2 SAMUEL 12 - Dios Rimashcata Quillcashcami

Natán Davidta rimashcamanta

¹ Mandac Dios Natanta Davidpacman cachacpi, pai rimashpaca: —Shuc pueblopimi, ishcai runacuna tiyarca. Shucca chayuc, cutin caishucca huacchami carca.

² Chayuc runaca achca vacacunata, achca ovejacunatami charirca.

³ Cutin caishuc huaccha runaca shuclla ovejatami randishpa huiñachirca. Chai ovejaca paihuan, paipac huahuacunahuanmi huiñacurca. Chaimantami chai platollamantatac micushpa, chai vasollamantatac ubiashpa, paipac rigrallapitac sueñushpa huiñacurca. Chai ovejaca chai runamanca shuc ushi shinami carca.

⁴ Chayuc runapacmanmi shuctac llacta runa chayamurca. Shuctac llacta runaman carangapacca paipac ovejacunamantapish, vacacunamantapish mana huañuchisha nircachu. Chaipac randica huaccha runapac shuclla ovejatami huañuchishpa yanushpa shuctac llacta runamanca cararca— nirca.

⁵ Shina nicpimi, Davidca chai chayuc runahuanca nina japiric shina piñarishpa Natantaca: —¡Mandac Diospac shutipimi nini: Maijan chaita ruhuacca huañunatacmi can!

⁶ Shinallatac huaccha runata mana llaquishpa, paipac shuclla ovejata huañuchishcamantaca chuscu ovejatami cutichina can— nirca.

⁷ Shina nicpimi, Natanca Davidtaca: —Chai runaca canllatacmi cangui. Israelcunata Mandac Diosca: “Ñucami aceitehuan cahuishpa, israelcunata mandac cachun churarcani. Cambac amo Saulpac maquimantapish quishpichircanimi.

⁸ Cambac amopac mandanatapish, paipac huarmicunatapish canman curcani. Shinallatac Israel llactatapish, Judá llactatapish can mandachun curcanimi. Chaicunata cushca jahuapish, ashtahuan mirachishpami cuiman carcani.

⁹ ¿Ima nishpatac ñuca nishcataca mana uyashpa, ñucapac ñaupapi mana allita ruhuarcangui? Heteopuramanta Uriaspac huarmita japingapacmi Uriastaca huañuchircangui. Canca Amón llacta gentecunapacman cachashpami huañuchichishcangui.

¹⁰ Cunanca ñuca nishcata mana uyashpa, heteopuramanta Uriaspac huarmita japishpa, millaita ruhuashcamantaca cambac huasi ucupurapica huañuica jaicapi mana illangachu” nirca.

¹¹ Mandac Diosca: “Cambac huasi ucupurallamantatacmi canta piñaccunaca llucshinga. Cambac ñaupallamantatacmi cambac huarmicunataca shuctac runacunahuan punzha pacha chayarichun apasha.

¹² Canca pacallami chashna ruhuarcangui. Ashtahuanpish, ñucaca tucui israelcuna ricucucpi, achic punzhapimi chashna ruhuachun saquisha” ninmi— nirca.

¹³ Shina nicpimi, Davidca Natantaca: —Chashna juchallishpaca, Mandac Diosta piñachishcanimi— nirca. Shina nicpimi, Natanca: —Mandac Diospish cambac juchata perdonashcami. Chaimanta mana huañunguichu.

¹⁴ Ashtahuanpish can chashna mana allita ruhuashpaca, Mandac Diostami paita piñaccunaman rimachishcangui. Chaimanta can, cai huarmipi charishca huahuaca huañungatacmi— nirca.

¹⁵ Chai quipaca, Natanca huasiman cutircallami. Mandac Diosca Uriaspac huarmipi David charishca huahuataca yallitami unguchirca.

¹⁶ Chaimantami Davidca huahuamanta Diosta mañarca. Chashnami ayunashpa, ucuman yaicushpa, Mandac Diosta mañashpa tucui tuta pambapi pacarirca.

¹⁷ Shina cacpimi, mandashpa tiyana huasipi causac yuyaccunaca jatarichingapac rirca. Ashtahuanpish paica mana pambamanta jatarisha nircachu. Shinallatac paicunahuanpish mana micusha nircachu.

¹⁸ Ña canchisniqui punzhapica huahuaca huañurcami. Davidta serviccunaca: «Paica huahua causacucpipish, ñucanchic rimashcata mana uyasha nircachu. ¿Cunanca ima shinatac huahua huañushcataca huillashunyari?» Caita huillacpica, imapish tucungami nishpa mancharca.

¹⁹ Ashtahuanpish Davidca paita serviccuna paicunapura mancharinacucucta ricushpami, paipac huahua huañushca cashcata yuyarca. Shina yuyashpami, Davidca paita serviccunataca: —¿Huahuaca ñachu huañun?— nishpa tapurca. Shina nicpimi paicunaca: —Ari, ña huañunmi— nirca.

²⁰ Chaita uyashpami, Davidca pambamanta jatarishpa, armarishpa aceitehuan cahuirishpa, shuctac churanata churarishpa, Mandac Diospac huasiman yaicushpa, Mandac Diosta alli nirca. Chai quipaca paipac huasiman rishpami, micunata mañashpa micurca.

²¹ Chaipimi paita serviccunaca: —¿Imatatac ruhuacungui? Huahua causacucpica, ayunashpa huacacurcanguimi. Cunan ña huañucpica, jatarishpa micunguimi— nirca.

²² Shina nicpimi Davidca: —Ñucaca huahua causacucpica: “Mandac Dios ñucata llaquicpica, huahuaca manapishchari huañunga” yuyashpami, ayunashpa huacacurcani.

²³ Ashtahuanpish cunan ña huañushca quipaca, ¿imapactac ayunasha? ¿Chashna huacashpaca causachishachu? ¡Ashtahuanpish ñucami paipacman risha, paica mana ñucapacman cutingachu!— nirca.

Salomón huacharishcamanta

²⁴ Chaimanta rishpaca, Davidca paipac huarmi Betsabeta cushichingapacmi rirca. Chashna cushichishpa, paipi chayaricpimi, Betsabeca huicsayuc tucushpa, shuc cari huahuata charirca. Chai huahuataca Salomontami shutichirca. Chai huahuata Mandac Diosca cuyashpami,

²⁵ Diosmanta huillac Natanta Davidpacman cachashpa, chai huahuataca Jedidiasta shutichirca. Mandac Diosta cazushcamantami chaita shutichirca.

Davidca Rabat-amón pueblota japishcamanta

²⁶ Joabca Rabá pueblopi causac amonitacunahuan macanacushpami, jatun mandac causana pueblota quichurca.

²⁷ Chaipi macanacushpami, Joab huillaccunata Davidpacman cachashpaca: «Rabá pueblopi causaccunahuanmi macanacurcani. Yacu jundu tiyac uchilla pueblotapish quichurcani.

²⁸ Chaimanta can jatun mandaclla, soldadocunata tandachishpa, cai pueblota japingapac shamui. Ashtahuanpish ñucalla cai pueblota mishashpa japicpica, ñuca shutitami chai pueblotaca churanga» nichunmi cacharca.

²⁹ Shina huillacpimi, Davidca tucui soldadocunata tandachishpa, Rabá puebloman rishpa, macanacushpa chai pueblota japirca.

³⁰ Chai pueblopi jatun mandacpac shuc talento llashac curita charic, sumac rumicunata churashca coronata japishpami, Davidman churachirca. Davidca chai pueblopi tiyac achca valic charinacunatapish apamurcami.

³¹ Chai pueblopi puchushca gentecunataca fierro sierrahuan, fierro trillanahuan, fierro hachacunahuan trabajachunmi churarca. Shinallatac hornopi ladrillota ruhuachunpishmi churarca. Chashnallatacmi Amón llactapi causac tucui gentecunatapish trabajachirca. Chai quipami, Davidca tucui soldadocunahuan Jerusalenman cutirca.