2 REYES 2 - Dios Rimashcata Quillcashcami

Eliasta jahua pachaman apashcamanta

¹ Mandac Dios Eliasta acapana huairahuan jahua pachaman apagricucpimi, Eliasca Eliseohuan Gilgal puebloman shamurca.

² Chaipimi Eliasca, Eliseotaca: —Ñucataca Mandac Diosmi Bet-el puebloman richun nin. Cunanca caipi saquirilla— nirca. Shina nicpimi Eliseoca: —¡Mandac Diospac shutipi, cambac shutipimi nini: Canllataca manatac saquishachu!— nirca. Chaimantami Bet-el puebloman ishcaita urai rircacuna.

³ Chaiman chayacpimi, Dios ima nishcata huillaccuna Eliseota tupangapac llucshishpaca: —¿Mandac Dios canta mandacta quichushpa cunan apagricuctaca yachanguichu?— nirca. Shina nicpimi Eliseoca: —Ari, yachanimi, upalla cailla— nirca.

⁴ Eliasca cutinmi Eliseotaca: —Ñucataca Mandac Diosmi Jericó puebloman richun nin. Cunanca caipi saquirilla— nirca. Shina nicpimi Eliseoca: —¡Mandac Diospac shutipi, cambac shutipimi nini: Chaimanca mana cachashachu!— nirca. Chaimantami Jericó puebloman ishcaita rircacuna.

⁵ Chaiman chayacpimi, Dios ima nishcata huillaccuna Eliseota tupangapac llucshishpaca: —¿Mandac Dios canta mandacta quichushpa cunan apagricuctaca yachanguichu?— nirca. Shina nicpimi Eliseoca: —Ari, yachanimi, upalla cailla— nirca.

⁶ Eliasca Eliseotaca: —Ñucataca Mandac Diosmi Jordán yacuman richun nin. Chaimanta cunanca, caipi saquirilla— nirca. Shina nicpimi Eliseoca: —¡Mandac Diospac shutipi, cambac shutipimi nini: Canllataca manatac saquishachu!— nirca. Chaimantami ishcaita rircacuna.

⁷ Chaiman chayashpaca, Jordán yacu ladopimi ishcaita shayarirca. Chaipi shayacucpimi, Dios ima nishcata huillaccunapac pichca chunga churicuna shamushpa, paicunamanta carupi shayarirca.

⁸ Chaipimi Eliasca paipac jahualla churanata llucchishpa, patarishpaca yacupi huactarca. Shina huactacpimi, yacu caiman chaiman montonaricpi, paicunaca chaquishca allpata pasarca.

⁹ Ña pasashpaca, Eliasca Eliseotaca: —Cambac ladomanta ñucata manarac apacpi, canman imata ruhuachun ñucata mañailla— nirca. Shina nicpimi Eliseoca: —Cambac espirituta chaupihuan cuchun ninimi— nirca.

¹⁰ Shina nicpimi paica: —Mana cuipacllatacmi mañangui. Shina cacpipish, cambac ladomanta ñucata apacta ricushpaca chasquinguimi. Mana ricushpaca, mana chasquinguichu— nirca.

¹¹ Paicuna chashna parlanacushpa ricucllapitacmi, nina japiricuc caballocunaca nina japiricuc carretacunata aisashca shamushpa, paicunata chicanyachirca. Shina chicanyachicpimi, Eliasca acapana huairapi huichai rirca.

¹² Chashna ricta ricushpami Eliseoca: «¡Ñuca taitalla, ñuca taitalla! ¡Canca israelcunapac macanacuna carretacunapi, caballocunapi ric soldadocuna shinami cangui!» nirca. Chai quipaca Eliastaca mana ashtahuan ricurcachu. Chai quipaca, paipac churanata japishpami ishcaipi lliquirca.

¹³ Quipataca Eliaspac saquirishca jahualla churanata japishpami, Jordán yacullamanta cutishpa, yacu patapi shayarirca.

¹⁴ Chaipi shayarishpami, Eliaspac saquirishca jahualla churanata japishpa yacupi huactarca. Chashna huactashpaca: «¿Eliasta Mandac Dios maipitac cangui?» nirca. Chashna nishpa huactacpimi, yacuca uraman janaman montonarirca. Chashna montonaricpimi, Eliseoca pasarca.

¹⁵ Jordán yacu chimbapi tiyac Jericó pueblopimi, Dios ima nishcata huillaccunapac churicunaca shayacurca. Chaipimi paicunaca: «¡Eliaspac espirituca Eliseopimi causacun!» nirca. Shina nishpami, Eliseopacman rishpa, pambacaman cumurircacuna.

¹⁶ Chashna cumurishpaca: —Riqui, caipimi canta servic pichca chunga alli sinchi runacunaca shayacun. Paicunata canta mandac Eliasta mashcachun cachai. Eliastaca, Mandac Diospac Espirituca mai urcucunapi, mana cashpaca mai pambacunapimi shitashca canga— nircacuna. Shina nicpimi Eliseoca: —Ama pita cachaichicchu— nirca.

¹⁷ Ashtahuanpish paicuna cachai nicucllapitacmi Eliseoca: —Shina cashpaca cachaichic— nirca. Shina nicpimi, paicunaca pichca chunga runacunata cacharca. Paicunaca quimsa punzhata Eliasta mashcashpapish mana tarircachu.

¹⁸ Eliseoca Jericó pueblopimi saquirirca. Eliseopacman paicuna cutimucpimi, paica: —¿Manachu ama richicchu nircani?— nirca.

¹⁹ Jericó pueblopi causaccunami Eliseotaca: —Riqui, cai puebloca ñuca amo ricushca shinallatac alli pushtupimi. Shina cashpapish yacuca mana allichu. Shinallatac allpapish mana pucuc allpachu— nirca.

²⁰ Shina nicpimi Eliseoca: —Shuc mushuc mangata apamushpa, chaipi cachita churaichic— nirca. Shina nicpimi, paicunaca apamushpa curca.

²¹ Chaitami Eliseoca yacu junduman apashpa, chaipi cachita shitashpaca: —Mandac Diosca: “Ñucami cai yacuta allichircani. Chaimanta cai yacupica huañuipish, ungüipish mana ashtahuan tiyangachu” ninmi— nirca.

²² Shina nicpimi, chai yacuca alli tucushpa Eliseo nishca shina cunan punzhacaman alli can.

²³ Chai quipaca Eliseoca Bet-el pueblomanmi rirca. Pai ñanta huichai ricucpimi, chai pueblopi causac maijan huambracuna llucshishpaca: «¡Lluchu uma runami llucshicun! ¡Lluchu uma runami llucshicun!» nishpa burlarcacuna.

²⁴ Chaimantami Eliseo tigrarishpa paicunata ricushpa Mandac Diospac shutipi maldiciarca. Chashna maldiciacpimi, sachamanta ishcai huarmi oso llucshishpa, chai huambracunamantaca chuscu chunga ishcai huambrata pitinacushpa huañuchirca.

²⁵ Eliseoca chai pueblomantaca Carmelo urcumanmi rirca. Chaimantaca Samaria pueblomanmi cutirca.