2 SAMUEL 13 - Dios Rimashcata Quillcashcami

Amón Tamarta japirishcamanta

¹ Davidpac churi Absalonca shuc alaja ñahui Tamar panitami charirca. Chaitami Davidpac churi Amnonca yallita munarca.

² Paipac pani Tamarca pi carihuan manarac chayarishcachu carca. Shina cacpimi, Amnonca imatapish mana ruhuai pudishpa, ungungacaman chai yuyailla purirca.

³ Amnonca Davidpac huauqui Simeapac churi Jonadabhuanmi apanacuccuna carca. Jonadabca yuyaisapami carca.

⁴ Jonadab tapushpaca: —Jatun mandacpac churilla, ¿ima nishpatac punzhanta chashna tulluyashpa ricunguiyari? ¿Ima nishpatac ñucamanca ima tucushcata mana parlangui?— nirca. Shina nicpimi Amnonca: —Ñucaca, ñuca huauqui Absalonpac pani Tamartami yallita munani— nirca.

⁵ Shina nicpimi Jonadabca: —Unguc tucushpa, cambac camapi siriri. Cambac taita ricuc shamucpica: “Ñucaman carangapac ñuca pani Tamar shamushpa, ñuca ñaupapi micunata ruhuashpa, paipac maquihuan carachunmi munani” ningui— nirca.

⁶ Shinami Amnonca unguc tucushpa, camapi siririrca. Chashna siricucpimi, jatun mandac ricuc shamucpimi Amnonca: —Ñuca paipac maquimanta micungapac, Tamar shamushpa, ñuca ñaupapi ishcai tortata ruhuachun cachashpa cui— nirca.

⁷ Shina nicpimi, Davidca Tamarta paipac huasiman cachashpaca: —Cambac turi Amnonpac huasiman rishpa, micunata ruhuashpa carai— nirca.

⁸ Tamar rishpami, paipac turi ungushca siricuc huasiman chayashpa, harinata chapushpa tortata paipac ñaupapi ruhuashpa cusarca.

⁹ Chai quipaca tortata sartendi apashpami, micuchun paiman curca. Shina cucpipish, mana micusha nishpami Amnonca: “Tucui caipi caccunata canzhaman llucshichun ni” nirca. Shina nicpimi, tucui gentecuna llucshirca.

¹⁰ Shina llucshicpimi, Amnonca paipac pani Tamartaca: «Cambac maquimanta ñuca micungapac cai camaman apamui» nirca. Shina nicpimi, Tamarca pai cusashca tortataca paipac turi Amnón sueñuna ucuman aparca.

¹¹ Pai micuchun cungapac chayaricpi pai japirishpaca: —Ñuca pani shamui ñucahuan sueñungui— nirca.

¹² Shina nicpica: —¡Turilla, ama chashna ruhuaichu! ¡Ñucanchic israelcunapurapica mana chai millaita ruhuanachu canchic! ¡Ama millaita ruhuaichu!

¹³ ¿Chashna millaita ruhuashca jatun pingaihuanca maimantac rishayari? Cantapish israelcunapurapica, jatun millaita ruhuacmi ningacunami. Chaimanta canllatac jatun mandac-huan parlagri. Jatun mandacca canhuan cazarachun mana jarcangachu— nirca.

¹⁴ Shina nicpipish, Amnonca mana uyashpami pai ashtahuan fuerzata charishcamantaca atishpa, uyai mana uyaita Tamarpi chayarirca.

¹⁵ Chai quipaca, yallitami Tamartaca millashpa piñai callarirca. Pai utcaman cuyashcatapish, yallimi piñai callarirca. Shina piñashpami Tamartaca: —¡Jatari, caimanta ri!— nirca.

¹⁶ Shina nicpimi Tamarca: —¡Ama chashna nichu! Ñucata llucchishpa cachashpaca, ñucahuan chayarishpa millaita ruhuashcata yallimi millaita ruhuagringui— nirca. Shina nicpipish, mana uyasha nircachu.

¹⁷ Ashtahuanpish servicta cayashpaca: —¡Cai huarmita caimanta llucchi, punguta huichcai!— nirca.

¹⁸ Tamarca tucuilaya color churanata churarishcami carca. Chashnami carihuan manarac chayarishca jatun mandacpac ushicunaca churaric carca. Amnonta servicca Tamarta ucumanta llucchishcahuanmi punguta huichcarca.

¹⁹ Chaimantami Tamarca uchupata umapi churarishpa, tucuilaya color churanata lliquirishpa ishcai maquita uma jahuapi churashpa, caparishpa rirca.

²⁰ Shina ricucpimi, paipac turi Absalonca: —¿Cambac turi Amnonchu chaita ruhuan? Shina cacpica, ñuca panilla, ama huacaichu. Upalla cai, paica turillatacmi. Chaimantaca ama yallimana llaquiricuichu— nirca. Tamarca paipac turi Absalonpac huasipimi llaquilla saquirirca.

²¹ Jatun mandac David chaita yachac chayashpaca, yallitami piñarirca.

²² Cutin Absalonca ima allitapish, mana allitapish imata mana nircachu. Shina cashpapish paipac panita chaita ruhuashcamantaca piñacmi carca.

Absalón, Amnonta huañuchishcamanta

²³ Ishcai huata quipami Absalonta serviccunaca Efrainpac pueblo cuchulla Baal-hazor pambapi ovejacunata rutucurca. Chaipimi Absalonca tucui jatun mandacpac churicunata cayashpa jatun micuita ruhuarca.

²⁴ Chaipimi Absalonca jatun mandac Davidpacman rishpaca: —Canta servic ñucami ovejacunata rutuchicuni. Chaimanta can jatun mandacpish, can churashca mandacpish, canta serviccunapish ñuca huasiman shamuichic— nirca.

²⁵ Shina nicpi, jatun mandacca Absalontaca: —Mana, ñuca huahualla, tucui ñucanchic rishpa, canta yallita gashtachinaca mana allichu canga— nirca. Mashnata jacu nicucpipish, jatun mandacca mana risha nishpami, paita bendiciarca.

²⁶ Chaimantami Absalonca: —Quiquin mana risha nishpaca, ñuca huauqui Amnonllatapish cachaiyari— nirca. Shina nicpimi, jatun mandacca: —¿Imapactac Amnonta apasha ninguiyari?— nirca.

²⁷ Chashna Absalón cachachun nicucllapitacmi jatun mandacca Amnontapish, tucui churicunatapish paihuan richun saquirca.

²⁸ Ña utcamanmi Absalonca paita serviccunataca: «Amnón vinota ubiashpa yallita cushilla tiyacucpi, ñuca señata ruhuashpa: “¡Amnonta chugrichichic!” nicpica huañuchinguichiclla. Ñucami mandani. Chaimanta ama manchashpa sinchi sinchi caichic» nishcami carca.

²⁹ Absalonta serviccunaca pai nishca shinallatacmi Amnontaca ruhuarca. Shina ruhuacpimi, jatun mandacpac tucui churicuna jatarishpaca mulacunapi montashpa miticushpa rirca.

³⁰ Paicuna ñanpi cacpiracmi Davidca: «Jatun mandacpac tucui churicunatami Absalonca huañuchishca. Shucllapish mana saquirishcachu» nishcata uyarca.

³¹ Chaita uyashpa David jatarishpaca, churanata lliquirishpami allpapi siririrca. Paita serviccunapish shinallatacmi churanata lliquirirca.

³² Chaimantami Davidpac huauqui Simeapac churi Jonadabca: —Jatun mandaclla, tucui cambac churicuna huañushca cashcataca ama yuyaichu. Amnonllami huañushca canga. Paitaca Absalonmi paipac pani Tamarpi chayarishca punzhamanta pacha huañuchisha nicurca.

³³ Chaimanta jatun mandaclla, maijan: “Jatun mandacpac tucui churicunami huañushca” nishcata ama crichu. Ashtahuanpish Amnonllami huañushca canga

³⁴ Absalonca miticushpami rishca canga. Torre jahuapi chapac runa huichai rishpaca, jahua urcu lado ñanta achca gentecuna shamucuctami ricurca.

³⁵ Shina cashpami Jonadabca jatun mandactaca: —Riqui, canta servic ñuca huillashca shinallatacmi can jatun mandacpac churicunaca shamucun— nirca.

³⁶ Pai ña rimanata tucuchincami jatun mandacpac churicuna chayamushpaca, caparishpa huacai callarirca. Shinallatac jatun mandacpish, paita serviccunapish llaquillatami huacarca.

³⁷ Cutin Absalonca Gesur pueblota jatun mandac Amiudpac churi Talmaipacmanmi miticushpa rirca. Davidca tucui punzhacunami paipac churi Amnonta huañuchishcamantaca huacacurcalla.

³⁸ Absalonca chashna miticushpa rishpaca, quimsa huatatami chai Gesur pueblopi causarca.

³⁹ Jatun mandac Davidca Amnón huañushcamanta ña cungarishpami, Absalonta ricuna munaihuan carca.