2 SAMUEL 19 - Dios Rimashcata Quillcashcami

David Jerusalenman cutishcamanta

¹ Joabmanca: «Jatun mandacca Absalón huañushcamantami huacashpa llaquilla can» nishpa parlarca.

² Chaimantami chai punzhaca macanacuita atishpa cushicunapac randica tucui mashna llaquilla tucurca. Chaica: “Jatun mandacca paipac churi huañushcamantami yallita nanarishca can” nishcatami tucui gentecuna yachac chayarca.

³ Chai punzhapica gentecunaca macanacuimanta miticushpa pingaihuan shamuc shinami, pueblomanca pacalla yaicurca.

⁴ Ashtahuanpish jatun mandac ñahuita quillparishpa, sinchita llaquirishpaca: «¡Ñuca huahua Absalonlla! ¡Absalón ñuca huahualla, ñuca huahualla!» nirca.

⁵ Chashna cacpimi, Joabca jatun mandacpac huasiman yaicushpaca: «Cunanca, cantapish, cambac huarmicunatapish, churicunatapish, ushicunatapish, caishuc huarmicunatapish quishpichic canta serviccunatami pingaichishcangui.

⁶ Canta piñaccunata cuyashpami, canta cuyaccunata piñangui. Chashna ruhuashpaca canta serviccuna, cambac soldadocuna imapac mana valic cashcatami ricuchicungui. Tucui ñucanchic huañushca cacpipish, Absalón causacucpica, cushillami canguiman carca.

⁷ Cunanca, jatarishpa, canzhaman llucshishpa mana llaquihuan cashca shina canta serviccunahuan parlai. Can mana llucshicpica, cunan tutaca shuc runallapish mana canhuan saquiringachu. Chaitaca Mandac Diospac shutipimi nini. Chashna ruhuacpica, can huambramanta pacha llaquicunata charishcata yallimi llaquicunaca japinga» nirca.

⁸ Shina nicpimi, jatun mandacca jatarishpa, pueblo yaicunaman rishpa tiyarirca. Chaipi tiyarishpaca: «Riqui, cai pueblo yaicunapimi jatun mandacca tiyacun» nirca. Shina nicpimi, tucui gentecuna jatun mandacpac ñaupaman shamurca. Ashtahuanpish israelcunaca paicunapac quiquin carpa huasicunamanmi miticushpa rishca carca.

⁹ Shinallatac tucui israelpurapimi: «Jatun mandacca ñucanchicta piñaccunapac, filisteocunapac maquimanta quishpichirca. Cunanca, Absalonta manchashpami miticushpa rishca.

¹⁰ Shina cacpipish, ñucanchic aceitehuan cahuishpa jatun mandac cachun churashca Absalonca huañushcami. Cunanca, ¿ima nishpatac jatun mandacllatatac cutin mandachun mana churashpa upalla canchicyari?» nirca.

¹¹ Chashna parlanacushcataca ñami jatun mandacpac huasipica yachac chayarca. Chaimantami jatun mandac Davidca Sadoc, Abiatar curacunataca: «Judá llacta pushac yuyaccunataca: “¿Ima nishpatac cunanrac jatun mandacta cutichimushun nicunguichic? Ashtahuanpish tucui israelcunami jatun mandactaca paipac huasiman cutichimushunchic nishpa, ña parlanacushca.

¹² Cancunaca ñuca huauquicunallatac, ñuca tullullatac, ñuca aichallatacmi canguichic. ¿Chashna cashca jahuachu cunanrac jatun mandacta cutichimushunchic nicunguichic?” nirca.

¹³ Shinallatac Amasaca: “¿Canca manachu ñuca tullullatac, ñuca aichallatac cangui? Cunanmanta ñaupaman Joabpac randi tucui soldadocunata mandac cachun churacpica, Mandac Diosllatac ñucata llaquichichun ninmi” nigrichic» nirca.

¹⁴ Chashnami Judá llacta gentecunaca tucui mashna shuc yuyailla tucushpa, jatun mandacpacman cachashpaca: «¡Canpish, cambac tucui serviccunapish cutimuichiclla!» nichun cacharca.

¹⁵ Shina nicpi, jatun mandac shamui callarishpaca Jordán yacucamanmi shamurca. Cutin Judá llacta gentecunaca jatun mandac-huan tupashpa, Jordán yacuta pasachingapacmi Gilgal puebloman rirca.

¹⁶ Shinallatac Bahurim pueblopi causac Benjaminpac aillumanta Gerapac churi Simeipish jatun mandac Davidhuan tupangapacmi, Judá llacta gentecunahuan ringapac utca llucshirca.

¹⁷ Paihuanca Benjaminpac aillumanta huaranga runacunami shamurca. Shinallatac Saulpac huiñachishca Sibapish paipac chunga pichca churihuan, ishcai chunga serviccunahuanmi Jordán yacupi jatun mandac-huan tupangapac utca shamurca.

¹⁸ Paica jatun mandacta ayudashpa pasachishpa pai munashcata ruhuangapacmi jatun yacuta pasarca. Jatun mandac Jordán yacuta ña pasagricpimi, Gerapac churi Simeica paipac ñaupapi cumurishpa,

¹⁹ jatun mandactaca: —Can jatun mandac Jerusalenmanta llucshicucpi, canta servic ñuca mana allita ruhuashcata perdonangui. Ama yuyaringuichu. Cai ñuca piñachishcataca ama shungupi huacaichishpa charinguichu.

²⁰ Canta servic ñuca juchallishcatami yuyarini. Chaimantami Josepac familiamantaca ñucarac can jatun mandacta tupangapac shamuni— nirca.

²¹ Chaipimi Sarviapac churi Abisaica: —Mandac Diospac acllashca cangapac aceitehuan cahuishca runata maldiciashcamantaca huañunami can— nirca.

²² Shina nicpimi Davidca: —Sarviapac huahualla, ¿ima nishpatac ñucataca piñanacuipi churashun ninguichicyari? ¿Cancunataca imatatac ruhuashcaniyari? Israelcunata jatun mandacmi cani. Israelpuramantaca shucllapish mana huañungachu— nirca.

²³ Chaimantami jatun mandacca Simeitaca: —Mana huañunguichu— nishpa ari nirca.

²⁴ Shinallatac Saulpac churi Mefi-bosetpish jatun mandacta tupangapacmi urai shamurca. Paica jatun mandac llucshishpa rishca punzhamanta pachami chaquitapish mana jahuashpa, barbastapish mana pitishpa, paipac churanatapish mana tacshashpa cutimungacaman chashna carca.

²⁵ Jatun mandacta Jerusalenpi tupangapac shamucpica, jatun mandacca: —¿Mefi-boset ima nishpatac mana ñucahuan rircangui?— nirca.

²⁶ Shina nicpimi paica: —Jatun mandac ñuca amolla, ñucata servic runami llullarca. Ñucaca: “Canta servic ñucaca lisiado cashpami, burropi montashpa, jatun mandac-huan ringapac parejai” nircani.

²⁷ Ashtahuanpish paimi canta servic ñucataca can jatun mandacpac ñaupapi llullashca. Ashtahuanpish jatun mandacca ángel shinami cangui. Shina cashcamanta cambac ima alli cana cashcata ruhuailla.

²⁸ Ñuca taitapac huasi ucupuraca tucuimi can jatun mandacpac ñaupapi huañuna carca. Shina cashpapish ñucata mana huañuchishpa, canta servic ñucataca cambac cayashcacunahuan micuchun mizapi churarcangui. Cunanca, can jatun mandacman imata ashtahuan mañanatapish mana pudinichu— nirca.

²⁹ Shina nicpimi, jatun mandacca: —Canmantaca ashtahuan imata mana nisha ninichu. Canhuan Sibahuan allpata chaupinacuichiclla— nirca.

³⁰ Shina nicpimi, Mefi-bosetca jatun mandactaca: —¡Allpataca tucui pai japichunlla! ¡Ñuca jatun mandac ima mana tucushpa huasiman cutimushcamantaca ñucaca cushicunimi!— nirca.

³¹ Shinallatac galaditapuramanta Rogelim pueblo causac Barzilaica jatun mandacta Jordán yacuta pasachishpa, caya minchacaman ningapacmi shamurca.

³² Barzilaica pusac chunga huatayuc ña yuyacmi carca. Mahanaim pueblopi jatun mandac miticushca cacpica, tucui ima illashcatami cuc carca.

³³ Chaimantami jatun mandacca Barzilaitaca: —Ñucahuan Jerusalemman jacu. Ñucami cantaca ayudashpa charisha— nirca.

³⁴ Shina nicpi, Barzilaica jatun mandactaca: —Jatun mandac-huan Jerusalenman huichai rishpa achca huatacunata causangapacca asha huatacunata charini.

³⁵ Ñucaca pusac chunga huatayucmi cani. Ima sumac micuicunapish, ubianacunapish ñucamanca imalaya cashca mana yacharinchu. Shinallatac caica mishquimi, jayacmi ninataca mana pudinichu. ¿Caricuna, huarmicuna cantashcatapish uyai pudishachu? Canta servic ñucaca maitatac jatun mandactaca llaquichishpa causagrishayari.

³⁶ ¿Imamantatac can jatun mandacca ñucaman cai convidanata cusha ninguiyari? Canta servic ñucaca Jordán yacuta pasangacamanmi rigrini.

³⁷ Canta servic ñucataca ñuca causana puebloman rishpa, ñuca taitata, mamata enterrashca ladopi enterraringapac saqui. Ashtahuan canta servic ñuca churi Quimammi caipi, pai can jatun mandac-huan richun, paiman ima allita cuna cacpica cuilla— nirca.

³⁸ Shina nicpimi, jatun mandacca: —Shina cashpaca Quimam ñucahuan richun. Paimanmi ima allicunatapish cugrini. Shinallatac can ima mañashcatami cusha— nirca.

³⁹ Shinami tucui gentecunapish, jatun mandacpish Jordán yacuta pasarca. Quipataca jatun mandac Barzilaitapish muchashpa bendiciashpami, paipac huasiman cacharca.

⁴⁰ Chai quipami jatun mandacca Quimamta pushashpa, Gilgal puebloman rirca. Tucui Judá gentecunapish, chaupi cac israelcunapish jatun mandacta compañashpami pasarca.

⁴¹ Chashna cacpica, tucui israelcunami jatun mandacpacman shamushpaca: —¿Ima nishpatac ñucanchic huauqui Judá gentecunaca jatun mandactapish, paipac familiatapish, paita caticcunatapish shuhuac shina Jordán yacuta pasachircacuna?— nirca.

⁴² Shina nicpimi, Judá gentecunaca israelcunataca: —Jatun mandacca ñucanchic cuchulla familiami. Shina cashpapish, ¿imamantatac cancunaca piñaringuichic? ¿Ñucanchicca jatun mandacmantachu causanchic? ¿Mana cashpaca paimantachu imata japishcanchic?— nirca.

⁴³ Shina nicpimi, israelcunaca Judá gentecunataca: —Ñucanchicmi jatun mandacmantaca chunga cutin yallita japinata charinchic. Paipac aillupura cashcamantacarin ashtahuanmi japina canchic. Chashna cacpica ¿Ima nishpa ñucanchicta yangalla cashcata yuyanguichic? ¿Manachu ñucanchic jatun mandactaca cutichun nircanchic?— nirca. Shina nicpimi, Judá gentecunaca israelcunataca yallimana sinchita rimarca.