2 REYES 7 - Dios Rimashcata Quillcashcami

¹ Chaimantami Eliseoca: —Mandac Dios huillashcata uyaichic. Paica: “Caya, cai horasllatacmi Samaria pueblo yaicunapica canchis seah alli harinata shuc siclos cullquillapi, chunga pichca seah cebadataca shuc siclos cullquillapi randina tiyanga” ninmi— nirca.

² Shina nicpimi, jatun mandacta tucuipi servicca Eliseotaca: —Mandac Dios jahua pacha ventanacunata pascacpipish, chashnaca mana tucungachu— nirca. Shina nicpimi paica: —Chaitaca cambac ñahuihuantacmi ricungui. Shina ricushpapish chaicunataca mana micunguichu— nirca.

³ Samaria pueblo yaicunapimi lepra ungüi japishca chuscu runacuna tiyarca. Paicunami caishuc chaishuc parlanacushpaca: —¿Ima nishpatac caipica huañuita shuyashpa tiyacunchic?

⁴ Cai puebloman yaicushpaca, yallita yarcai tiyashcamanta huañushunmi. Cutin caipi saquirishpapish huañushunllatacmi. Cunanca, siriocunapac carpacunaman rishunchic. Paicuna mana huañuchicpica, causashunmi, cutin huañuchicpica huañushunchari— nirca.

⁵ Chashna nishpami, paicunaca ña amsayanata siriocunapac carpacuna shayachishca pambaman rircacuna. Chai carpacunaman chayacpica, tucuimi illashca carca.

⁶ Mandac Diosca siriocunapac carpacuna shayachishca pambapica macanacuna carretacuna, caballocuna, shinallatac achca soldadocuna bullashpa uyarishca cachunmi ruhuashca carca. Chaita uyashpami, paicunaca caishuc chaishuc parlanacushpaca: «Israel llactata mandacmi ñucanchicta llaquichichun heteocunata, Egipto runacunata jatun mandaccunata cayashca canga» nircacuna.

⁷ Chaimantami amsayanata jatarishpa, paicunapac carpa huasicunatapish, caballocunatapish, burrocunatapish chai pambapi ima shina cashca shinallatac shitashpa mana huañungapac callparcacuna.

⁸ Lepra ungüihuan cac runacuna carpa huasicuna shayachishca pambaman chayashpaca, shuc carpaman yaicushpami micushpa, ubiashpa carcacuna. Shinallatac cullquitapish, curitapish, churanacunatapish japishpami pacangapac rircacuna. Chaimanta cutin cutishpaca, shuc carpaman yaicushpami chai carpamantapish apashpa pacarcacuna.

⁹ Cutin quipata caishuc chaishuc parlanacushpaca: —Ñucanchicca mana allitachu ruhuacunchic. Cunanca cai alli huillaita huillana punzhami. Shina cacpipish, mana huillashpami upalla canchic. Caya pacaringacaman mana huillashpaca, ñucanchicmi juchanchishca cashun. Shina cashcamanta cunanllata jatun mandacpac huasiman rishpa, cai alli huillaita huillagrishun— nircacuna.

¹⁰ Chaimantami paicunaca Samaria pueblo yaicunapi cuidac soldadocunapacman rishpaca: «Ñucanchicmi siriocunapac carpacuna shayachishca pambaman rircanchic. Chaipica pipish mana ricurircachu. Maijan parlashcallapish mana uyarircachu, ashtahuanpish caballocuna, burrocunallami huatashca shayacurca. Carpacunapish ima shina shayachishca shinallatacmi carca» nircacuna.

¹¹ Shina nicpimi, pungupi cuidaccunaca jatun mandacpac huasiman rishpa huillarcacuna.

¹² Chashna huillacpimi, jatun mandacca tuta jatarishpa, paita serviccunataca: —Siriocuna ñucanchicta imata ruhuagricushcatami huillagrini. Ñucanchic yarcaihuan cacta yachashpami paicunaca: “Pueblomanta llucshicpica, causacta prezushpami puebloman yaicushun” yuyashpami, paicunapac carpa huasicunamanta llucshishpa, miticungapac rishcacuna— nirca.

¹³ Shina nicpimi, servicpuramanta shucca: —Cunanca cai pueblopi saquirishca pichca caballocunapi ricuchun cachashpa ricushun. Paicuna huañushpaca caipi tucui israelcuna yarcaihuan huañushca shinallatacmi huañunga— nirca.

¹⁴ Shina nicpimi, ishcai carretata japishpa, caballocunapi aisachishpa cachashpaca: «Ima shina cacta allita ricunguichic» nirca.

¹⁵ Paicunaca Jordán yacu ladocaman rishpami, siriocuna manchaihuan callpashpa, churanacunata, ima charishcacunata ñan jundata shitashpa rishcata ricurca. Chaimantaca jatun mandacman huillangapacmi cutircacuna.

¹⁶ Chashna huillacpimi, chai pueblopi causac gentecunaca siriocunapac carpacunapi ima tiyashcacunata japingapac rircacuna. Chashnami Mandac Dios huillashca shinallatac shuc seah alli harinataca shuc siclos cullquillapi, ishcai seah cebadataca shuc siclos cullquillapi randina tiyarca.

¹⁷ Jatun mandacca paita tucuipi servictami pungupi cuidachun churarca. Ashtahuanpish chai runaca Diospac runa jatun mandacpacman rishpa nishca shinallatacmi, pungu yaicunapi gentecuna sarushca huañurca.

¹⁸ Diospac runa jatun mandacta: «Caya, cai horasllapitacmi cai pueblo yaicunapica shuc seah alli harinataca shuc siclos cullquillapi, ishcai seah cebadataca shuc siclos cullquillapi catuna tiyanga» nishca shinallatacmi tucurca.

¹⁹ Diospac runa chashna nicpimi, jatun mandacta tucuipi servicca: «Mandac Dios jahua pacha ventanacunata pascacpipish, chashnaca mana tucungachu» nishca carca. Shina nicpimi, Eliseoca: «Riqui, chaitaca cambac ñahuihuantacmi ricungui. Shina ricushpapish chaicunataca mana micunguichu» nishca carca.

²⁰ Pai nishca shinami chai runaca pueblo yaicunapi gentecuna sarushca huañurca.