Quillcashcami

Judá llactata jatun mandac cachun Davidta acllashcamanta

¹ Chai quipami, Davidca Mandac Diostaca: —¿Judá llacta maijan pueblocunaman huichai rinachu cani?— nishpa tapurca. Shina tapucpi Mandac Diosca: —Huichai rilla— nirca. Shina nicpimi Davidca: —¿Maimantac huichai rina cani?— nirca. Shina nicpimi Mandac Diosca: —Hebrón pueblomanmi rina cangui— nirca.

² Shina nicpimi, Davidca paipac ishcai huarmicunandi huichai rirca. Jezreel pueblomanta Ahinoam, Carmel pueblomanta Nabal huañucpi, cazarashca Abigailmi rirca.

³ Shinallatac paihuan cac runacunatapish paicunapac familiacunandimi pusharcami. Paicunapish Hebrón pueblo muyundipi cac uchilla llactacunapimi causai callarirca.

⁴ Chaipimi Judá llactapi causaccuna shamushpa, aceitehuan cahuishpa, paicunata mandac cachun churarca. Chaipi cacpimi Davidtaca: “Saulta Galaad llacta Jabes pueblopi causaccunami enterrarca” nishpa huillarca.

⁵ Shina huillacpimi, Davidca Galaad llacta Jabes pueblopi causaccunapacman huillaccunata cachashpaca: «Cancunata mandac Saulta llaquishpa enterrashcamantaca Mandac Dios bendiciachun.

⁶ Cunanca, Mandac Dios chashnallatac llaquishpa, imatapish pactachichun. Cancuna chashna ruhuashcamantaca ñucapish imalla allita cancunaman ruhuashami.

⁷ Cunanca, mana manchashpa alli sinchi maquicuna caichicyari. Cancunata mandac Saúl huañushca cacpipish, Judá llacta gentecunaca ñucatami aceitehuan cahuishpa, mandac cachun churarca» nishpa cacharca.

Israelpura macanacushcamanta

⁸ Shina cacpipish Nerpac churi, Saulpac soldadocunata mandac Abnerca Saulpac churi Is-bosetta Mahanaim puebloman pusharca.

⁹ Chaiman pushashpami Galaad llactata, Gesuri llactata, Jezreel pueblota, Benjamín llactatapish, Efraín llactatapish, shinallatac tucui israelcunata mandac cachun churarca.

¹⁰ Saulpac churi Is-boset chuscu chunga huatayuc cashpami israelcunata mandai callarirca. Paica ishcai huatatami israelcunata mandarca. Shina cacpipish, Judá gentecunaca Davidtami catirca.

¹¹ Davidca canchis huata sucta quillatami Judá gentecunataca Hebrón pueblopi mandarca.

¹² Nerpac churi Abnerca Saulpac churi Is-bosetpac serviccunahuanmi Mahanaim pueblomantaca Gabaón puebloman rirca.

¹³ Shinallatac Sarviapac huahua Joabpish, Davidta serviccunapish rishpami Gabaón pueblo cuchupi tiyac uchilla cucha ladopi tupanacurca. Chaipimi shuccunaca shuc ladoman, shuccunaca shuc ladoman shayarirca.

¹⁴ Chaipimi Abnerca Joabtaca: —¡Ñucanchic ñaupapi macanacungapac mosocuna llucshichun!— nirca. Shina nicpimi Joabca: —¡Macanacungapac jatarichic!— nirca.

¹⁵ Shina nicpimi, ishcai ladomanta pacta pacta llucshishpa Saulpac churi Is-bosetmanta, Benjamín aillumantaca chunga ishcai, shinallatac Davidta serviccunamantapish chunga ishcai llucshirca.

¹⁶ Chaipica piñanacucpura umamanta japinacushpa, espadata huicsa satinacushpami tucui mashna huañurca. Chaimantami Gabaón pueblopi tiyac chai allpataca Helcat-hazurim nishpa shutichirca.

¹⁷ Chai punzha macanacuica yalli sinchimi carca. Chaipimi Abnertapish, israelcunatapish Davidpac serviccunaca atirca.

¹⁸ Sarviapac quimsa cari huahuacuna Joabpish, Abisaipish, Asaelpish chaipimi carca. Asaelca sacha taruga shina yallita callpacmi carca.

¹⁹ Shina cashpami Asaelca Abnerta huañuchingapac allimanpish, lluquimanpish mana ladoyashpa catirca.

²⁰ Shina caticucpimi Abner tigrarishpaca: —¿Canca Asaelchu cangui?— nishpa tapurca. Shina tapucpi paica: —Ari, chaitami cani— nirca.

²¹ Chashna nicpimi Abnerca: —Alli ladoman cashpa, lluqui ladoman cashpapish anchurishpa, maijan runata huañuchishpa, ima charishtaca apailla— nirca. Shina nicpipish, Asaelca paita catinata mana saquircachu.

²² Chaimantami Abnerca cutinllatac Asaeltaca: —¡Ama ñucata catichu! Canta huañuchishpa pambapi shitashpaca, ¿ima ñahuihuantac cambac huauqui Joabmanca ricurigrisha?— nirca.

²³ Chashna nicpipish, llaquichingapac catinata mana saquisha nicpimi, Abnerca lanzata huicsapi satishpa lomoman pasachirca. Asaelca chai pamballapitacmi huañurca. Shina huañushca cacpimi, chaita pasaccunaca Asael huañushcata shayarishpa ricurca.

²⁴ Shina cacpipish, Joab, Abisaica Abnerta llaquichingapacmi ashtahuan catircacuna. Gía pueblo chimbapurapi tiyac Amma lomaman chayacpica, ñami inti tigrarca. Gía puebloca Gabaón shitashca pambaman rina ñan cuchupimi carca.

²⁵ Chaipimi Benjaminpac aillucunaca Abnerhuan shuc shinalla tucushpa, urcu jahuapi tandanacurca.

²⁶ Chai pushtumantami Abnerca Joabtaca: —¿Cambac espadahuan huañuchishpa caticugringuillachu? ¿Cai macanacui tucurishca quipa yalli llaqui tiyanataca manachu yachangui? ¿Ima horacamantac cambac gentecunataca paicunapac huauquicunata huañuchishpa caticuchun saquigringuiyari? ¿Ima horatac jarcarigringui?— nishpa caparirca.

²⁷ Shina nicpimi Joabca: —¡Dios causacunmi! ¡Can cariyashpa mana rimashca cacpica, ñuca soldadocunaca pacaringacamanmi paicunapac huauquicunata llaquichingapac catinman carca!— nirca.

²⁸ Chai quipami Joabca paipac soldadocunataca cornetapi tocashpa, ama ashtahuan catichun jarcachirca. Chaipica ña mana ashtahuan macanacurcacunachu.

²⁹ Chai quipami Abnerca paipac runacunandi tucui tuta Arabá llactata rishpa, Jordán yacuta pasarca. Chaita pasashpaca Bitrón pambata rishpami, Mahanaim puebloman chayarca.

³⁰ Joabca Abnerta catinata saquishpami paihuan rishca runacunatami tandachircami. Shina tandachicpica, Davidta serviccunamanta chunga iscun runacunapish, Asaelpish illarcami.

³¹ Ashtahuanpish Davidta serviccunaca Benjaminpac aillumanta Abnerpac runacunataca quimsa patsac sucta chungatami huañuchishca carca.

³² Asaeltaca Belén puebloman apashpami, paipac taita ruhuachishca sepulturapi enterrarca. Chai quipami Joabpish, paipac runacunapish tucui tuta purishpa, ña punzhayanata Hebrón pueblopi chayarca.