2 REYES 15 - Dios Rimashcata Quillcashcami

Azarías Judá llactata mandashcamanta

¹ Israel llactata jatun mandac Jeroboam ishcai chunga canchis huatata mandacucpimi, Amasiaspac churi Azariasca Judá llactata mandai callarirca.

² Azariasca chunga sucta huatata charishpami mandai callarirca. Paica pichca chunga ishcai huatatami Jerusalenpi mandarca. Paipac mamaca Jerusalenmanta Jecoliasmi carca.

³ Azariasca Mandac Diospac ñaupapica, paipac taita Amasías shinallatacmi allita ruhuashpa causarca.

⁴ Chashna cashpapish lomacunapi tiyac altarcunataca mana anchuchircachu. Chai altarcunapimi gentecunaca animalcunata huañuchishpa, inciensota rupachishpa catircacuna.

⁵ Mandac Dios jatun mandacta llaquichicpimi, paica huañuna punzhacaman lepra ungüihuan huasipi chicanyachishca causarca. Mandana huasipica jatun mandacpac churi Jotammi gentecunata mandacurca.

⁶ Azariaspac shuctac ruhuashcacunapish, imacunallata ruhuashcacunapish, Judá llactata jatun mandaccuna imata ruhuashcacunata quillcashcapimi tiyacun.

⁷ Azarías huañushpa, paipac ñaupa taitacunahuan tandanacugricpica, paipac ñaupa taitacunata enterrashcallapitacmi Davidpac pueblopi enterrarca. Paipac churi Jotammi paipac randi mandarca.

Zacarías Israel llactata mandashcamanta

⁸ Judá llactata jatun mandac Azarías quimsa chunga pusac huatata mandacucpimi, Jeroboampac churi Zacariasca mandai callarirca. Paica sucta quillatami Samaria pueblopi mandarca.

⁹ Paica ñaupa taitacuna shinallatacmi Mandac Diospac ñaupapi mana allita ruhuarca. Paica Nabatpac churi Jeroboam israelcunata juchacunata ruhuachishca shinallatacmi ruhuashpa, Mandac Diospac ñaupapica catirca.

¹⁰ Zacariastaca Jabespac churi Salummi pacalla parlanacushpa, tucui gentecunapac ñaupapi chugrichishpa huañuchirca. Chashna huañuchishpami, paipac randi mandarca.

¹¹ Zacarías shuctac ruhuashcacunapish Israel llactata mandaccuna imata ruhuashcacunata quillcashcapimi tiyacun.

¹² Mandac Dios Jehuta rimashpaca: «Cambac huahuacunami chuscu miranacuicaman Israel llactata mandanapi tiyaringa» nirca. Chaica chashnami tucurca.

Salum Israel llactata mandashcamanta

¹³ Judá llactata jatun mandac Azarías quimsa chunga iscun huatata mandacucpimi, Jabespac churi Salumca Israel llactata mandai callarirca. Paica shuc quillatami Samaria pueblopi mandarca.

¹⁴ Gadipac churi Menahemca Tirsa pueblomanta Samaria puebloman huichai rishpami, Jabespac churi Salumtaca Samaria pueblopi chugrichishpa huañuchirca. Chashna huañuchishpami, paipac randi mandarca.

¹⁵ Salumpac shuctac ruhuashcacunapish, Zacariasta huañuchingapac shuccunahuan pacalla parlanacushcapish, Israel llactata mandaccuna imata ruhuashcacunata quillcashcapimi tiyacun.

¹⁶ Manahemca Tifsa pueblopi causac tucui gentecunata huañuchishpami, chaipi ima tiyashcacunatapish aparca. Chai pueblo punguta mana pascashcamantami, Tirsa pueblomanta callarishpaca, Tifsa pueblo muyundipi tiyac pueblocunatapish quichushpa chaipi causac tucui huicsayuc huarmicunatapish huicsata pascashpa huañuchirca.

Manahem Israel llactata mandashcamanta

¹⁷ Judá llactata jatun mandac Azarías quimsa chunga iscun huatata mandacucpimi, Gadipac churi Manahemca Israel llactata mandai callarirca. Paica chunga huatatami Samaria pueblopi mandarca.

¹⁸ Mandac Diospac ñaupapica mana allita ruhuashpami causarca. Nabatpac churi Jeroboam israelcunata juchata ruhuachishca shinallatacmi punzhanta juchallishpa catirca.

¹⁹ Chai punzhacunami Asiria llactata jatun mandac Pulca Israel llactahuan macanacungapac shamurca. Chaimantami Manahemca pai mandanata sinchiyachingapac jatun mandac Pulman shuc huaranga talento cullquita curca.

²⁰ Pulman cungapacca Manahemca Israel llacta yallita charic gentecunatami cada shuc pichca chunga talento cullquita cuchun mandarca. Chai cullquita cucpimi, Siria llactata jatun mandacca Israel llactamanta utca rirca.

²¹ Manahempac shuctac ruhuashcacunapish, imacunallata ruhuashcacunapish, Israel llactata mandaccuna imata ruhuashcacunata quillcashcapimi tiyacun.

²² Manahem huañushpa, paipac ñaupa taitacunahuan tandanacugricpica, paipac churi Pekaiami paipac randi mandarca.

Pekaía Israel llactata mandashcamanta

²³ Judá llactata jatun mandac Azarías pichca chunga huatata mandacucpimi, Manahempac churi Pekaiaca Israel llactata mandai callarirca. Paica ishcai huatatami Samaria pueblopi mandarca.

²⁴ Mandac Diospac ñaupapica mana allita ruhuashpami causarca. Nabatpac churi Jeroboam israelcunata juchata ruhuachishca shinallatacmi ruhuashpa catirca.

²⁵ Pekaiataca paipac soldadocunata mandac Pekami pacalla parlanacushpa, Samaria pueblo mandana huasillapitac Argob, Arie runacunatapish, Galaad llactamanta pichca chunga runacunahuan tandanacushpa huañuchirca. Pekaca Remaliaspac churimi carca. Chashna huañuchishpaca, paimi Pekaiapac randi mandarca.

²⁶ Pekaiapac shuctac ruhuashcacunapish, imacunallata ruhuashcacunapish Israel llactata mandaccuna imata ruhuashcacunata quillcashcapimi tiyacun.

Peka Israel llactata mandashcamanta

²⁷ Judá llactata jatun mandac Azarías pichca chunga ishcai huatata mandacucpimi, Remaliaspac churi Pekaca Israel llactata mandai callarirca. Paica ishcai chunga huatatami Samaria pueblopi mandarca.

²⁸ Mandac Diospac ñaupapica mana allita ruhuashpami causarca. Nabatpac churi Jeroboam israelcunata juchata ruhuachishca shinallatacmi ruhuashpa catirca.

²⁹ Israel llactata jatun mandac Peka mandacui punzhacunami asiriocunata jatun mandac Tiglat-pileser shamushpa, Ijón, Abel-bet-maaca, Janoa, Cedes, Hazor, Galaad, Galilea pueblocunata shinallatac Neftalí tucui llactacunata quichushpa, chaipi causaccunatapish prezu aparca.

³⁰ Elapac churi Oseasmi pacalla parlanacushpa, Remaliaspac churi Pekataca chugrichishpa huañuchirca. Chashna huañuchishpami, Pekapac randi mandai callarirca. Azariaspac churi Jotam ishcai chunga huatata mandacucpimi, chashnaca tucurca.

³¹ Pekapac shuctac ruhuashcacunapish, imacunallata ruhuashcacunapish Israel llactata jatun mandaccuna imata ruhuashcacunata quillcashcapimi tiyacun.

Jotam Judá llactata mandashcamanta

³² Remaliaspac churi Peka ishcai huatata Israel llactata mandacucpimi, Uziaspac churi Jotamca Judá llactata mandai callarirca.

³³ Paica ishcai chunga pichca huatata charishpami, mandai callarirca. Chunga sucta huatatami Jerusalenpi mandarca. Paipac mamaca Sadocpac ushi Jerusami carca.

³⁴ Jotamca Mandac Diospac ñaupapica paipac taita Uzías allita ruhuashpa, causashca shinallatacmi allita ruhuarca.

³⁵ Chashna ruhuashpapish lomacunapi tiyac altarcunataca mana anchuchircachu. Chai altarcunapimi gentecunaca animalcunata huañuchishpa, inciensotapish rupachishpa catirca. Paimi Mandac Diospac huasi jahua pungutaca allichirca.

³⁶ Jotampac shuctac ruhuashcacunapish, imacunallata ruhuashcacunapish Judá llactata jatun mandaccuna imata ruhuashcacunata quillcashcapimi tiyacun.

³⁷ Chai punzhacunapimi Mandac Diosca Judá llactapi causaccunahuan piñarishpa, Siria llactata jatun mandac Rezinta, shinallatac Remaliaspac churi Pekata llaquichichun cacharca.

³⁸ Jotam huañushpa, paipac ñaupa taitacunahuan tandanacugricpica, paipac ñaupa taitacunata enterrashcallapitacmi Davidpac pueblopi enterrarca. Paipac churi Acazmi paipac randi mandarca.