2 SAMUEL 11 - Dios Rimashcata Quillcashcami

Davidmantapish, Betsabemantapish

¹ Chai quipa huatami tucui jatun mandaccuna macanacuiman llucshina punzha chayacpi, Davidca Joabta paita serviccunahuan, tucui israelcunahuan Amón llactapi macanacuchun cacharca. Shina cachacpimi, Amón llacta gentecunata tucuchishpa, Rabá pueblota japingapac chai pueblo muyundita shayarirca. Shina cacpipish, Davidca Jerusalenpimi saquirirca.

² Shuc punzha ña chishiyanatami Davidca camamanta jatarishpa, pai mandana huasi alto pambapi puricushpa shuc huarmi armaricucta ricurca. Chai huarmica alajami carca.

³ Shina ricushpami, Davidca pi cashcata tapuchun cacharca. Chashna tapucpi maijancunaca: «Manachu paica heteopuramanta Uriaspac huarmi Eliampac ushi Betsabé» nirca.

⁴ Chashna huillacpimi, Davidca paita serviccunata chai huarmita pushachun cacharca. Ña pushamucpica, Davidca chai huarmipi chayarircami. Chai quipaca, chai huarmica huasiman cutishpa rircallami. Chai huarmica quilla ungüi pararishca cacpi, mapa illac cangapacmi armaricurca.

⁵ Chaimantami chai huarmica huicsayuc tucushpa, Davidpacman huillaccunata cachashpaca: «Ñucaca huicsayucmi cani» nichun cacharca.

⁶ Chaita uyashpami, Davidca Joabpacman cachashpaca: «Heteopuramanta Uriasta ñucapacman cachai» nichun cacharca. Chaita uyashpami, Joabca Uriastaca Davidpacman cacharca.

⁷ Urías ña Davidpacman chayamucpica, Davidca: «¿Joabca chai macanacuipica allillachu? ¿Israelcunapish allillachu? ¿Ima shinatac chai macanacuipica cancuna?» nishpa tapurca.

⁸ Chashna tapushca quipaca Uriastaca: «Huasiman rishpa, chaquicunata maillarigri» nirca. Chashna cachacpi, mandashpa tiyana huasimanta Urías llucshishpa rishca quipaca, micunatami carachun cacharca.

⁹ Chashna cachacpipish, Uriasca huasiman mana rishpami, jatun mandac tiyana huasita cuidac soldadocunahuan pungupi pacarirca.

¹⁰ Chaimantami Davidmanca: «Uriasca mana huasiman rishcachu» nishpa huillarca. Shina huillacpimi, Davidca Uriastaca: —Canca, ¿manachu carumanta shamurcangui? ¿Ima nishpatac cambac huasiman mana rircangui?— nishpa tapurca.

¹¹ Shina tapucpimi Uriasca: —Arcapish, Judá llacta runacunapish, israelcunapish carpa huasillapimi tiyacun. Ñucata mandac Joabpish, shinallatac can jatun mandacta servic caishuccunapish canzha carpa huasillapimi sueñuncuna. Chaita ricushca jahuaca imata ñucaca huasiman rishpa, alli micushpa, alli ubiashpa, huarmihuan sueñushpa cagrishayari. ¡Can jatun mandacpac causaimantapish, cambac almapac causaimantapish caitaca manatac ruhuashachu!— nirca.

¹² Chashna nicpimi, Davidca Uriastaca: —Shinashpaca, cunan tutapish caipi saquirilla, cayaca huasiman ringuillami— nirca. Shina nicpimi, Uriasca chai punzhapish, cayandi punzhapish Jerusalenpi saquirirca.

¹³ Davidca, Uriastaca paihuan micuchun, ubiachun cayashpami machachirca. Shina machashpapish, huasiman mana rishpami, jatun mandacpac huasita cuidac soldadocunahuan paipac camallapitac sueñurca.

¹⁴ Chai cayandi tutamanta Davidca Joabman cachangapac shuc quillcata quillcashpami, Uriasta saquichun cacharca.

¹⁵ Chai quillcashcapica: «Uriasta ashtahuan sinchita macanacuc pushtuman pushanguichic. Paita chaipi chugrichishpa huañuchichun, cancunaca shitashpa anchuringuichic» nishpami quillcashca carca.

¹⁶ Chashnami Joabca macanacungapac pueblota muyushpa shayarishpaca, Uriastaca sinchi soldadocuna chapacuc pushtupi churarca.

¹⁷ Chai quipami, chai pueblopi causaccunaca Joabhuan macanacungapac llucshirca. Chaipimi, Davidta maijan serviccunapish, heteopuramanta Uriaspish huañurca.

¹⁸ Chaimantami Joabca macanacuipi tucui ima tucushcata mandac Davidman huillachun cacharca.

¹⁹ Joab huillacta cachacushpaca: «Cai macanacuipi ima tucushcata jatun mandacman huillacpi,

²⁰ jatun mandac piñarishpa: “¿Ima nishpatac puebloman yallita cuchuyashpa macanacurcanguichic? ¿Manachu paicuna pirca jahuamanta imatapish cacharishpa, huañuchinataca yacharcanguichic?

²¹ ¿Pitac Jerobalpac churi Abimelectaca huañuchirca? ¿Manachu huarmi pirca jahuamanta cutana rumita paipac jahuapi cacharicpi, paica Tebes pueblopi huañurca? ¿Ima nishpatac pueblo pircamanca yallita cuchuyarcanguichic?” nicpica, canca: “Heteopuramanta canta servic Uriaspish huañurcami” ningui» nirca.

²² Chai huillac Davidpacman chayashpaca, Joab ima nishcatami tucuita huillarca.

²³ Chai huillac Davidman huillashpaca: —Chai pueblomanta macanacuc runacuna llucshishpami, ñucanchic-huan pambapi sinchita macanacurca. Shina cacpipish, ñucanchicmi paicunata atishpa, chai pueblo yaicunacaman catircanchic.

²⁴ Shina cacpipish, flechata cacharic runacunami pueblo jarcashca pirca jahuamanta flechata shitashpa jatun mandacta serviccunata huañuchirca. Shinallatac canta servic heteopuramanta Uriaspish huañurcami— nirca.

²⁵ Shina nicpimi, Davidca huillac runataca: —Joabtaca: “Ama yallita llaquirichu. Espadaca maijan cutinca caishuc ladota, maijan cutinca chaishuc ladotami tucuchin. Canca ashtahuan sinchita macanacushpa, chai pueblota tucuchilla” nircami. Shinallatac canpish, ashtahuan yuyaita cungui— nirca.

²⁶ Uriaspac huarmi cusa huañushcata yachashpaca, paipac cusa huañushcamantami llaquilla carca.

²⁷ Ña duelo cana punzhacuna tucuricpimi, Davidca pai mandashpa causana huasiman pushamuchun cacharca. Shina pushamucpimi, chai huarmica shamushpa, Davidpac huarmi tucushpa, shuc cari huahuata charirca. Ashtahuanpish David chashna ruhuashcaca Mandac Diospac ñaupapica mana allichu carca.