2 REYES 3 - Dios Rimashcata Quillcashcami

Israel llactata Joram mandashcamanta

¹ Jatun mandac Josafat chunga pusac huatata mandacucpimi, Acabpac churi Joramca Israel llactata mandai callarirca. Paica chunga ishcai huatatami Samaria llactataca mandarca.

² Mandac Diospac ñaupapica mana allitami ruhuarca. Chashna ruhuashpapish, paipac taita mama shinaca mana ruhuarcachu. Paica, paipac taita ruhuachishca Baal diostaca anchuchircami.

³ Shina cashpapish, Nabatpac churi Jeroboam shinallatacmi paica tucui israelcunata juchata ruhuachishpa catirca. Chai juchamantaca mana anchurircachu.

Moabitacunata mishanata Eliseo huillashcamanta

⁴ Moab llactata jatun mandac Mesaca achca animaltami charirca. Paica Israel llactata jatun mandac Acabmanca patsac huaranga maltón cari ovejacunata, patsac huaranga manarac rutushca ovejatami cuc carca.

⁵ Shina cashpapish, Acab huañucpica, Moab llactata jatun mandac Mesaca Israel llactata jatun mandactaca mana cazurcachu.

⁶ Chaimantami jatun mandac Joramca Samaria pueblomanta rishpa, tucui Israel llacta soldadocunata allichirichun nishpa huillamurca.

⁷ Shinallatac Judá llactata jatun mandac Josafatman huillachun cachashpaca: «Moab llactata jatun mandacmi ñucata mana cazun. Canca ¿Moab llactapi causaccunahuan macanacungapac ñucahuan risha ninguichu?» nichunmi cacharca. Shina nicpimi, Judá llactata jatun mandacca: «Ari, rishallami. Ñucapish, canpish shuc shinallami canchic. Ñuca gentecunapish, cambac gentecuna shinami can. Ñuca caballocunapish, cambac caballocuna shinami can» nirca.

⁸ Shinallatac: «¿Maitatac rishun?» nircami. Shina nicpimi Joramca: «Edom llacta shitashca pambatami rishun» nirca.

⁹ Israel llactata jatun mandacpish, Judá llactata jatun mandacpish, Edom llactata jatun mandacpish rishpaca, canchis punzhatami shitashca pambata muyushpa rirca. Chaimantami yacuca soldadocunamanpish, caballocunamanpish ña tucurirca.

¹⁰ Chaimantami Israel llactata jatun mandacca: —¡Aij, Mandac Diosca cai quimsa jatun mandaccunataca moabitacunapac maquipi churangapacmi apamushca!— nirca.

¹¹ Shina nicpimi Josafatca: —Mandac Diosman tapungapacca ¿Manachu pai ima nishcata huillac caipica tiyan?— nishpa tapurca. Shina nicpimi, Israel llactata jatun mandacpac servicpuramanta shucca: —Safatpac churi Eliseomi caipi causan. Paica Eliasta servicmi carca— nirca.

¹² Shina nicpi, Josafatca: —Paica Dios ima nishcata huillangami— nirca. Shina nicpimi, Israel llactata jatun mandacpish, Josafatpish, Edom llactata jatun mandacpish, Eliseopacman urai rircacuna.

¹³ Chaipimi Eliseoca Israel llactata jatun mandactaca: —¿Ñucaca canhuanca imatatac ricuna charini? ¡Cambac taita mamapac huillaccunapacman rilla!— nirca. Shina nicpipish, Israel llactata jatun mandacca: —Mana rishachu. Mandac Diosmi cai quimsa jatun mandaccunataca moabitacunapac maquipi churangapac tandachishca— nirca.

¹⁴ Shina nicpimi Eliseoca: —¡Ñuca servicuc tucuita Mandac Diospac shutipimi nini: Judá llactata jatun mandac Josafatta mana cazushpaca, cantaca mana uyaimanchu, ricunatapish mana ricuimanchu!

¹⁵ Shina cashpapish, cunanca shuc arpapi tocac runata apamuichic— nirca. Chai tocac runa ña tocai callaricpimi, Mandac Diospac poder Eliseopacman shamurca.

¹⁶ Chaimantami Eliseoca: «Mandac Diosca: “Cai pugru pambapi yacu jundachun achca junducunata ruhuaichic.

¹⁷ Ima huairata, ima tamyata cancunaca mana ricunguichicchu. Shina cashpapish, cai pugru pambapica yallitami yacuca jundanga. Shina jundacpica, soldadocunapish, caballocunapish, cancunapac huagracunapish ubiangami.

¹⁸ Mandac Diosca mana chaillatachu ruhuanga. Ashtahuanpish moabitacunatapish cancunapac maquipimi churanga.

¹⁹ Chaimantami jatun pircahuan muyundita jarcashca tucui pueblocunatapish, jatun pueblocunatapish tucui urmachishpa tucuchinguichic. Shinallatac tucui alli yuracunatapish pitishpami shitanguichic. Yacu llucshic junducunatapish tucuitami tapanguichic. Tarpuna allpacunapica rumicunatami jundachinguichic” ninmi» nirca.

²⁰ Tutamanta Diosman cushpa rupachina horasmi yacuca Edom llacta ñanta urai shamushpa, chai junducunapi jundarca.

²¹ Moab llactapi causaccunaca quimsa jatun mandaccuna macanacungapac shamucushcata yachashpami, cunanlla macanacunata yachacucuc huambramanta callarishpa, tucui tandanacushpa Edom llacta linderopi shayarirca.

²² Tutamanta moabitacuna jatarishpaca, yacu jundashcapi inti shitashpa pucayachishcatami carumanta ricurca.

²³ Chaita ricushpaca: «Caica yahuarmi. Chaica, jatun mandaccunami caishuc chaishuc macanacushpa, paicunapura huañunacushca canga. ¡Shina cashcamanta cunanca jacuchic, paicuna ima charishcacunata japishun!» nircacuna.

²⁴ Ashtahuanpish israelcunapac carpacuna ladoman chayacpica, israelcunaca macanacui callaricpimi, moabitacunaca paicunapac ñaupamanta miticushpa callparca. Shina callpacpimi, moabitacunataca tucui huañuchishpa, paicunapac pueblocunata tucuchirca.

²⁵ Pueblocunata llaquinayaita tucuchishpami, tarpuna allpacunapica rumicunata tucui jundachirca. Yacu llucshic junducunatapish tucuimi taparca. Alli yuracunatapish pitircami. Kir-hareset pueblollami mana ima tucushpa saquirirca. Shina cashpapish, huaracahuan macanacuccuna muyundita shayarishpami tucui tucuchirca.

²⁶ Moab llactata jatun mandacca macanacui sinchi tucucpimi, espadahuan macanacunata alli yachac canchis patsac soldadocunata tandachishpa, Edom llactata jatun mandac-huan macanacungapac shayarirca. Shina cashpapish mana pudircachu.

²⁷ Chaimantami paipac randi mandagricuc punta churita paipac diosman cushpa, pirca jahuapi tucuita rupachirca. Israelcunahuanca yallitami piñarirca. Chai quipaca jatun mandacpac ladomanta anchurishpami, paicunapac llactaman cutirca.