2 SAMUEL 15 - Dios Rimashcata Quillcashcami

Absalón Davidta llaquichingapac jatarishcamanta

¹ Chai quipami Absalonca macanacuna carretacunata, caballocunata randirca. Shinallatac paita cuidac pichca chunga soldadocunatapish tandachircami.

² Absalonca utca jatarishpami, puebloman yaicuna ñanpi shuyagrirca. Chaipimi maijan piñanacushpa, ima llaquihuan cashpa jatun mandacta allichichun mañac shamuccunataca: «¿Maijan pueblomantatac canguichic?» nishpa tapuc carca. Shina tapucpimi maijancunaca «Canta servic ñucaca Israel aillupuramantami cani» nic carca.

³ Shina nicpimi Absalonca: «Canca allitami mañac shamungui. Shina cacpipish, jatun mandacpuramantaca mañashcata uyacca pipish mana tiyanchu» nic carca.

⁴ Shinallatac Absalonca: «Ñuca juez cashpachari alli caiman. Ima piñanacushcata, ima llaquicunatapish allichichun mañac shamuccunataca cashcata ruhuashpami allichiman» nic nirca.

⁵ Maijan chayarishpa, paipac ñaupapi cumuriccunataca maquita chutashpami ucllarishpa muchac carca.

⁶ Ima piñanacushcatapish, ima llaquicunatapish allichichun jatun mandacman mañan shamuccunataca tucui israelcunatami chashna ruhuarca. Chashnami tucui israelcunapac cuyashca tucurca.

⁷ Chuscu huata quipami Absalonca jatun mandactaca: —Mandac Diosman cusha nishcata cungapac Hebrón puebloman richun saqui.

⁸ Canta servic ñucaca Siria llacta Gesur pueblopi cashpami Mandac Diostaca: “Can Jerusalenman cutichicpica, canta servishami” nircani— nirca.

⁹ Shina nicpimi jatun mandacca: —Shinashpaca mana manchashpa rilla— nirca. Shina nicpimi, Absalonca jatarishpa Hebrón puebloman rirca.

¹⁰ Ashtahuanpish Absalonca chai punzhallatac tucui Israel aillucunapacman huillaicunata cachashpaca: «Corneta tocashca uyaricpica: “Cai Hebrón pueblopica Absalontami mandac cachun acllashca” nichun yachachinguichic» nirca.

¹¹ Absalonhuanca ishcai patsac gentecunatami Jerusalenmanta cayashpa aparirca. Paicunaca imata ruhuagricushcata mana yachashpami rirca.

¹² Absalonca Diosman animalta cushpa rupachicushpaca, Davidta cunaccunapuramanta Gilo pueblomanta Ahitofel yuyac runatami cayachun cacharca. Shinami Absalonca jatun mandac-huan piñanacushpa cariyangapac huashalla allichirirca. Absalonta caticcunapish ashtahuan miraricpimi, jatun mandacta llaquichinaca ashtahuan sinchiyarca.

David Jerusalenmanta miticushpa rishcamanta

¹³ Shuc huillac runa Davidman huillangapac shamushpaca: «Israelcunaca tucuimi Absalonta cati callarincuna» nirca.

¹⁴ Chaita uyashpami jatun mandac Davidca Jerusalenpi paita servic runacunataca: —Cunanllatac miticungapac jacuchic. Absalontaca mana atishunchu, utca rishun. Mana utca ricpica, pacta ñucanchicta caipi japishpa jatun llaquita ruhuashpa, cai pueblopi causaccunata espadahuan tucuita huañuchinman— nirca.

¹⁵ Shina nicpimi paicunaca: —Ñucanchicca can jatun mandac ima nishcataca ruhuashunllami— nirca.

¹⁶ Shina nishpami, paipac tucui familiacunahuan rirca. Paipac caishuc chunga huarmicunallatacmi mandana huasita cuidachun saquirca.

¹⁷ Shina llucshishpaca, tucui paihuan riccunandimi jatun mandacca chai pueblo tucuri huasipi shayarirca.

¹⁸ Chaipimi pai churashca tucui mandaccunaca paipac muyundipi shayarirca. Chaipica cereteocunapish, peleteocunapishmi carca. Gat pueblomanta paihuan shamushca sucta patsac geteocunami jatun mandacpac ñaupata rirca.

¹⁹ Chaipimi jatun mandac Davidca geteocunapuramanta Itai runata cayashpaca: —¿Imapactac canpish ñucanchic-huan shamungui? Canca shuctac llactamanta llucchishpa cachacpi, shamushcallami cangui. Chaimanta caishuc mandac-huan saquiringapac cutilla.

²⁰ Canca cainallami shamurcangui. ¿Ima shinatac cantaca ñucahuan jacu nishayari? Ñucapish maiman ricushcata mana yachanichu, ashtahuanpish cutishpa rilla. Cambac ricsishcacunatapish pushashpa ri. Mandac Dios canta maiman ricpipish pushachun— nirca.

²¹ Shina nicpimi Itaica: —¡Mandac Diosmantami nini! ¡Canta servic ñucaca maipi huañuna cacpipish, causana cacpipish, can jatun mandac-huanmi casha!— nirca.

²² Shina nicpimi, Davidca Itaitaca: —Shinashpaca ñucanchic-huan ringapac shamuilla— nirca. Shina nicpimi, geteopuramanta Itaica jatun mandac Davidhuan shinallatac tucui paihuan caccunahuan rirca.

²³ Tucui gentecuna chaita pasacucpica, paicunaca munai caparishpami huacacurca. Chashnami jatun mandacca paihuan cac gentecunandi Cedrón yacuta pasashpa, shitashca pambaman rirca.

²⁴ Shinallatac chai ñantaca Sadocpish tucui levitacunandi Dios ari nishca quillcata huacaichina Arcata huandushcami rirca. Shina rishpami, tucui gentecuna Jerusalenmanta llucshingacaman pamballapi samachirca. Ña tucui gentecuna puebloman llucshishca quipami Abiatarpish llucshirca.

²⁵ Ashtahuanpish jatun mandacca Sadoc curataca: —Diospac Arcataca Jerusalenllamantac cutichishpa apailla. Mandac Diospac ñaupapi ñuca alli ricuricpi, paillatac cutichimucpica, Arcatapish, Dios-huan tupana huasitapish ricushallami.

²⁶ Shina cacpipish: “Canca ñuca ñaupapi mana allichu cangui” nicpica, caipimi cani. Pai munashca shina imatapish ruhuachunlla— nirca.

²⁷ Shinallatac jatun mandacca Sadoc curataca: —¿Manachu canca Dios ricuchishcata huillac cangui? Mana manchashpa cancunapac churicunahuan puebloman cutichiclla. Cambac churi Ahimaaspish, Abiatarpac churi Jonatanpish richiclla.

²⁸ Ñucaca shitashca pambapimi cancuna allita huillangacaman casha— nirca.

²⁹ Chashna nicpimi, Sadoc curapish, Abiatarpish Diospac Arcata Jerusalenman apashpa chaipi saquirirca.

³⁰ Davidca llaquillami umata quillparishpa, lluchu chaquilla huacashpa olivos yuracuna tiyac huichaita llucshirca. Shinallatac tucui paihuan caccunapish umata quillparishpa huacashpami huichai llucshirca.

³¹ Shina ricucpimi Davidmanca: «Ahitofelpish Absalonhuan tucushpami llaquichingapac allichiricun» nishpa huillarca. Chaita uyashpami Davidca: «Mandac Dioslla, Ahitofel mana allita ruhuasha nicushcata ruhuachunca amatac saquinguichu, ashtahuanpish paitaca urmachingui» nishpa mañarca.

³² David utcaman mañac cashca shinallatac urcupi Diosta mañacucpimi, arquitapuramanta Husaica churanapish lliquishca, umapish allpalla tupac shamurca.

³³ Shina shamucpimi Davidca: —Can ñucahuan ricpica, ashtahuanmi ñucamanca llaqui canga.

³⁴ Ashtahuanpish Jerusalenllamantac cutishpa Absalontaca: “Cambac taitata servic cashca shinallatacmi cunanca canta servisha nini” ningui. Chashna nishpami Ahitofel ayudasha nicushcataca chingachingui.

³⁵ Sadoc curapish, Abiatar curapish chaipimi canga. Canca jatun mandac mandashpa tiyana huasipi imalla tucushcata yachashpaca, Sadoc shinallatac Abiatar curacunaman huillangui.

³⁶ Riqui, Sadoc curapac churi Ahimaaspish, Abiatarpac churi Jonatanpish chaillapitacmi cancuna. Paicunata can tucui ima uyashcataca huillachun cachangui— nirca.

³⁷ David chashna nicpimi, paihuan apanacuc Husaica Jerusalenman cutishpa rirca. Absalonpish chai puebloman chayarcami.