2 SAMUEL 1 - Dios Rimashcata Quillcashcami

David, Saúl huañushcata yachashcamanta

¹ Saúl huañushca quipa amalecitacunahuan macanacushpa cutishca quipaca Davidca ishcai punzhatami Siclag pueblopi carca.

² Ña quimsa punzha tucucpica, Saulpac carpa huasimantami shuc mosoca churanacuna lliquirishca, umapish allpalla chayamurca. Chashna shamushpami, cazushcata ricuchishpa Davidpac ñaupapi pambacaman cumurirca.

³ Chaipimi Davidca: —¿Maimantatac shamungui?— nishpa tapurca. Shina tapucpi paica: —Israelcunapac carpa huasimantami atimuni— nirca.

⁴ Shina nicpimi Davidca: —¿Imatac tucushcayari? ¡Chaitaca huillaiyari!— nirca. Shina nicpimi runaca: —Israelcunaca miticushpami rishca. Israelcunamantaca taucami huañushca. Saultapish, paipac churi Jonatantapish huañuchishcami— nirca.

⁵ Shina nicpimi, Davidca mosotaca: —¿Ima shinatac canca Saulpish, paipac churi Jonatanpish huañushcataca yachanguiyari?— nirca.

⁶ Shina nicpimi, huillangapac shamuc mosoca: —Ñucaca Gilboa urcupimi carcani. Chaipimi Saúl taunallishca huañunalla shayacucta ricushpa, paita piñac gentecunapish carretacunahuan, caballocunahuan huashata cuchuyacurcami.

⁷ Chaipimi Saulca ñucata tigrarishpa ricushpa cayarca. Shina cayacpimi ñucaca: “¡Amito, caipimi cani!” nircani.

⁸ Shina nicpimi paica: “¿Pitac cangui?” nishpa tapurca. Shina tapucpi ñucaca: “Amalecitami cani” nircani.

⁹ Shina nicpimi paica: “Ñucaca ña huañunalla cashpapish causacuniracmi, cuchuyashpa ñucata huañuchi” nirca.

¹⁰ Pai macanacuipi urmashpaca, ña mana causaipac cashcata yachashpami, paipacman cuchuyashpa huañuchircani. Quipaca, paipac umamanta coronatapish, paipac maquimanta argollatapish llucchishpami, can amitopacman apamuni— nirca.

¹¹ Chaimantami Davidca munai llaquirishpa, paipac churanata lliquicpi, paihuan cac gentecunapish chashnallatacmi ruhuarca.

¹² Saulmantapish, paipac churi Jonatanmantapish, Dios acllashca gentecunamantapish, Israel aillucunamantapish espadahuan huañuchishca cashcamantami tutayangacaman mana micushpa, yallita llaquirishpa huacarcacuna.

¹³ Chai quipami, Davidca huillangapac shamuc mosotaca: —¿Canca maimantatac cangui?— nishpa tapurca. Shina nicpimi mosoca: —Ñucaca caru llactamanta amalecita runapac churimi cani— nirca.

¹⁴ Shina nicpimi Davidca: —¿Canca ima nishpatac aceitehuan cahuishpa Mandac Dios acllashca runataca mana manchashpa maquihuan huañuchircangui?— nirca.

¹⁵ Shina nishpami, Davidca paita servic shuc runata cayashpaca: —¡Cai mosota huañuchigri!— nirca. Shina nicpimi, amalecita mosotaca chugrichishpa huañuchirca.

¹⁶ Chashna huañuchishca quipami Davidca: —Cambac shimillahuantac: “Aceitehuan cahuishpa Mandac Dios acllashca runataca ñucami huañuchircani” nishpaca cambac shimillahuantacmi llaqui tucushcangui. Chaimanta canta huañuchishpa jichashca yahuarca cambac jahuallatami— nirca.

Davidca Saultapish, Jonatantapish yuyarishpa huacashcamanta

¹⁷ Davidca Saulpish, Saulpac churi Jonatanpish huañushcamantami huacashpa cai cantota allichirca.

¹⁸ Judá aillucunapish chashnallatac huacashpa cantachunmi yachacuchun mandarca. Cai cantoca Jaser libropimi quillcashca tiyacun. Cai cantoca:

¹⁹ «¡Aij, sumaimana Israel-lla, cambac urcu jahuallapitacmi huañushca! ¡Ima shinachari cai sinchi runacunaca huañurca!

²⁰ Gat pueblopi causaccunamanpish, Ascalón pueblo plazapipish, ama parlanguichicchu. Filisteocunapac, circuncisionta mana ruhuashca huarmicuna ama cushicuchun.

²¹ Gilboa urcucunalla, cancunapac jahuapica, tamyapish, garuapish ama urmachun. Diosman cuna ofrendapish ama pucuchun. Chai urcupimi sinchi runacunapac, escudoca sarushca carca. Saulpac escudopish aceitehuan mana cahuishca shinami tucurca.

²² Jonatanpac arcoca yahuarpi mana chapurishcaca jaicapi mana shamucchu carca. Saulpac espadapish, paita piñaccunapac yahuarpi mana chapurishcaca jaicapi mana shamucchu carca.

²³ Saulpish, Jonatanpish yallitami cuyanacuccuna carca. Causaipipish, huañuipipish manatac chicanyarircacunachu. Paicunaca aguilatapish yalli callpaccunami carca. Leontapish yalli sinchicunami carca.

²⁴ ¡Israel huarmicunalla, Saulmanta huacaichicyari! ¡Paimi sumac morado churanacunata, curihuan sumacta allichishcata cancunaman churachic carca!

²⁵ ¡Cai sinchi runacunaca llaquinayaitami macanacuipica huañushca! ¡Jonatanpish, paipac urcupimari huañushca!

²⁶ Ñuca huauqui Jonatanlla, canmantaca yallitami llaquirini. Ñucapacca yallitami cuyashca carcangui. Cambac cuyaica huarmicunapac cuyaitapish yallimi carca.

²⁷ ¡Sinchi runacunaca ima shinachari huañurca! ¡Ima shinachari sinchi runacunapac macanacunapish chingarirca!» nirca.