2 REYES 13 - Dios Rimashcata Quillcashcami

Joacaz Israel llactata mandashcamanta

¹ Ocoziaspac churi Joás Judá llactata ishcai chunga quimsa huatata mandacucpimi, Jehupac churi Joacazca Israel llactata mandai callarirca. Paica chunga canchis huatatami Samaria pueblopi israelcunata mandarca.

² Paica Nabatpac churi Jeroboam israelcunata juchata ruhuachishca shinallatacmi Mandac Diospac ñaupapica mana allita ruhuashpa, juchallishpa catirca.

³ Chaimantami Mandac Diosca israelcunahuan nina japiric shina piñarishpa, Siria llactata jatun mandac Hazaelpac maquipi, Hazaelpac churi Ben-adadpac maquipi tauca huatacunata llaquita apachun churarca.

⁴ Chaimantami Joacazca Mandac Diosta mañarca. Mandac Diosca Siria llactata jatun mandac israelcunata yallita llaquichicucpimi, Joacaz mañashcata uyarca.

⁵ Chaimantami Mandac Diosca israelcunapacman shuc quishpichicta cacharca. Pai siriocunapac maquimanta quishpichicpimi, israelcunaca puntaman causashca shina paicunapac carpacunapi causarca.

⁶ Shina quishpichicpipish, Jeroboam huasi ucupuracuna israelcunata juchata ruhuachishca shinallatacmi juchata ruhuashpa catirca. Shinallatac Asera huarmi diosta yuyarina yuratapish Samaria pueblomantaca mana anchuchircachu.

⁷ Siria llactata jatun mandacmi tucui tucuchishpa, ñuto allpata shina saquishca cacpimi, Joaspac gentecunaca caballopi ric pichca chunga soldadocuna, macanacuna chunga carretacuna, chaquillahuan puric chunga huaranga soldadocunalla saquirishca carca.

⁸ Joacazpac shuctac ruhuashcacunapish, imacunallata ruhuashcacunapish, sinchi mandac cashcapish, israelcunata jatun mandaccuna tucui imata ruhuashcata quillcashcapimi tiyacun.

⁹ Joacaz huañushpa, paipac ñaupa taitacunahuan tandanacucpica, Samaria pueblopimi enterrarca. Paipac randica, paipac churi Joasmi mandarca.

Joás Israel llactata mandashcamanta

¹⁰ Judá llactata jatun mandac Joás quimsa chunga canchis huatata mandacucpimi, Joacazpac churi Joasca Israel llactata Samaria pueblopi mandai callarirca. Paica chunga sucta huatatami mandarca.

¹¹ Ashtahuanpish Mandac Diospac ñaupapica mana allitami ruhuarca. Nabatpac churi Jeroboam israelcunata juchata ruhuachishca shinallatacmi juchata ruhuashpa catirca. Chai juchacunata ruhuanataca mana saquircachu.

¹² Joaspac shuctac ruhuashcacunapish, imacunallata ruhuashcacunapish, sinchita mandashcapish, Judá llactata jatun mandac Amasias-huan macanacushcapish, Israel llactata jatun mandaccuna imata ruhuashcata quillcashcapimi tiyacun.

¹³ Joás huañushpa paipac ñaupa taitacunahuan tandanacucpica, Jeroboammi paipac mandashpa tiyarinapi tiyarirca. Joastaca Israel llactata jatun mandaccunata enterrashcallapitacmi Samaria pueblopi enterrarca.

Eliseo ña huañuna punzhacunapi huillashcamanta

¹⁴ Eliseoca huañuna ungüihuanmi yallita ungurca. Israel llactata jatun mandac Joasca ricungapacmi urai shamurca. Paipac ñaupapi huacashpaca: —¡Ñuca taitalla, ñuca taitalla! ¡Canca macanacuna carretacunata, caballopi ric soldadocuna shinamari israelcunapacca cangui!— nirca.

¹⁵ Shina nicpimi Eliseoca: —Shuc arcotapish, maijan flechacunatapish japi— nirca. Shina nicpimi, jatun mandacca shuc arcota, maijan flechacunata japirca.

¹⁶ Shina japicpimi, Eliseoca Israel llactata jatun mandactaca: —Cambac maquita arco jahuapi churai— nirca. Shina churacpimi, Eliseoca jatun mandacpac maquipi paipac maquita churarca.

¹⁷ Chai quipaca: —Inti llucshina lado ventanata pascai— nirca. Shina pascacpi Eliseoca: —¡Flechata shitai!— nirca. Chai flechata cacharicpimi Eliseoca: —¡Mandac Diosca cai flechahuanmi macanacuita mishachinga! ¡Cai flechahuanmi siriocunataca mishachinga! Canmi siriocunata Afec pueblopi huañuchishpa tucuchingui— nirca.

¹⁸ Cutinllatac Eliseo rimashpaca: —Flechata japi— nirca. Shina japicpi, Eliseoca Israel llactata jatun mandactaca: —¡Allpapi huactai!— nirca. Shina nicpimi, jatun mandacca quimsa cutin huactashpa, mana ashtahuan huactarca.

¹⁹ Chaimanta Diospac runa jatun mandac-huan piñarishpaca: —Pichca cutin, mana cashpaca sucta cutin huactashpaca, Siria llactapica shucllatapish mana saquishpami, tucuchinguiman carca. Ashtahuanpish cunanca, quimsa cutincamanllami mishangui— nirca.

²⁰ Eliseo huañucpica, enterrarcami. Shuc huata quipami tandanacushpa shuhuac moabitacuna macanacunahuan Israel llactaman shamurca.

²¹ Chai runacuna shamui punzhaca shuc huañushcatami enterracurca. Tandanacushpa shuhuaccuna shamucucta ricushpami, chai huañushcata Eliseota enterrashca jutcupi shitashpa callparca. Chashna shitacpica, Eliseopac tullucunapi huactarishpami causarishpa shayarirca.

²² Joacaz mandacui tucui huatacunapimi Siria llactata jatun mandac Hazaelca israelcunata yallita llaquichishpa charirca.

²³ Mandac Diosca Abrahamhuan, Isaac-huan, Jacobohuan ari nishcamantami paicunataca yallita llaquirca. Chaimantami paicunataca tucuchingapac paipac ñaupamanta llucchishpa, cachanatapish mana munarca.

²⁴ Siria llactata mandac Hazaelca huañurcami. Paipac randica paipac churi Ben-adadmi mandarca.

²⁵ Joacazpac churi Joasmi pueblocunata Hazaelpac churi Ben-adadpac maquimanta cutin japirca. Chai pueblocunataca paipac taita Joacazmantami Hazaelca macanacushpa quichushca carca. Joasca quimsa cutincaman macanacushpa mishashpami, chai pueblocunataca israelcunapac cachun cutin quichurca.