2 REYES 17 - Dios Rimashcata Quillcashcami

Samaria pueblota llaquichishpa israelcunata prezu apashcamanta

¹ Judá llactata jatun mandac Acaz chunga ishcai huatata mandacucpimi, Elapac churi Oseasca Israel llactata mandai callarirca. Paica iscun huatatami Samaria pueblopi mandarca.

² Paica, pai manarac mandacpi Israel llactata jatun mandaccuna juchata ruhuashca shina mana ruhuashpapish, Mandac Diospac ñaupapica juchata ruhuashpami causarca.

³ Asiria llactata jatun mandac Salmanasarca macanacushpa atishpami, Oseastaca servichishpa, impuestota pagachishpa causarca.

⁴ Ashtahuanpish Asiria llactata jatun mandacca Oseas pacalla parlanacuctami yacharca. Oseasca Egipto llactata jatun mandac Somanmi huillaccunata cacharca. Shinallatac Asiria llactata jatun mandacman huatanta impuestota cunatapish mana ashtahuan curcachu. Chaimantami jatun mandacca paita prezushpa carcelpi churarca.

⁵ Asiria llactata jatun mandacca tucui llactaman yaicushpami, Samaria pueblota muyushpa, quimsa huatacaman causarca.

⁶ Iscun huatata Oseas mandacucpimi, Asiria llactata jatun mandacca Samaria pueblota quichushpa, israelcunatapish Asiria llactaman prezu aparca. Chashna apashpami, Gozán yacu ladopi tiyac Halah, Habor pueblocunapi medocunapac pueblocunapi causachun churarca.

Israelcuna juchallishcamanta

⁷ Israelcunaca juchata ruhuashpami Egiptomanta llucchimuc paicunata Mandac Diostaca piñachirca. Egipto llactata jatun mandac Faraonpac maquimanta llucchimuc Diosta cungarishpami, shuctac dioscunata mañarcacuna.

⁸ Israelcunapac ñaupamanta llucchishpa cachashca gentecuna ruhuashca shinallatac, utcapi Israel llactata mandaccuna ruhuashca shinallatacmi ruhuashpa catircacuna.

⁹ Israelcunaca mana allita pacalla ruhuashpami, paicunata Mandac Diostaca piñachirca. Paicunapac tucui pueblocunapi, chapana torrecunapi, muyundita pircashca pueblocunacamanmi altarcunata ruhuarca.

¹⁰ Shinallatac tucui lomacunapi, jatun yura ucucunapimi ruhuashcalla dioscunata, Asera huarmi diosman ricchacunata shayachircacuna.

¹¹ Mandac Dios paicunapac ñaupamanta llucchishpa cachashca gentecuna shinallatacmi, tucui chai altarcunapi inciensota rupachiccuna carca. Chashna yalli millaita ruhuashpami, Mandac Diosta yallita piñachircacuna.

¹² Paicunaca yanga dioscunatami servircacuna. Mandac Diosca israelcunataca: «Cancunaca mana chashna ruhuanachu canguichic» nishpami sinchita mandarca.

¹³ Mandac Diosca paita servic pai ima nishcata huillaccunata, pai ricuchishcata huillaccunata israelcunamanpish, Judá gentecunamanpish huillachishpaca: «Millaicunata ruhuanata saquishpa, ñuca mandashcacunata, ñuca yachachishcacunata cancunapac ñaupa taitacunaman ñuca mandashca shinallatac tucuita cazushpa causaichic» nirca.

¹⁴ Ashtahuanpish paicunaca, paicunapac ñaupa taitacuna shinallatacmi sinchi shungu tucushpa mana cazurcacuna. Chai taitacunaca paicunata Mandac Diostaca mana crircacunachu.

¹⁵ Chaimantami pactachichun cushca shimicunatapish, paicunapac ñaupa taitacunahuan ari nishcatapish, ima shina causanata yachachishcatapish, cazuchun pai mandashcatapish mana cazushpa, imapish yanga dioscunata catishpa, yanga tucurcacuna. Paicunapac llacta cuchupi causaccuna ruhuashcatami catircacuna. Mandac Diosca chai gentecunataca ama catinguichicchu nishpami mandarca.

¹⁶ Paicunata Mandac Dios mandashcacunata saquishpami, curita yacuyachishpa ishcai beci dioscunata ruhuarca. Shinallatac Asera huarmi diosman ricchacunatapish ruhuarca. Jahua pacha lucerocunatapish, Baal diostapish servircacuna.

¹⁷ Paicunapac churicunatapish, ushicunatapish chai diosman cushpami ninapi rupachircacuna. Adivinocunapish, brujocunapish tucurcacunami. Mandac Diospac ñaupapica mana allita ruhuashpa causashpami, yallita paitaca piñachirca.

¹⁸ Chaimantami Mandac Diosca israelcunahuan yallita piñarishpa, paipac ñaupamanta llucchishpa cacharca. Chashna cachacpica, Judá aillullami saquirirca.

¹⁹ Judá aillucunapish paicunata Mandac Dios mandashcacunata mana cazushpami, israelcuna pactachichun mandashcacunallatatac pactachircacuna.

²⁰ Chaimantami Mandac Diosca israelcunapac tucui huahua huahuacunataca saquirca. Paipac ñaupamanta anchuchingacamanmi shuhuashpa causaccunapac maquipi churashpa llaquichirca.

²¹ Israelcunataca Davidpac huahua huahuapura mandashpa causanamantami anchuchirca. Paicunaca Nabatpac churi Jeroboamtami jatun mandac cachun churarca. Paimi israelcunataca Mandac Diosta catinamanta anchuchishpa yalli juchata ruhuachirca.

²² Israelcunaca Jeroboam tucui ruhuashcata catishpami juchata ruhuashpa catircacuna.

²³ Mandac Diosca pai ima nishcata huillac serviccunaman huillachishca shinallatacmi israelcunataca paipac ñaupamanta llucchishpa cacharca. Israelcunaca paicunapac llactamanta Asiria llactaman prezu apacpimi, cunancaman chaipi cancuna.

Asiria llacta runacunata Samariapi causachun churashcamanta

²⁴ Asiria llactata jatun mandacca Babilonia, Cuta, Ava, Hamat shinallatac Sefarvaim pueblocunamantami gentecunata apamushpa, Samaria llacta pueblocunapi israelcunapac randi causachun churarca. Paicunaca Samaria llactata japishpami, chaipi tiyac pueblocunapi causarcacuna.

²⁵ Chaipi causai callarishpaca, Mandac Diosta mana mancharcacunachu. Chaimantami Mandac Diosca paicunata huañuchichun leoncunata cacharca.

²⁶ Shina cachacpimi, Asiria llacta jatun mandacpacman huillaccunata cachashpaca: «Samaria llactapi causachun can apamushca gentecunaca chai llactapac Dios mandashcacunata, shinallatac ima shina alli ninataca mana yachancunachu. Chaimantami paicunata llaquichichun leoncunata cachashca. Chai leoncunami paicunataca huañuchicun» nirca.

²⁷ Chashna huillacpimi, Asiria llactata jatun mandacca: «Chai llactapi Dios mandashcata yachachichun, chai llactallamantatac apamushca maijan curacunata chaipi causachun churaichic» nirca.

²⁸ Chaimantami Samaria llactamanta prezu apashca shuc cura shamushpa, Bet-el pueblopi causarca. Paimi Mandac Diosta ima shina manchashpa causanata yachachirca.

²⁹ Chashna cacpipish, tucui llactamanta shamushca gentecunaca paicunapac quiquin dioscunata ruhuashpami, Samaria pueblopi causaccuna ruhuashca altarcunapi lomacunapi churarcacuna.

³⁰ Babilonia pueblopi causaccunaca Sucot-benot diosta, Cuta pueblopi causaccunaca Nergal diosta, Hamat pueblopi causaccunaca Asima diostami ruhuarcacuna.

³¹ Aveocunaca Nibhaz, Tartac dioscunatami ruhuarcacuna. Sefarvaim pueblopi causaccunaca Adramelec, Anamelec dioscunata alli nishpami, paicunapac churicunata cushpa ninapi rupachircacuna. Chai dioscunaca Sefarvaim gentecunapac dioscunami carca.

³² Paicunaca Mandac Diosta manchashpapish, paicunapurallamantatac acllashpami, lomacunapi tiyac altarcunapi cura cachun churarcacuna. Chai curacunami lomacunapi tiyac altarcunapica animalcunata cushpa rupachiccuna carca.

³³ Chai gentecunaca Mandac Diosta manchashpapish, paicunapac dioscunatami alli nishpa causarcacuna. Paicunapac llactapi ima shina ruhuashpa causashca shinallatacmi causarcacuna.

³⁴ Paicunaca cunan punzhacamanmi utcapi ruhuashca shinallatac ruhuashpa causancuna. Mandac Diostapish mana manchancunachu. Pactachichun pai cushcatapish, mandashcacunatapish mana cazuncunachu. Jacobopac huahua huahuacunaman Mandac Dios mandashpa cushcatapish, pactachichun cushca mandashcacunatapish mana pactachincunachu. Jacobotaca Israeltami shutichirca.

³⁵ Mandac Diosca Jacobopac huahua huahuacunahuan ari nishpaca: «Shuctac dioscunata ama manchanguichicchu. Chaicunata ama alli ninguichicchu. Ama servinguichicchu. Animalcunatapish ama cushpa huañuchinguichicchu.

³⁶ Chaipac randica jatun poder ñuca maquihuan, Egipto llactamanta llucchimuc Mandac Dios ñucatami manchana, alli nina canguichic. Ñucamanmi animalcunata cushpa huañuchina canguichic.

³⁷ Pactachichun ñuca cushca shimicunata, alli causachun yachachishcacunata, quillcashpa mandashcacunata alli yuyarishpami pactachina canguichic. Shuctac dioscunata ama manchanguichicchu.

³⁸ Cancunahuan ñuca ari nishcataca ama cungaringuichicchu. Shuctac dioscunata ama manchanguichicchu.

³⁹ Ashtahuanpish cancunata Mandac Dios ñucallatami manchana canguichic. Ñucami cancunata piñaccunapac maquimanta cacharichisha» nirca.

⁴⁰ Shina nicpipish, paicunaca mana uyashpami utcapi imata ruhuashpa causashca shinallatac causarcacuna.

⁴¹ Chashnami chai gentecunaca Mandac Diosta manchashpapish, paicunapac yanga dioscunata servishpa causarcacuna. Paicunapac churicunapish, nietocunapish paicunapac taitacuna ruhuashpa causashca shinallatacmi cunancaman ruhuashpa causancuna.