2 REYES 9 - Dios Rimashcata Quillcashcami

Israel llactata jatun mandac cachun Jehuta aceitehuan cahuishcamanta

¹ Eliseoca Dios ima nishcata huillacpuramanta shucta cayashpami: «Allichirishpa, cai uchilla puñu aceiteta apashpa, Galaad llacta Ramot puebloman ri.

² Chaiman chayashpaca, Nimsipac nieto Josafatpac churi Jehutami ricungui. Paitaca huauquicunapac ladomantaca shuc ucuman pushangui.

³ Chai quipaca gachupi cac aceiteta japishpa, paipac umapi cahuingui. Chashna cahuishpaca: “Mandac Diosca: ‘Ñucami cantaca Israel llactata jatun mandac cachun aceitehuan cahuini’ ninmi” ningui. Chai quipaca punguta pascashpa utca shamungui, ama shayaringuichu» nirca.

⁴ Shina nicpimi, Dios ima nishcata huillac mosoca Galaad llactapi cac Ramot puebloman rirca.

⁵ Chaiman chayacpica, soldadocunata mandaccunapurami tandanacushpa tiyacushca carca. Chaipi tiyacucpimi, Paica: —Mandaclla, canmanmi shuc huillanata charini— nirca. Shina nicpimi Jehuca: —Tucui ñucanchicmanta ¿maijanmantac huillasha ningui?— nirca. Shina nicpimi paica: —Mandaclla, canmanmi huillasha nini— nirca.

⁶ Shina nicpimi, Jehuca jatarishpa, ucuman yaicurca. Chai ucupimi chai moso aceitehuan umapi cahuishpaca: —Israelcunata Mandac Diosca: “Ñucami, cantaca ñuca acllashca israelcunata jatun mandac cachun aceitehuan cahuini.

⁷ Canta mandac Acabpac huasi ucupurataca canmi huañuchingui. Chashna ruhuashpami ñuca ima nishcata huillaccunata, tucui ñucata serviccunata huañuchishpa, yahuarta jichashcamantaca paicunatapish chashnallatac huañuchingui. Chai serviccunataca Jezabelmi huañuchichirca.

⁸ Acabpac huasi ucupuracunaca tucuimi huañunga. Chashnami Israelpi causac Acabpac huasi ucupurata servishpa causaccunatapish, mana servishpa causaccunatapish tucui tucuchisha.

⁹ Acabpac huasi ucupurataca Nabatpac churi Jeroboampac huasi ucupurata, Ahiaspac churi Baasapac huasi ucupurata shinami tucuchigrini.

¹⁰ Jezabeltaca Jezreel pambapimi allcucuna micunga. Paitaca pipish mana enterrangachu” ninmi— nirca. Shina nishpami, Dios ima nishcata huillacca punguta pascashpa callparca.

¹¹ Quipata Jehú paita mandacta serviccunapacman llucshicpi paicunaca: —¿Tucuichu alli? ¿Chai juizhu illacca imapactac cambacman shamushca?— nirca. Shina nicpi, Jehuca: —Chai runataca cancunallatac ricsinguichicmi. Pai imata nishcatapish yachanguichicmi— nirca.

¹² Shina nicpimi paicunaca: —¡Ama llullaichu! ¡Pai ima nishcata huillai!— nircacuna. Shina nicpimi paica: —Cashna chashna nishpami: “Mandac Diosca: Ñucami cantaca Israel llactata jatun mandac cachun aceitehuan cahuini” ninmi— nishpami huillarca.

¹³ Shina nicpimi, paicunapac jahualla churanata utca llucchishpa, Jehú saruna gradapi churarca. Cashna ruhuashca quipami, cornetapi tocashpaca: «¡Jatun mandacca Jehumi!» nircacuna.

Jehú Israel llactata jatun mandac Joramta huañuchishcamanta

¹⁴ Nimsipac nieto Josafatpac churi Jehuca Joramta huañuchingapacmi israelcunahuan pacalla parlanacurca. Joramca Siria llactata jatun mandac Hazael ama yaicuchunmi, Galaad llacta Ramot pueblotaca tucui israelcunahuan cuidacurca.

¹⁵ Jatun mandac Joramca Jezreel puebloman chugrita jambiringapacmi cutimushca carca. Paitaca Siria llactata jatun mandac Hazaelhuan macanacucucpimi, siriocuna chugrichishca carca. Chaimantami Jehuca: «Cancuna ñucata jatun mandac cachun munashpaca, maijan cai pueblomanta pacalla Jezreel pueblopi huillagrichunca mana saquinachu canguichic» nirca.

¹⁶ Joram camapi ungushca cacpimi, Jehuca caballopi montashpa, Jezreel puebloman rirca. Shinallatac Judá llactata jatun mandac Ocoziaspishmi Joramta ricungapac shamushca carca.

¹⁷ Jezreel torre jahuapi runa Jehú achca soldadocunahuan shamucucta ricushpaca: —¡Achca soldadocuna shamucuctami ricuni!— nirca. Shina nicpimi Joramca: —Caballopi ric shuc soldadota cayashpa: “¿Allipacchu shamucungui?” nishpa tapuchun cachai— nirca.

¹⁸ Chashna cachacpi, caballopi ric soldadoca: —Jatun mandacca: “¿Allipacchu shamungui?” ninmi— nirca. Shina nicpimi Jehuca: —Canca ¿imapactac allipacchu shamungui ningui? ¡Ñucahuan tandanacungapac shamui!— nirca. Torre jahuapi chapac runaca: —¡Chai huillac runa paicunapacman chayashpaca mana cutimunchu!— nishpa huillarca.

¹⁹ Chaimantami shuctac soldadota caballopi montachishpa cacharca. Chai soldado chayashpaca: —Jatun mandacca: “¿Allipacchu shamungui?” ninmi— nirca. Shina nicpimi Jehuca: —Canca ¿imapactac allipacchu shamungui ningui? ¡Ñucahuan tandanacungapac shamui!— nirca.

²⁰ Torre jahuapi chapac runa cutinllatac chashna tucucta ricushpaca: —¡Paipish paicunapacman chayashpaca, mana cutimunchu! Chaita shamuc runaca Nimsipac churi Jehulayami shamucun. Paica juizhu illac shinami shamun— nirca.

²¹ Shina nicpimi Joramca: —¡Ñuca carretata caballopi huatai!— nirca. Paipac carretata caballopi ña huatacpimi, Israel llactata jatun mandac Jorampish, Judá llactata jatun mandac Ocoziaspish paicunapac quiquin carretapi Jehuta tupangapac llucshirca. Chashna llucshishpami Jezreel pueblomanta Nabotpac pambapi tuparca.

²² Joramca Jehuhuan tapushpaca: —Jehú, ¿allipacchu shamungui?— nirca. Shina nicpimi paica: —Cambac mama Jezabel yallita huainayashpa, yallita brujiashpa causacucpica, ¿maitatac allipac shamushayari?— nirca.

²³ Shina nicpimi, Joramca caballota cutichishpa, miticushpa callpashpa Ocoziastaca: —¡Ocozías ñucanchicta umashcami!— nirca.

²⁴ Chashna callpacpimi, Jehuca paipac flechata arcomanta shitashpa, Jorampac lomopi japichishpa shunguta yallirca. Chaimantami paipac carretallapitac huañushpa tigrarca.

²⁵ Chai quipami Jehuca paipac soldadocunata mandac Bidcartaca: «¡Chai huañushcata apashpa, Jezreel pueblomanta Nabotpac pambapi shitai! Caitaca yuyarinami cangui. Chaica canpish, ñucapish paipac taita Acabta catishpa ricucucpi, Joram ima tucunata Mandac Dios huillashpaca:

²⁶ “Mandac Dios ñucami Nabotpac yahuartapish, paipac churicunapac yahuartapish caina ricurcani. Chaimanta chai pushtullapitacmi paitapish chashnallatac ruhuasha” nirca. Cunanca Mandac Dios huillashca shinallatac Joramta japishpa, Nabotpac pambapi shitagri» nirca.

Jehú Ocoziasta huañuchishcamanta

²⁷ Chaita ricushpami, Judá llactata jatun mandac Ocoziasca huerta chaupipi tiyac huasiman rina ñanta miticushpa callparca. Chashna callpacpimi Jehuca: «¡Paitapish huañuchi!» nishpa catirca. Chaimantami Ibleam pueblo ladollapi tiyac Gur huichaita carretapi callpacucpi chugrichirca. Ocoziasca Miguido pueblomanmi miticushpa callparca. Ashtahuanpish chaipimi huañurca.

²⁸ Chaipi huañucpimi, paita serviccunaca Jerusalenman shuc carretapi aparca. Chaiman apashpami, paitaca paipac ñaupa taitacunata enterrashcapi Davidpac pueblopi enterrarca.

²⁹ Acabpac churi Joram Israel llactataca chunga shuc huatata mandacucpimi, Ocoziasca Judá llactata mandai callarirca.

Jezabel huañushcamanta

³⁰ Chai quipami Jehuca Jezreel puebloman rirca. Chaita yachashpami Jezabelca ñahuitapish pintarishpa, acchatapish sumacta allichishpa ventanamanta chapacurca.

³¹ Chashna chapacushpami, Jehú pueblo punguta yaicucucpica: —¿Canta mandacta huañuchic Zimrica allillachu?— nirca.

³² Shina nicta Jehú uyashpa, ventanata huichai ricushpaca: —¿Pitac ñucahuan tandanacusha ninguichic?— nirca. Shina nicpimi, mandaccunapuramanta ishcai, quimsa paita chaparca.

³³ Paicunatami Jehuca: —¡Chai huarmita pambata shitaichic!— nirca. Shina nicpimi, paicunaca chai huarmita pambata shitarca. Chashna shitacpimi, chai huarmipac yahuarca ashaca huasi quingraipi, ashaca caballocunapi saltarca. Chaillapitacmi paitaca caballocuna sarurca.

³⁴ Chai quipami Jehuca ucuman yaicurca. Ña micushca, ubiashca quipaca: —Chai mana allita ruhuac huarmita apashpa enterragrichic. Ima shina cashpapish jatun mandacpac ushimi— nirca.

³⁵ Chai huarmita enterrangapac rishpaca, uma tulluhuan, chaquicunahuan, maqui tullullahuanmi tarircacuna.

³⁶ Chaita ricushpa Jehuman huillangapac cutimucpica: —Mandac Dios tisbitapuramanta paita servic Eliasman huillashpaca: “Jezreel pambapimi Jezabeltaca allcucuna micunga.

³⁷ Jezabelpac cuerpoca chai pambapi yanga shinami Jezreel pambapica siricunga. Chaimantami paitaca pipish: ‘Caica Jezabel huarmipac cuerpomi mana ningacuna’ nishca canga” ninmi— nirca.